Samariapita warmitam Jesus parlaparqan

Pascua Fiesta pasarinqampita juk tiemputam Jesuswan qateqninkuna Galilëata kutiyarqan. Y Samariapa pasëkarmi Sicar markapa amänunchö jamariyarqan, tsëchömi Jacob ruratsinqan pözu këkarqan. Y qateqninkuna mikuy ranteq ëwayanqanyaqmi Jesusqa tsë pözu kaqchö jamapar quedakurqan.

Tsëmannam Samariapita warmi yaku jipeq charqan, tsënam Jesusqa kënö nirqan: “Upurkunäpaq yakü qarëkamë”. Samariapita warmiqa kënömi nirqan: “Judïu këkarqa, ¿imanöpatan Samariapita këkaptï yakuta mañakamanki?”. Tsënöqa nirqan, judïukuna Samariapita nunakunawan imëpis mana juntakäyaptinmi. Tsënam Jesusqa kënö nirqan: “Pï kanqäta musyarqa, qammi yakuta mañakamankiman karqan, y kawatsikoq yakutam qaräman karqan”. Tsënö niptinnam, tsë warmiqa kënö nirqan: “Teytallë, ¿ima nimëtataq munanki? Manataq imëkipis kantsu yakuta jipinëkipaq”. Jesusnam kënö nirqan: “Noqa qaranqä yakuta upoqqa, manam yapëqa yakunanqatsu”. Tsënam tsë warmiqa nirqan, “tsë yakuta qarëkamë teytë”.

Tsëpitanam Jesusqa kënö nirqan: “Ëwar qowëkita o runëkita qayamuy”. Tsënam tsë warmi nirqan, “noqapaqa manam qowä o runä kantsu”. Y Jesusqa kënömi nirqan: “Rasuntam ninki qampaqa qowëki o runëki manam kantsu, qamqa pitsqa qowayoqmi o runayoqmi karqunki, y kanan qamwan këkaqqa manam qowëkitsu”. Tsënam tsë warmiqa kënö nirqan: “Teytë, Diospa willakoqnin kanqëkitam cuentata qokü. Unë kastäkunaqa kë jirkachömi Diosta adorayarqan, peru qamkunaqa Jerusalenchö adoranapaq kaqtam niyanki. Noqaqa musyämi Cristu niyanqan Diospa Akrashqan shamunampaq kaqta, pë chämurmi llapanta cläru willayämanqa”. Tsënam Jesusqa kënö nirqan: “Noqam Diospa Akrashqan Cristu kä”. Y tsëtaqa manam pitapis Jesus willashqaraqtsu karqan.

Tsënam tsë warmiqa yakupaq cantarunta dejëkur, markaman ëwar nunakunata kënö nirqan: “Shamur llapan ruranqäta nimaq nunata rikäyë. ¿Capaz pë Cristu kanman?”. Tsënam nunakunaqa markapita yarqur pëta rikaq ëwayarqan.

Tsënam Samariapita nunakunaqa markankunachö quedakunampaq niyarqan. Y ishkë junaqmi Jesusqa tsëchö quedakurqan pëkunata yachatsir, tsëmi pëman creikuyarqan. Y tsë warmitam kënö niyarqan: “Kë nuna ninqankunaqa clärum rikätsikun nunakunapa salvaqnin kanqanta”.