Carmëlu jirkachö ima pasanqan

Israelchö chunka kastakunataqa mana alli gobernantikunam gobernayarqan, y tsë llapan gobernantikunapita mas peorqa Acabmi karqan. Warmimpa jutinmi Jezabel karqan, pëqa Baal niyanqan santuta adoraq alläpa mana alli warmim karqan. Ishkampa culpanrëkurmi mëtsika israelïtakuna Baalta adorayarqan. Y Jehoväpa willakoqninkunatam mëtsikaqta wanutsiyarqan. ¿Y imatataq Jehoväqa rurarqan? Willakoqnin Elïastam Acabta parlapänampaq mandarqan.

Elïasqa kënömi Acabta nirqan: “Alläpa mana alli gobernanti kaptikim Israel nacionchö tamya kanqatsu”. Kima watapitapis masmi chakrakunachö imapis karqantsu, y alläpa mallaqëmi karqan. Tsëpitam Jehoväqa Acabman Elïasta yapë mandarqan. Peru Acabqa kënömi nirqan: “¡Qammi culpayoq kanki llapan israelïtakuna sufriyänampaq!”. Elïasnam kënö nirqan: “Israelïtakunaqa manam culpätsu sufrikäyan, sinöqa Baal santuta adoranqëkirëkurmi. Llapan israelïtakunata y Baal santupa willakoqninkunata Carmëlu jirkaman qayatsimuy. Tsëchömi rikäshun pï rasumpa Dios kanqanta”.

Llapanmi tsë jirkaman ëwayarqan, tsënam Elïasqa kënö nirqan: “Kananmi decidiyänëki. ¡Qamkunapaq Jehovä rasumpa Dios kaptinqa pëta adorayë! ¡Peru Baal santu diosnikikuna kaptinqa pëta adorayë! Tsëta musyanapaq: Baal santupa cuatrocientus cincuenta willakoqninkuna juk töruta pishtëkur yanta jananman churayätsun y diosninkunaman mañakuyätsun. Tsënöllam noqapis juk töruta pishtëkur yanta jananman churashaq y Jehovä Diosnïman mañakushaq. Y rasumpa kaq Diosqa ciëlupitam ninata urätsimunqa”. Y llapanmi acuerdu kayarqan.

Tsënam Baalpa willakoqninkuna töruta alistarir, “¡Teyta Baal, ninata mandëkallämuy!” nir entëru junaq qayakuyarqan. Peru Baalninkunaqa manam cäsurqantsu. Tsëmi Elïasqa pëkunata asipar kënö nirqan: “Punukashqatsuraq këkan cäsuyäshunëkipaq mas fuertipa qayakuyë”. Y tardiyanqanyaqmi Baalpa willakoqninkunaqa qayakur kayarqan, peru manam ni pï contestamurqantsu.

Elïasqa mallwa töruta pishtarir altarman churarkurmi atska yakuta winarqan. Nïkurmi kënö mañakurqan: “Teyta Jehovä, llapankuna musyayätsun qam rasumpa kaq Dios kanqëkita”. Tsënö mañakur ushariptinmi, jinan höra Jehoväqa ciëlupita ninata mandëkamurqan. Ninaqa llapantam usharirqan. Tsënam nunakunaqa, “¡Jehovämi rasumpa Diosqa!” niyarqan. Elïasnam kënö nirqan: “¡Baal santupa willakoqninkunata prësuyë! ¡Ama jukllëllapis qeshpir ëwakutsuntsu!”. Tsë junaqqa cuatrocientus cincuenta Baalpa willakoqninkunatam wanutsiyarqan.

Tsëpitanam lamar jananchö ichiklla pukutë këkaqta rikärir, Acabta Elïas kënö nirqan: “Fuerti tamyam shamuykan. Carrëtëkiwan jinan höra kutikuy”. Tsëllanam yana pukutë ciëluta tsaparirqan, vientuwan tamyam fuertipa qallëkurqan. Y Acabqa carrëtanwanmi jananta rurinta kutikurqan. Elïasnam Jehovä yanapaptin carrëtapitapis mas ras cörripa Jezreel markaman chärirqan. ¿Y tsëllachöku Elïas pasanqan problëmakuna usharirqan? Rikärishun.