Golgota niyanqan sitiuchömi Jesusta wanutsiyarqan

Mandakoq sacerdötikunaqa Pilätu gobernanqan wayimanmi Jesusta apayarqan. Y Pilätuqa kënömi nirqan: “¿Ima mana allitataq kë nunaqa rurashqa?”. Pëkunanam niyarqan, “¡gobernaq tukunmi!”. Tsënam Pilätuqa kënö tapurqan: “¿Qamku judïukunapa gobernaqnin kanki?”. Jesusnam kënö nirqan: “Gobiernüqa manam kë mundupitatsu”.

Tsënam Pilätuqa Galilëata gobernaq Herödisman mandarqan, “capaz pëqa imallatapis taripunqa” nirnin. Peru Herödispis manam ni imata acusanampaq taripurqantsu, tsëmi Pilätuman yapë kutitsirqan. Tsënam Pilätuqa nunakunata kënö nirqan: “Manam ni Herödispis ni noqapis kë nunachö ima jutsatapis tariyätsu. Librim dejarishaq”. Peru nunakunaqa mas büllarmi kënö niyarqan: “¡Qeruman warkuyätsun!”. Y soldädukunam maqar, cäranchö toqapur y kutar ushayarqan. Nïkurmi kashapita corönata peqanman o umanman churarkatsir kënö nir burlakuyarqan: “¿Yamëllaku judïukunapa gobernaqnin?”. Y Pilätuqa nunakunata yapëmi kënö nirqan: “Noqaqa manam ima jutsatapis kë nunachö tarïtsu”. Peru nunakunaqa “¡qeruman warkuyätsun!” nirmi büllayarqan. Tsëmi Pilätuqa pëkunata entreguëkurqan.

Tsënam Golgota niyanqan sitiuman Jesusta apayarqan, y qeruman clavëkurmi tsëchö dejariyarqan. Jesusqa kënö nirmi Jehoväman mañakurqan: “Teytë perdonëkuy, pëkunaqa manam musyayantsu imata rurëkäyanqanta”. Nunakunaqa burlakurmi kënö niyarqan: “Diospa Tsurin karqa mä kanan ¡salvakuy! Warkurëkanqëki qerupita bajamuy!”.

Ishkaq suwakoq nunakunatapis Jesuspa lädunmanmi clavaräyarqan. Y juknin kaqmi kënö nirqan: “Jesus, gobernar qallëkur noqata yarpäramanki”. Jesusnam nirqan: “Kananmi qamta neq: noqawanmi Shumaq Patsachö kanki”. Tsë tardiqa atsikyëkarmi, kima hörapa patsa ampïrirqan o tsakärirqan. Y wakin qateqninkunaqa Jesuspa mamänin Marïawan juntum tsëchö quedakuyarqan. Y Jesusqa Juantam nirqan kikimpa mamänintanö Marïata cuidanampaq.

Wanunampaqna këkarmi Jesusqa “¡cumplikärishqam!” nirqan. Tsëpitanam warkukärir wanurirqan. Y tsë höram patsapis kuyurqan, y templuchö këkaq cortïnaqa umapita urayaqmi ishkëman rachikaskirqan. Tsënam soldädukunata mandaq kënö nirqan: “Kë nunaqa rasumpam Diospa Tsurin kashqa”.