Juk jirkachömi Jesusqa yachatsikurqan

Apostolninkuna kayänampaqmi Jesusqa 12 qateqninkunata akrarqan. Tsëpitanam jirkapita uräramur atska nunakuna këkäyanqanman ëwarqan. Tsëchöqa Galilëapita, Judëapita, Tïrupita, Sidonpita, Siriapita y Jordan mayu kinrëpita nunakunam këkäyarqan. Qeshyëkaqkunata y demoniukuna sufritsinqan nunakunatam Jesusman apayarqan, y llapankunatam alliyätsirqan. Y jirkäman jamëkurmi nunakunata yachatsir qallëkurqan. Tsëchömi nirqan, Jehoväwan amïgu kanapaqqa, Jehoväta kuyanqantsik y dirigimänantsikta permitinqantsik yanapamanqantsikta. Peru Jehoväta kuyanqantsiktaqa rikätsikuntsik nuna mayintsikta kuyar, chikimaqnintsikkunata alli tratar y alli kaqta imëpis rurarmi.

Jesusqa kënömi nirqan: “Manam amïguykikunallatatsu kuyayänëki, sinöqa chikiyäshoqnikikunatapis kuyayänëkim y pëkunatam alli tratayänëki. Piwampis ofendinakushqa karqa rasmi perdonta mañakuyänëki. Y alli tratayäshunëkita munayanqëkinöllam pitapis tratayänëki”.

Imëkayoq këpaq y qellë asuntupaqpis Jesusqa shumaqmi consejakurqan. Kënömi nirqan: “Jehoväwan amïgu këqa atska qellëyoq këpitapis mas väleqmi. Qellënikitaqa pipis suwarinmanmi, peru Jehoväwan amïgu kanqëkitaqa manam. Tsëmi yarpachakunëkitsu imata mikunëkipaq o upunëkipaq o vistikunëkipaq kaqman. Pishqukunata rikäyë, mikuyninkunaqa manam imëpis faltantsu, pëkunataqa Jehovämi cuidan. Imëkapaq yarpachakurpis manam mas tiempuqa kawëta puëdinkitsu. Yarpë: Jehoväqa musyanmi imakunata wananqëkita”.

Jesusqa alläpa shumaqmi yachatsikurqan, pë yachatsinqantaqa manam ni mandakoq religiösukunapis nunakunata yachatsiyashqatsu kayarqan. ¿Imanirtan Jesusqa alläpa shumaq yachatsikoq? Jehovä yachatsinqanllata yachatsikurmi.