Diospa Akrashqan chämunampaq kaqtam Juanqa willakurqan

Juanqa Zacarïaspa y Elisabetpa wamranmi karqan. Pëtaqa Jehovämi akrarqan willakoqnin kanampaq, y Diospa Akrashqan chänampaqna kaqta willakunampaqmi mandarqan. Peru pëqa manam markakunachötsu ni Diosta adorayänan wayikunachötsu yachatsikoq, sinöqa Judëa provinciapa tsunyaq sitiunkunachömi. Jerusalenpita, entëru Judëa provinciapita y Jordan mayu kuchunchö llapan markakunapitam pëman ëwayaq. Juanqa, Diosta kushitsita munarqa mana alli rurëkunata dejayë nirmi nunakunata yachatseq. Tsëmi jutsankunapita mëtsikaq arrepentikuyarqan, y Jordan mayuchömi bautizakuyarqan.

Juanpa röpanqa camëllupa millwampitam karqan, y wachakannam qarapita karqan. Chukllushkunata y jirka abëjapa mielnintam mikoq. Nunakunaqa pï kanqantam musyëta munayaq, y orgullösu fariseukuna y saduceukunapis rikaqmi ëwayaq. Tsëmi Juanqa kënö nirqan: “Arrepentikuyänëkim y cambiayänëkim. Qamkunaqa ‘Abrahanpa kastankunam kayä’ nirmi alli tukuyanki, peru tsëqa manam Diospa tsurinkuna kayanqëkitatsu rikätsikun”.

Tsëchö mëtsikaq nunakunam Juanta kënö nir tapuyaq: “¿Imatataq rurayänä Diosta kushitsiyänäpaq?”. Tsënam pëqa kënö nirqan: “Ishkë röpëkikuna kaptinqa, mana kapoq kaqta jukninta qarëkuyë”. ¿Y imanirtan tsënöqa nirqan? Diosta kushitsita munarqa nuna mayinkunata kuyayänan mas alli kanqanta musyayänampaqmi.

Impuestu cobrakoqkunatapis kënömi nirqan: “Dispunishqa impuestupita mastaqa ama pitapis cobrayëtsu”. Y soldädukunatanam kënö nirqan: “Ama pipa imantapis amälas apakuyëtsu, y ama pitapis mana kaqpita tumpayëtsu”.

Sacerdötikunapis y levïtakunapis ëwayarqanmi Juanta rikaqqa y kënömi niyarqan: “Llapan nunakunam pï kanqëkita musyëta munayan”. Tsënam Juanqa kënö nirqan: “Diospa willakoqnin Isaïas ninqannömi noqaqa Jehoväpaq derëchu nänita rurayë nirnin, tsunyaq sitiuchö fuertipa willakoq kä”.

Nunakunaqa kushishqam Juan yachatsikunqanta wiyakuyaq, y “¿pëtsuraq shamoqpaq kaq Cristu?” nirmi pensayarqan. Tsëmi Juanqa kënö nirqan: “Noqaqa yakuchömi bautizayaq, peru qepäta shamoqqa noqapitapis mas puëdeqmi, y noqalläqa manam llanqinkunapa watunllatapis paskapuyta puëdïtsu. Pëqa santu espïrituwan y ninawanmi bautizayäshunki”.