Leonkunamanmi Danielta jitarkuyarqan

Tsëpitaqa Darïu jutiyoq medu nunam Babiloniata gobernarqan. Pëqa Daniel llapampitapis mas yachaq y jukläya kanqantam cuentata qokurqan, tsëmi mas cargukunaman churarqan. Peru Danielpa wakin mandakoq mayinkunaqa chikiparmi wanutsita munayarqan. Tsëmi Jehoväman cada junaq kima kuti mañakunqanta musyarir Darïuta kënö niyarqan: “Teytë Darïu, juk leyta qellqar firmëkullë llapan nunakuna qamllaman mañakayämunampaq. Y tsë leyta mana cäsukoq kaqtaqa, leonkuna këkanqan jatun uchkuman jitarkuyänampaq”. Darïuqa allitanömi tsëta rikarqan, tsëmi tsë leyta qellqar firmarqan.

Danielqa tsëta musyarirllam wayinman ëwarqan, y chärirmi ventänanta kichëkur y qonqurikuykur Jehoväman mañakurqan. Peru chikipaqnin nunakunaqa illaqpita yëkuykurmi mañakuykaqta tariyarqan. Tsëmi gobernantiman ëwëkur kënö willayarqan: “Danielqa manam ni qamta ni firmanqëki leyta cäsukuntsu. Pëqa cada junaqmi kima kuti Diosninman mañakun”. Darïuqa Danielta amïguntanömi rikaq y wanutsiyänantaqa manam munarqantsu, tsëmi imëkanöpa salvëta munarqan. Peru gobernanti karpis mandakunqan leytaqa manam cambiëta puëdeqnatsu. Tsëmi Danielta llakipëkarpis leonkuna këkanqan uchkuman jitarkuyänampaq mandakurqan.

Darïuqa Danielpaq yarpachakurmi tsë paqasqa punuytapis puëdirqantsu. Patsa waräriptinnam leonkuna këkanqan uchkuman cörripa ëwëkur, kënö nir qayarqan: “¡Daniel! ¿Imëpis sirwinqëki Diosniki leonkunapita salvashurqunkiku?”.

Tsënam Danielqa kënö nirqan: “Teyta Diosnïmi angelninta mandamushqa leonkunapa shiminta tsaparkunampaq, tsëmi imanayämashqatsu”. Gobernanti Darïuqa alläpa kushikurmi, leonkuna këkanqan jatun uchkupita Danielta sutayämunampaq mandakurqan. Danieltaqa leonkuna manam ni ichikllapis ashpishqatsu kayänaq. Tsënam gobernantiqa mandakurqan, “Danielta acusaq nunakunata leonkuna këkanqan jatun uchkuman jitarkuyänampaq”. Jitarkuyaptinllanam leonkunaqa mikukurkuyarqan.

Tsëpitanam Darïuqa mandädunchö këkaq llapan nunakunata kënö nirqan: “Danielpa Diosnintam respetayänëki. Pëmi Danielta leonkunapita salvashqa”.

¿Qamqa Danielnöku llapan junaqkuna Jehoväman mañakunki?