Esdrasqa Diospa Leyninkunatam yachatsikurqan

Israelïtakuna Jerusalenman kutiyanqampitaqa 70 watanam pasashqa karqan. Peru wakinqa Persia nacionpa markankunallachöraqmi täräyarqan. Jehoväpa Leyninkunata yachatsikoq sacerdöti Esdraspis tsë markakunachömi tärarqan. Peru Jerusalenchö këkaqkuna Diospa Leyninkunata mana cäsukuyanqanta wiyarirmi Esdrasqa pëkunata yanapanampaq ëwëta munarqan. Tsëmi Persiapa gobernaqnin Artajerjesqa kënö nirqan: “Qamqa Dios yanapashuptikim Leyninkunata alli yachatsikunki. Tsënö këkarqa munaq kaqkunata pusharkur Jerusalenta ëwë”. Tsënam Esdrasqa Jerusalenman kutita munaqkunata juntarqan, y llapankunam Jehovä cuidëkunampaq mañakurir viajayarqan.

Yarquyanqampita chusku killa pasarinqanchömi Jerusalenman chäyarqan. Y dirigentikunam Esdrasta kënö niyarqan: “Israelïtakunaqa Jehoväta mana cäsukurmi santukunata adoraq warmikunawan casakuyashqa”. ¿Y imatataq Esdrasqa rurarqan? Llapan israelïtakunapa puntanchö qonqurikuykurmi kënö mañakurqan: “Jehovä, qamqa imëkatam noqakunarëkur rurarqunki, peru noqakunaqa contrëkim jutsallakuyarqö”. Tsëmi llapankuna arrepentikuyarqan, peru mana alli rurëkunataqa manam llapantatsu dejayarqan. Tsëmi Esdrasqa respetashqa nunakunata y juezkunata mandarqan tsë asuntuta shumaq rikäyänampaq. Kima o kimsa killachömi Jehoväta adorëta mana munaq kaqkunata qarquyarqan.

Tsëpita 12 wata pasariptinmi Jerusalenpa perqankunata yapë rurar ushayarqan. Esdrasqa llapan israelïtakunatam pläzaman qayatsirqan Diospa Leyninkunata leyipunampaq. Y Leykuna qellqarëkanqan rölluta kichariptinmi llapankuna sharkuriyarqan. Tsënam Esdrasqa Jehoväta alabarqan, y israelïtakunaqa acuerdu karmi makinkunata pallariyarqan. Tsëpitanam Esdrasqa Leykunata leyirqan y entienditsikurqan, y llapankunam shumaq wiyakuyarqan. Jehoväta kutin kutin dejayanqanta yarparkurmi llapankuna waqayarqan. Waränin junaqpis Esdrasqa Leykunata leyirmi sïguirqan. Tsëmi israelïtakunaqa cuentata qokuriyarqan Ramäda Fiestata celebrayänanta Jehovä munanqanta. Tsëmi jinan höra alistapakur qallëkuyarqan.

Israelïtakunaqa siëti junaqpam tsë fiestata kushishqa celebrayarqan, y cosëchakuna alli kanqampitam Jehoväta agradecikuyarqan. Tsë fiestataqa Josuë kawanqan witsampitam rurashqatsu kayarqan. Fiesta pasariptinmi llapankuna juntakärir kënö mañakuyarqan: “Jehovä, qammi esclävu kayanqäpita librayämarqëki. Tsunyaq jirkachö mikuyninkuna qarayämarqëki y kë shumaq markamanmi pushayämarqëki. Peru noqakunaqa manam cäsuyarqoqtsu. Y willakoqnikikunata mandamuptikipis manam wiyakuyarqötsu. Peru qamqa pacienciawanmi tratayämarqunki. Manam qonqarqunkitsu Abrahanta äninqëkita. Tsëmi kananqa qamta wiyakuyänaqpaq äniyaq”. Tsë änikuyanqantam israelïtakunaqa qellqayarqan, y dirigentikuna, levïtakuna y sacerdötikunam juk sëlluta churayarqan.