Säbadu junaqmi juk qeshyëkaq nunata alliyätsirqan

Fariseukunaqa Jesusta alläpam chikiyaq, y wanutsita munarmi imallapitapis acusayänampaq llapan ruranqanta rikarëkäyaq. Tsëmi kënö niyaq: “Säbadu junaqtaqa respetanantsikmi. Jesusqa manam tsë junaqchö pitapis alliyätsinantsu”. Peru Jesusqa juk säbadu junaqmi, juk wisku nuna cällichö limushnata mañakuykaqta rikärir, qateqninkunata kënö nirqan: “Rikäyë kë nunata Diospa podernin imanö alliyätsinqanta”. Nïkurmi toqaninwan mituta rurarir tsë nunapa nawinta llushirirqan y kënömi mandarqan: “Siloamchö këkaq yakuman awikoq ëwë”. Y tsë nunaqa Jesus ninqantam rurarqan, y rikarmi qallëkurqan.

Nunakunaqa espantakurmi kënö niyarqan: “¿Pëmi limushnata mañakur täraq aw? ¿O jukku?”. Tsënam pëqa nirqan: “Awmi, noqam kä tsë wisku nuna”. Tsënam pëkunaqa kënö tapuyarqan: “¿Y imanirtaq kananqa rikankina?”. Tsëmi llapan pasakunqanta pëkunata willarqan. Tsëmi nunakunaqa fariseukunaman apayarqan.

Kënömi fariseukunata nirqan: “Jesus niyanqan nunam mituta rurëkur nawïta llushiramur, yakuman awikoq ëwë nimarqan. Tsëmi ëwar awikurqä, y tsënöpam kananqa rikäna”. Tsënam fariseukunaqa kënö niyarqan: “Säbadu junaqchö pëta alliyätsirqa, manam Diospa poderninwantsu rurëkan”. Peru wakinkunaqa kënömi niyarqan: “Diospa poderninwan mana karqa, ¿imanöraq pitapis alliyätsinman?”.

Tsënam fariseukunaqa tsë nunapa papäninta y mamäninta qayaratsir kënö tapuyarqan: “¿Imanöpataq wamrëkikunaqa rikëta puëdinna?”. Tsënam pëkunaqa tsë nunakunata mantsar kënö niyarqan: “Manam musyayätsu. Kikinta tapuyë”. Fariseukuna, Jesusman creikoqkunata Diosta adorayänan wayipita qarquyänampaq nishqa kayaptinmi nunakunaqa mantsayaq. Fariseukunaqa yapëmi tsë nunata tapupäyarqan, y tsë nunaqa kënömi nirqan: “Llapantanam willayarqoq. ¿Imanirtaq kutin kutin tapupäyämanki?”. Tsënö niptinmi fariseukunaqa alläpa cölerar qarquriyarqan.

Tsëpitanam Jesusqa tsë nunaman ëwarqan y kënömi tapurqan: “¿Markäkunkiku o yärakunkiku Diospa Akrashqanman?”. Tsë nunanam kënö nirqan: “Diospa Akrashqan pï kanqanta musyarqa markäkümanmi o yärakümanmi”. Tsënam Jesusqa kënö nirqa: “Noqam Diospa Akrashqan kä”. Clärum këkan, Jesusqa alli nuna karmi tsë nunata alliyätsirqan y pëman confiakunampaq yanaparqan.