Elïastaqa Jehovämi yanaparqan

Jezabelqa Baal santupa willakoqninkunata wanutsiyashqa kayanqanta musyarirmi alläpa cölerakurqan. Tsëmi juk willakoqta mandarqan Elïasta kënö ninampaq: “Baalpa willakoqninkunata wanutsinqëkinöllam qamtapis warë wanutsishqëki”. Tsënam Elïasqa alläpa mantsakar qeshpir ëwakurqan, y tsunyaq sitiuman chärirmi Jehoväman kënö mañakurqan: “Kallpäpis ushakärishqanam. Kanan höra juklla wanuykatsimë”. Y nïkurmi retäma chakinchö punukärirqan.

Peru punukashqa këkaptinmi juk angel yatëkur, “imallatapis mikurinëkipaq sharkamuy” nirqan. Y sharkurirmi, achachëkaq rumikuna jananchö tantata y juk järra yaku churarëkaqta rikärirqan. Tsëmi mikurir y upurir yapë punukärirqan. Tsënam angelqa yapë yatëkur kënö nirqan: “Karutaran ëwanëki, mikurinëkipaq shärimuy, sinöqa mallaqarmi ëwëta puëdinkitsu”. Tsëmi Elïasqa sharkur mikurqan y yakutapis upurqan, nïkurmi 40 junaq 40  paqas Horeb jirkayaq ëwarqan. Y juk machëmanmi punoq yëkurqan, tsëchö këkaptinmi Jehovä kënö tapurqan: “Elïas, ¿imatataq këchö ruranki?”. Elïasnam kënö nirqan: “Israelïtakunaqa manam acuerdu ruranqëkita cumpliyannatsu y altarnikikunatapis juchuratsirmi willakoqnikikunata wanutsiyashqa. Tsëmi wanutsiyämëta munayaptin qeshpir ëwakamurqö”.

Jehoväqa kënömi Elïasta nirqan: “Machëpita yarqurir shëkar quedakuy”. Tsënam fuertipa vienturqan, patsa feyupa kuyurqan y nina rawrarqan o lunyarqan. Tsëkuna pasariptinmi Elïasqa shumaqlla parlapäyanqanta wiyarqan. Tsëmi aqshunanwan cäranta tsapakurkur machë punkuman yarqamurqan. Tsënam Jehoväqa kënö tapurqan: “Elïas, ¿imatataq këchö ruranki?”. Elïasnam kënö nirqan: “Llapan willakoqnikikunatam wanutsiyashqa. Tsëmi wanutsiyämëta munayaptin qeshpir ëwakamurqö”. Peru Jehoväqa kënömi nirqan: “Manam japallëkitsu quedarqunki. Israelchöqa 7.000 nunakunaran adorayämaqkuna kan. Ëwar Eliseuta willë qampa rantiki willakoqnï kanampaq kaqta”. Tsënam Elïasqa jinan höra ëwar Jehovä ninqanta rurarqan. Cäsukoq kaptikiqa qamtapis Jehovä yanapashunkim. Kananqa rikärishun usya witsanchö ima pasakunqanta.