Jerusalenpa perqankuna

Jerusalenpa perqankunata altsayanqan witsampaq yapë parlarishun. Tsë witsanqa Persia nacionpa Süsa markanchömi Nehemïas jutiyoq israelïta nuna täraq. Pëqa gobernanti Artajerjespa sirweqninmi karqan. Juk kutim, Judäpita wawqin chärir kënö nirqan: “Jerusalenman kuteq israelïtakunaqa peligruchömi këkäyan. Babilonia soldädukuna ushakätsiyanqan perqakunata y punkukunatapis manam altsayanraqtsu”. Tsënam Nehemïasqa llakishqa sientikurqan. Y yanapakuyta munarmi Jerusalenman ëwananta gobernanti dejanampaq Diosman mañakurqan.

Tiempu pasariptinnam gobernantiqa Nehemïasta llakishqata rikar kënö nirqan: “¿Imatan pasashunki? Llakishqam këkanki”. Tsënam Nehemïasqa kënö nirqan: “Unë kastäkuna pamparäyanqan marka y punkunkuna ushakashqa kaptinmi llakishqa këkä”. Tsëmi gobernaqqa kënö tapurqan: “¿Imatataq rurëta munëkanki?”. Nehemïasqa jinan höram shonqunllachö Diosman mañakurirqan. Tsëpitam kënö nirqan: “Unë kastäkuna pamparäyanqan markata yapë sharkatsinäpaq Judäman mandëkamë”. Tsëmi gobernaq Artajerjesqa “ëwëlla” nirqan. Y viajaptin nänichö imapis mana pasanampaqmi llapan necesitanqanta entregarqan. Tsëpitanam Judächö gobernador kanampaq churarqan, y Jerusalenpa punkunkunata ruratsinampaqpis qerutam entregarqan.

Nehemïasqa Jerusalenman chärirllam perqakunata rikaq ëwarqan. Y sacerdötikunata y gobernadorkunatam kënö nirqan: “Llapanmi mana alli këkan. Trabajaqmi churakänantsik”. Llapan israelïtakunam acuerdu kayarqan, y trabajarmi qallëkuyarqan.

Tsënam israelïtakunata chikeqkunaqa kënö nir burlakuyarqan: “Tsë rurëkäyanqëki murällataqa atoqllapis juchuratsinmanmi”. Peru israelïtakunaqa manam cäsuyarqantsu y trabajarmi sïguiyarqan. Murällataqa jatunta y anchutam rurayarqan.

Tsëmi Judïukunata chikeqninkuna Jerusalenta imëkanöpa ushakätsita munayarqan, y pëkunaqa alläpam mantsakäyarqan. Peru Nehemïasqa kënömi nirqan: “Ama mantsakäyëtsu. Jehovämi noqantsikwan këkan”. Tsëpitanam trabajaqkunata cuidayänampaq guardiakunata churarqan. Tsëmi chikeqninkunaqa ni imata rurëtapis puëdiyarqannatsu.

52 junaqllachömi murällata y punkukunata rurar ushariyarqan. Y celebrayänampaqmi Nehemïasqa levïtakunata Jerusalenman pusharqan. Tsëchö cantayänampaqmi ishkë grüpuman rakirqan. Juk kaq grüputam Esdras pusharqan, y juknintanam Nehemïas. Y Pukyu Punku niyanqanchö këkaq escalërakunapam witsäyarqan. Tsëpitanam ishkan lädupa ëwaq perqa janampa cada grüpu ëwayarqan markapa entërumpa. Trompëtakunata, platïllukunata y arpakunata tocar, y Jehoväpaq cantarmi ëwayarqan. Y templuchömi llapankuna tinkuyarqan. Ollqukuna, warmikuna y wamrakunam pishtashqa qarëta Jehoväpaq apayarqan y fiestatam rurayarqan. Kushikuypita büllayanqanqa karuyaqmi wiyakarqan.