Jesusqa kawarimurqanmi

Josë jutiyoq rïcu nunam Pilätuta permïsuta mañakurqan Jesuspa ayanta qerupita bajatsinampaq. Tsëpitanam lïnupita rurashqa fïnu y perfumashqa tëlawan Jesuspa ayanta wankurkur, qaqachö uchkushqa mushoq sepultüraman churarqan. Y punkuntanam juk jatun rumiwan tsapatsirqan. Peru mandakoq sacerdötikunaqa Pilätutam kënö niyarqan: “Jesuspa qateqninkuna ayanta suwëkur, ‘kawarimushqam’ niyänantam mantsayä”. Tsënam Pilätuqa kënö nir mandarqan: “Jesus pamparanqan sepultürata alli seguratsiyë y guardiakunawan täpatsiyë”.

Tsëpita kima o kimsa junaqtam, ishkë warmikuna patsa waräriptinlla Jesuspa sepultüranman ëwayarqan. Y kicharëkaqtam tariyarqan, rurichönam juk angelta rikäyarqan. Angelmi kënö nirqan: “Ama mantsakäyëtsu. Jesusqa kawarimushqam. Qateqninkunata willayë Galilëachö tinkuyänampaq”.

Marïa Magdalënaqa jinan höram ëwarqan Pëdrutawan Juanta asheq, y pëkunata taririrmi kënö nirqan: “Piraq Jesuspa ayanta apakushqa”. Tsënam Pëdruwan Juanqa sepultüra rikaq cörripa ëwayarqan, y Jesuspa ayanta mana tarirmi wayinkunata kutikuyarqan.

Marïaqa yapëmi sepultüraman kutirqan, y tsëchö ishkë angelkunata rikëkurmi kënö tapurqan: “¿Mëmantaq Señornïta apakuyarqunki?”. Juk nunata rikëkurmi jardinëru kanqanta pensarqan, tsëmi nirqan: “Teytë, mëman churanqëkita willëkallämë”. Tsënam tsë nunaqa, “¡Marïa!” nirqan. Tsëmi Marïaqa Jesus kanqanta cuentata qokurir, “¡Maestru!” nirnin tsarirkurqan. Jesusqa kënö nirmi mandarqan: “Rikämanqëkita wawqïkunata willë”. Y Marïaqa cörripam Jesuspa qateqninkunata asheq ëwarqan, y taririrnam “Jesustam rikarqö” nir willarqan.

Tsë tardim Jesuspa ishkë qateqninkuna Jerusalenpita Emausta kutikuykäyarqan. Y juk nunam pëkunawan ëwar qallëkurqan, y imapaq parlëkäyanqantam tapurqan. Tsënam pëkunaqa kënö niyarqan: “¿Manaku wiyarqunki? Kananwanqa kima junaqnam kanqa mandakoq sacerdötikunapa culpanrëkur Jesusta wanutsiyanqampita. Peru juk ishkë warmikunam nikäyan kawarishqa kanqanta”. Tsënam tsë nunaqa kënö tapurqan: “¿Manaku creiyanki Diospa willakoqninkuna willakuyanqanta? Pëkunaqa Cristu wanunampaq kaqta y kawarinampaq kaqtam willakuyarqan”. Tsëpitam Diospa Palabrampita maskunata entienditsirqan. Y Emausman chärirqa, “quedakushun” nirmi tsë nunata quedatsiyarqan. Tsë nunaqa pëkunawan cenëkarmi tantata tsarirkur Diosta agradecikurirqan. Tsëchömi Jesus kanqanta cuentata qokuriyarqan, tsë höram pëqa illakärirqan.

Tsënam tsë ishkan qateqninkunaqa Jerusalenman jinan höra ëwayarqan. Y llapan apostolkuna juntarëkäyanqan wayiman chärirmi llapan pasakunqankunata willayarqan. Y wayi rurinchö këkäyaptinmi Jesus yuririrqan. Peru apostolkunaqa manam creiriyarqantsu Jesus kanqanta. Tsënam Jesusqa kënö nirqan: “Ishkan makïta rikäyë y yatayë. Qellqashqam karqan Cristu wanurir kawarimunampaq kaq”.