Marka mayinkunatam Esterqa salvarqan

Persia nacionchö Süsa niyanqan markachömi, Ester jutiyoq judïa shipash täraq. Pëpa familianqa Jerusalenpitam kayarqan, peru gobernanti Nabucodonosormi Babiloniaman apashqa karqan. Estertaqa prïmun Mardoqueum wamrantanö wätakurqan, pëqa Persiata gobernaq Asuërupa sirweqninmi karqan.

Gobernanti Asuëruqa jukna reina kanantam munarqan. Tsëmi sirweqninkunaqa tsë nacionchö mas shumaqllan shipashkunata pë kaqman apayarqan, y Estertapis apayarqanmi. Y Estertam reina kanampaq akrarqan. Peru Esterqa prïmun Mardoqueu nishqa kaptinmi, pitapis willarqantsu mëpita kanqanta ni kastankuna pikuna kayanqanta.

Haman jutiyoq alläpa orgullösu nunam llapan dirigentikunapa mandaqnin karqan, pëqa pïmëpis puntanman qonqurikunantam munaq. Peru Mardoqueuqa Hamanpa puntanman manam qonqurikoqtsu. Tsëmi Hamanqa alläpa cölerakur wanuratsita munarqan. Mardoqueu judïu kanqanta musyarirmi Hamanqa llapan judïukunata imanö wanutsinampaq kaqman pensarqan, y gobernantitam kënö nirqan: “Judïukunaqa manam confiakuypaqtsu kayan. Llapankunata wanutsishun”. Tsënam gobernantiqa kënö nirqan: “Pëkunawan qampaq mas alli kanqanta rurë”. Y juk leyta ruranampaqmi permitirqan, tsë leychömi mandakurqan adar killachö trëci kaq junaq llapan judïukunata wanutsiyänampaq. Peru Jehoväqa llapantam rikëkarqan.

Esterqa manam tsëta musyarqantsu, tsëmi Mardoqueuqa tsë leypa juk copianta apatsirqan, y “gobernantiwanmi parlanëki” nirqanmi. Tsëmi Esterqa kënö nirqan: “Mana qayëkätsiptin gobernaqpa puntanman yëkoq kaqtaqa wanutsiyanmi. Y noqataqa 30 junaqnam gobernaq qayatsimashqatsu. Tsënö kaptimpis ëwashaqmi. Makinchö katsinqan örupita tukrunta noqaman kamämuptinqa manam wanutsiyämanqatsu, peru mana kamämuptinqa wanutsiyämanqam”.

Esterqa gobernaqpa wayin frentin patiumanmi yëkurqan, y rikärirmi gobernantiqa makinchö katsinqan örupita tukrunta pëman kamarqan. Ruriyaq Ester yëkuriptinmi, kënö tapurqan: “Reina Ester, ¿imatan pasashqa?”. Tsënam kënö contestarqan: “Ruratsinqä mikuyta mikoq Hamanwan shayämunëkitam munä”. Y mikuriyaptinnam Esterqa waränin junaqpis yapë mikoq kutiyänampaq invitarqan. Y tsë kutichöpis gobernantiqa kënömi tapurqan: “Reina Ester, ¿qampaq imata ruramunätataq munanki?”. Tsënam Esterqa nirqan: “Noqata y marka mayïkunatam wanutsiyämëta munayan. Vïdata y marka mayïkunapa vïdanta salvëkunëkipaqmi rogakullaq”. Tsënam gobernaq Asuëruqa kënö tapurqan: “¿Pitaq tsëta rurëta munëkan?”. Esternam nirqan:“Kë mana väleq Hamanmi”. Tsënam Asuëruqa alläpa cölerakurnin jinan höra mandarqan Hamanta wanutsiyänampaq.

Peru Haman patsätsinqan leytaqa manam ni pipis, ni kikin gobernaqpis ushakätsita puëdirqantsu. Tsëmi gobernaqqa dirigentikunapa mandaqnin kanampaq Mardoqueuta churarqan, y juk mushoq leyta ruratsinampaqmi permitirqan. Tsë leychömi mandakurqan chikeqninkunapita judïukuna defendikuyänampaq. Y 13 de adar junaqmi chikeqninkunata venciyarqan. Tsëpitam judïukunaqa tsë junaqta wata wata celebrayaq.