Jezabelqa castïgutam chaskirqan

Acabqa, Jezreel markachö këkaq wayimpa ventänampitam Nabot jutiyoq nunapa üvas chakranta rikapaq. Y tsë chakratam rantita munarqan. Peru Nabotqa manam rantikuyta munarqantsu, ¿imanirtan rantikuyta munaqtsu? Jehoväpa Leyninmi mandakoq unë kastankuna dejapuyanqan herenciata mana rantikuyänampaq. Acabqa manam respetarqantsu Nabot decidinqanta, alläpam cölerakurqan y manam cuartumpita yarquyta ni mikuytapis munarqantsu.

Acabpa warmin Jezabelqa mana alli warmin karqan. Pëqa kënömi nirqan: “Qamqa Israelchö gobernantim kanki, ama llakikuytsu, sharkur mikuy. Noqam jezreelïta Nabotpa chakrantaqa entregashqëki”. Tsëmi tsë markachö dirigentikunaman y mandakoqkunaman cartakunata kënö qellqarkur apatsirqan: “Teyta Diospa y gobernantipa contranmi parlashqa nir Nabot-ta tumpayë, y nïkurnin rumiwan wanutsiyë”. Tsënam tsë nunakunaqa Jezabel ninqannölla rurayarqan. Tsëpitanam Jezabelqa Acabta kënö nirqan: “Nabotqa wanushqanam këkan. Kananqa chakranta katsita puëdinkinam”.

Jezabelqa manam Nabotllatatsu wanutsirqan, sinöqa Jehoväta kuyaq mëtsikaq nunakunatam wanutsirqan. Jezabelqa santukunatam adoraq y imëka mana allikunatam ruraq. Peru Jehoväqa llapan ruranqantam rikëkarqan. Tsëqa, ¿imataraq Jezabelta rurarqan?

Acab wanunqampita juk tiempu pasarishqanchömi tsurin Jehoramna gobernar qallëkurqan. Y Jehoväqa Jehü jutiyoq nunatam mandarqan Jezabelta y familianta castiganampaq.

Jehüqa guërrapaq carrëtanwanmi Jezreel markaman Jezabelta asheq ëwarqan. Tsënam Jehoramqa guërrapaq carrëtanta alistarkur Jehüta parlapaq ëwarqan, y nänichö tinkurirmi Jehüta kënö tapurqan: “¿Amïgu karku shamuykanki?”. Peru Jehüqa kënömi nirqan: “¿Imanöraq amïgu kashwan mamäniki Jezabel imëka mana allikunata rurëkaptinqa?”. Tsënam Jehoramqa carrëtanta tumaratsir qeshpir qallëkurqan, peru Jehüqa wanoqpaqmi flëchëkurqan.

Nïkurmi Jehüqa Jezabel gobernanqan wayiman ëwarqan. Tsëta musyarirmi Jezabelqa nawinta yanaman pintarkur y aqtsanta shumaq adornarkur ventänapa qawarkamurqan. Y Jehü chäriptinqa mana allipam parlaparqan. Tsëmi Jehüqa Jezabelpa lädunchö këkaq sirwipakoqkunata “¡urëpa jitarpayämuy!” nirqan. Tsënam wanoqpaq jitarpayämurqan.

Tsëpitaqa Acabpa 70 wamrankunatam Jehüqa wanutsirqan, y Baalta adoraqkunata y adorayänampaq utilizäyanqankunatam ushakätsirqan. Këchö yachakurinqantsiknöpis Jehoväqa llapantam rikëkan, y mana allita ruraqkunataqa imë karpis castiganmi.