12 apostolninkunatam Jesusqa akrarqan

Jesusqa juk wata pullannönam yachatsikur purirqan. Peru pëwan juntu trabajayänampaq kaqkunata y ciëlupa kutikuptin qateqninkunata cuidayänampaq kaqkunatam akranan karqan. Tsëta decidinampaqqa alliran pensanan karqan. Y Jehovä yanapanatam wanarqan. Tsëmi juk jirkaman japallan witsarqan y entëru paqasmi Teyta Diosman mañakurqan. Patsa waräriptinnam qateqninkunata qayëkatsir döcita akrarqan, y pëkunatam apostolkuna nir qayarqan. ¿Musyankiku jutinkunata? Jutinkunaqa karqan: Pëdru, Andres, Santiägu, Juan, Felïpi, Bartolomë, Tomas, Mateu, Alfeupa tsurin Santiägu, Tadeu, Simon y Jüdas Iscariötim.

Tsë 12 apostolninkunam mëtsëpa Jesuswan viajayaq. Pëkunatam imanö yachatsikuyänampaq kaqta Jesusqa yachatsirqan, nïkurmi japallankunata mandarqan. Jehoväqa nunakunapita demoniukunata qarquyänampaq y qeshyëkaqkunata alliyätsiyänampaqmi pëkunata poderninwan yanaparqan.

Jesusqa llapan apostolninkunawanmi alli amïgu karqan, y pëkunamanmi confiakoq. Y fariseukuna imatapis mana yachaq y lluta nunakunatanö rikäyaptimpis, Jesusqa apostolninkunata alläpam valoraq. Tsëmi cargunkunata shumaq cumpliyänampaq yachatsirqan. Y pëkunaqa Jesuspa lädunchömi imëpis këkäyarqan. Awmi, manaraq wanutsiyaptin y kawariramuptimpis pëkunaqa lädunchömi këkäyarqan. Cäsi llapanmi Jesusnöpis Galilëapita kayaq, y wakinqa warmiyoqmi kayarqan.

Apostolkunaqa jutsa ruraq karmi imallachöpis pantariyaq. Höraqa manaraq shumaq pensarmi imatapis parlariyaq, y höranam, mana allita decidiyaq. Y hörataqa rasllam pacienciankuna ushakäreq. Y mëqan mas alli kanqampaqmi discutiyaq. Tsënö karpis alli nunakunam kayaq, y Jehovätam kuyayaq. Jesus ciëluta kutiriptinqa pëkunanam llapan creikoqkunata yanapayänan karqan.