Nina cawallukuna y nina carrëtakuna

Siriapa reynin Ben-Hadadmi israelïtakunata atska kutichö atacarqan. Peru Diospa willakoqnin Eliseu tsëta willaptinmi Israelpa gobernantinqa imëpis qeshpir ëwakoq. Tsëmi Ben-Hadadqa Eliseuta prësutsita munarqan, y Dotan markachö këkanqanta musyarirmi soldädunkunata tsëman mandarqan.

Siria soldädukunaqa paqas höram Dotanman chäriyarqan. Y patsa waräriptinmi Eliseupa yanapaqninqa, tsë markapa entërunchö mëtsikaq soldädukuna këkäyaqta rikärirqan. Tsëmi alläpa mantsakar fuertipa kënö nirqan: “Eliseu, ¿imataraq kananqa rurashun?”. Eliseunam kënö nirqan: “Noqantsikwan këkaq soldädukunaqa pëkunapitapis masmi kayan”. Y Jehovä yanapaptinmi Eliseupa yanapaqninqa rikärirqan nina cawallunkunawan y nina carrëtankunawan jirkakuna jananchö këkaq mëtsikaq soldädukunata.

Siria soldädukuna tsariyänampaqna këkaptinmi Eliseuqa kënö mañakurqan: “Jehovä, llapankunata wiskuyäratsillë”. Tsëmi illaqpita juiciunkunata oqrariyarqan y manam musyayarqantsu mëchö këkäyanqanta. Tsënam Eliseuqa kënö nirqan: “Pantarmi juk markaman shayämurqunki. Noqam apayashqëki ashiyanqëki nunaman”. Tsënö nirirmi Samariaman pusharqan, Israelpa gobernantin këkanqanman.

Mëchö këkäyanqanta cuentata qokurirqa manam imanö këtapis puëdiyarqannatsu. Tsënam Israelpa gobernantinqa Eliseuta kënö tapurqan: “¿Wanuratsïku?”. Y Eliseuqa kënömi nirqan: “Ama wanutsitsu, tsëpa rantinqa pachankuna qararir ëwakuyänanta dejë”. Tsënam Israelpa gobernantinqa alli mikuratsir, “wayikikunata ëwakuyë” nirqan. Siria soldädukunaqa Eliseuta prësu apakuytam munayarqan, peru tsënö kaptimpis pëqa manam vengakurqantsu.