Elisabetqa qeshyaqmi tikrarqan

Sacerdöti Zacarïaswan warmin Elisabetqa Jerusalenpa amänun markachömi täräyaq. Jerusalenpa perqanta yapë sharkatsiyanqampitaqa 400 watapitapis masnam pasashqa karqan. Peru Elisabet qolloq kaptin y ishkampis edäna kayaptinmi, wamrankuna karqantsu. Juk kutim sacerdötikuna imëpis rurayanqannö, Teyta Jehoväpa templunman yëkurqan inciensuta rupatsinampaq. Tsënam derëcha lädunchö Jehoväpa angelnin shëkar yuripurqan. Tsëta rikëkurmi Zacarïasqa alläpa mantsakar imanö këtapis puëdirqantsu. Tsënam angelqa kënö nirqan: “Zacarïas, ama mantsakëtsu. Rogakunqëkita Teyta Dios wiyashqa kaptinmi warmiki Elisabetpa ollqu wamran yurinqa, y Juan nirmi jutin churanki”. Zacarïasqa kënömi nirqan: “¿Imanötan següru käman tsënö kanampaq kaqta? Noqaqa awkinnam kä, y warmïpis chakwannam”. Tsënam Gabrielqa kënö nirqan: “Pëmi qamwan parlaq y kë alli noticiakunata musyatsinaqpaq mandamashqa, peru ninqaqkunata mana creinqëkipitam tsëkuna pasakunqan junaqyaq müdu tikranki, y manam parlëta puëdinkitsu”.

Tsëyaqnam nunakunaqa Zacarïasta shuyar waqtachö këkäyarqan, y templupita yarqamuyta alläpa demoraptinmi yarpachakuyarqan. Peru Zacarïas yarqaskamurqa manam parlëta puëdirqantsu, müduyashqa karmi sëñasllapana pëkunata parlaparqan. Tsëmi cuentata qokuriyarqan Diospa willakuyninta chaskinqanta.

Tsëpita juk ishkë junaqllatanam Elisabetqa angel ninqannölla qeshyaq tikrarirqan, y tsëpitanam Elisabetpa höran chäriptin ollqu wamran yurirqan. Tsëmi Elisabetpa familiankuna y reqishqankuna llullu rikaq ëwayarqan, y alläpam kushikuyarqan. Elisabetqa “jutinqa Juanmi kanqa” nirqanmi. Tsënam pëkunaqa niyarqan: “Peru manataq mëqan kastëkipis tsënö jutiyoq kantsu”. Peru Zacarïasqa, “Juanmi jutin kanqa” nirmi, juk ichikllan tablaman qellqarqan. Tsë höram Zacarïasqa yapë parlarnin Teyta Diosta alabar qallëkurqan. Entëru Judëa provinciachömi tsë llapan pasanqampaq parlar qallëkuyarqan, y kënö nirmi shonqunkunachö pensayarqan: “¿Imaraq kë wamra kanqa?”.

Tsënam Zacarïasqa santu espïritu yanapaptin kënö nir willakurqan: “Israelpa Diosnin Jehovä alabashqa katsun. Pëqa llakiparmi sirweqninkunata salvashqa y noqantsikrëkurmi sirweqnin Davidpa familiampita puëdeq salvakoq yurinanta permitishqa”.

Tsë tiempum Elisabetpa kastan Marïapis juk mana creipaqnö noticiata chaskirqan. Tsëtaqa qateqnin kaqchömi yachakushun.