Jehoväqa pacienciawanmi Jonasta yanaparqan

Asiria nacionpa Nïnivi markanchö täraq nunakunaqa alläpa mana allikunata rurarmi kawakuyaq. Tsëmi Jehoväqa willakoqnin Jonasta mandarqan tsë nunakuna ushakäyänampaq kaqta willakunampaq. Peru Nïnivita ëwanampa rantinmi, Jonasqa Tarsis nacionman juk barcuwan ëwanampaq decidirqan.

Barcuwan karutana ëwëkäyaptinmi feyupa vientur y tamyar qallëkurqan. Tsëmi barcuchö trabajaqkunaqa alläpa mantsakar santunkunaman mañakuyarqan, y “¿imanirtaq kënö pasëkämantsik?” niyarqanmi. Tsënam Jonasqa kënö nirqan: “Noqapa culpämi. Jehoväta mana cäsukurmi ëwakuykä. Tamya pasarinampaq lamarman jitarkayämë”. Peru manam tsëta rurëta munayarqantsu, peru kutin kutin niptinnam, pallarkur jitarkuyarqan. Tsëran lamar calmakärirqan.

Jonasqa wanunampaq kaqtam pensarqan. Maslla hundikëkarmi Jehoväman mañakurqan, tsëmi Jehovä permitiptin jatun pescädu amurkurnin Jonasta entëruta pasarkatsirqan. Tsë pescädupa pachanchö këkarmi Jonasqa Jehoväman kënö mañakurqan: “Kanampitaqa llapan mandamanqëkitam cäsukushaq”. Kima junaq pasanqanchönam Teyta Jehoväqa jatun pescädupa pachampita lamar kuchunman Jonasta jitatsimurqan.

Tsënömi Jehoväqa Jonasta salvarqan. Y, ¿mananatsuraq Nïnivi markaman ëwanan karqan? Jehoväqa yapëmi ëwanampaq mandarqan, y tsë kaq kutichöqa cäsukurmi ëwarqan. Y chärirqa llapan nunakunatam kënö nirqan: “Cuarenta junaqllachönam Nïnivi marka ushakanqa”. Tsëta wiyarmi Nïnivi nunakunaqa cambiar qallëkuyarqan. Gobernantinkunam kënö nirqan: “Diosman rogakuyë y arrepentikuyë, tsëqa capazchi perdonëkamashwan”. Y arrepentikuyanqanta rikarmi Jehoväqa Nïnivi nunakunata ushakätsirqannatsu.

Nïnivi nunakunata Jehovä mana ushakätsinqanta rikarmi Jonasqa alläpa cölerakurqan. Jehoväqa pacienciawanmi Jonasta tratarqan y llakiparqanmi. Peru Jonasqa manam Nïnivi nunakunata llakiparqantsu. Tsëpa rantinmi tsë markapita yarqurir juk calabäzu plantapa jawanchö cölerashqa këkarqan. Tsënö tëkaptin tsë planta tsakiriptinmi pëqa masraq cölerakurqan. Peru Jehoväqa kënömi nirqan: “Qamqa Nïnivi nunakunapitapis masmi tsë plantata llakipanki. Noqaqa llakiparmi Nïnivi nunakunata ushakätsirqötsu”. Tsënö nirqa, ¿imatataq Jonasta yachatsita munarqan? Nïnivi nunakuna ima plantapitapis mas väleq kayanqantam.