Jesus yurinqantam angelkuna willakuyarqan

Röma nacionta gobernaq Cësar Augustum judïukunata mandarqan markankunaman inscribikoq kutiyänampaq. Josëpa markanqa Belenmi karqan, tsëmi Marïawan ishkan tsëman viajayarqan. Y Marïapa wamranqa yurinampaqnam këkarqan.

Belenman chärirqa posädata mana tarirmi animalkuna punuyänan wayillachö quedakuyarqan, y tsëchömi Jesus yurirqan. Marïaqa vendanö tëlakunawan wankurkurmi animalkunata qarayänanllaman punuykatsirqan.

Tsë kinrë sitiukunachömi paqaspa üshankunata täpar mitsikoqkuna këkäyarqan. Y tsënam, Teyta Jehoväpa angelnin puntankunachö illaqpita yurirkuptin, Jehoväpa podernin entëru lädunkunachö chipapëkurqan. Y pëkunaqa alläpam mantsakäyarqan. Peru angelqa kënömi nirqan: “Ama mantsakäyëtsu. Kanan junaqmi salvayäshoqniki Señor Cristu Davidpa markanchö yurishqa”. Tsëpitanam, tsë angelpa lädunman mëtsikaq angelkuna illaqpita yurirkur Teyta Diosta alabar kënö niyarqan: “Ciëluchö Teyta Dios alabashqa katsun, y patsachö pëpa rikëninchö alli këkaqkuna yamë kayätsun”. Tsënö nirirmi ciëluman kutikuyarqan. ¿Y imatataq mitsikoqkunaqa rurayarqan?

Tsë mitsikoqkunaqa kënömi ninakuyarqan: “Imanö kaptimpis, aku kanan höra Belenta ëwashun”. Y tsë höra ëwarmi Marïata, Josëta y animalkunata qarayänanchö punuykaq llulluta tariyarqan.

Tsë mitsikoqkuna willakuyanqanta wiyaqkunaqa alläpam espantakuyarqan. Marïaqa llapan niyanqantam yarpararqan. Tsënam mitsikoqkunaqa, llapan rikäyanqan y wiyayanqan angel willanqannölla kaptin, Teyta Diosta agradecikur y alabar kutikuyarqan.