Josïasqa Diospa Leyninkunatam respetarqan

Josïasqa öchu watayoq këkarmi Judäta gobernar qallarqan. Tsë witsanqa magiata rurar y santukunata adorarmi nunakuna kakuyaq. Y 16 watayoq këkarmi Josïasqa Jehoväta imanö adorana kanqanta musyëta munarqan. Tsëpitanam, 20 watayoq këkar santukunata y altarkunata entëru Judäpita ushakätsirqan. Y 26 watayoq këkarnam, Jehoväpa templunta altsatsinampaq imëkata alistarqan.

Mandakoq sacerdöti Hilquïasmi Diospa Leyninkunata rölluchö qellqarëkaqta templuchö tarirqan. Capazchi tsëqa kikin Moises qellqanqan röllu karqan. Tsëpitanam secretariu Safanta entregarqan, y Safannam gobernantita nirqan: “Sacerdöti Hilquïasmi kë rölluta entregamashqa”, tsënö niskirmi leyipurqan. Tsëchömi Josïasqa cuentata qokurqan unë kastankuna tsë mandamientukunata mana cäsukuyashqa kayanqanta. Tsëmi Hilquïasta kënö nirqan: “Jehovä Diosqa noqantsikwampis cölerashqam këkan. Kananqa ëwar Jehovä Diosta tapuyämuy imata ruranapaq kaqta”. Tsënam Jehoväqa Huldä jutiyoq willakoqnin warmita kënö nirqan: “Judä nunakunaqa dejarayämashqam. Tsëmi pëkunata castigashaq, peru manam Josïas gobernanti kanqan witsantsu, pëqa humildi nuna karmi tsë rölluchö ninqankunata cäsukushqa”.

Tsëpitanam gobernanti Josïasqa templuta ëwëkur Judä nunakunata qayatsirqan. Nïkurmi Jehoväpa Leyninkunata llapankuna wiyayänampaq leyirqan. Tsëmi Josïaswan Judä nunakunaqa llapan shonqunkunawan Jehoväta cäsukuyänampaq änikuyarqan.

Judä nunakunaqa atska watapam Pascua Fiestata rurashqatsu kayarqan. Peru Leychöqa llapan watakuna rurayänampaqmi mandakoq. Tsëmi Josïasqa Judä nunakunata kënö nirqan: “Jehovä Diospaq Pascua Fiestata rurashun”. Y tsëpitanam mëtsika qarëkunata alistayänampaq y templuchö cantaqkuna kanampaq mandakurqan. Tsënömi Pascua Fiestata celebrayarqan, y tsëpitanam Levadürannaq Tantata Mikuna Fiestata siëti junaqpa rurayarqan. Y tsënö Pascua Fiestataqa Samuel kawanqan witsampitam rurashqatsu kayarqan. Josïasqa Diospa Leyninkunatam alläpa respetaq. ¿Y qamtaqa? ¿Gustashunkiku Jehoväpita yachakuy?