Angel Gabrielmi Marïata watukarqan

Galilëa provinciapa Nazaret markanchömi Marïa jutiyoq shipash täkurqan, y Elisabetpa kastanmi karqan. Marïaqa Josë jutiyoq carpintëru nunawanmi casakunampaq comprometikushqa këkarqan. Elisabet seis killana qeshyaq këkaptinmi, Marïata angel Gabriel yuripurir kënö nirqan: “Yamëllaku, Diospa rikëninchö alläpa alli këkaq warmi, Jehovämi qamwan këkan”. Marïaqa manam entiendirqantsu imanir tsënö ninqanta, tsënam Gabrielqa kënö nir entienditsirqan: “Rikë, qeshyaqmi tikranki, ollqu wamrëkim yurinqa y Jesus nirmi jutin churanëki. Pëqa Jacobpa kastankunatam imëyaqpis gobernanqa, y Gobiernunqa manam imëpis ushakanqatsu”.

Peru Marïaqa kënö nirmi angelta tapurqan: “¿Imanötan tsëqa pasanqa pï ollquwampis mana kashqa këkaptïqa?”. Gabrielnam kënö nirqan: “Santu espïritum qamman shamunqa, y Llapanta Gobernaq Poderösu Diospa poderninmi tsaparkushunki. Rikë, qolloq niyanqan kastëki Elisabetpis qeshyaqmi këkan”. Tsënö niptinnam Marïaqa nirqan: “¡Këchömi Teyta Jehoväpa sirweqnin këkan! Qam ninqëkinölla noqawan pasatsun”.

Tsëpita ichik tiempullatanam Marïaqa alistapakurkur jirkachö këkaq Judäpa juk markanman ëwarqan. Chärir saludanqanta Elisabet wiyariptinllam, pachanchö këkaq wamraqa kuyuskirqan. Y santu espïritu yanapaptinmi Elisabetqa fuertipa kënö nirqan: “¡Qamqa llapan warmikunapitapis mas bendicishqam kanki, y qampita yureqpis bendicishqam kanqa! ¿Pitan noqallä kä Señornïpa mamänin noqaman shamunampaq?”. Marïanam kënö nirqan: “Teyta Jehovätam alabä, salvamaqnï Diosrëkurmi shonqü alläpa kushikun”. Elisabetwan kima killanö juntu karirmi Marïaqa wayinta kutikurqan.

Josëqa Marïa qeshyaq këkanqanta musyarirmi munarqannatsu pëwan casakuyta. Peru tsëkunaman pensar këkaptinnam, Teyta Jehoväpa angelnin suëñuyninchö yuripur kënö nirqan: “Warmiki Marïata wayikiman apëta ama mantsëtsu, pëqa santu espïritupa poderninwanmi qeshyaq tikrashqa”. Tsëmi Josëqa Marïawan casakurir wayinta apakurqan.