Jesusqa pesquëkäyaptinmi discïpulunkunata yuripurqan

Apostolninkunata Jesus yuripunqampita juk tiempu pasariptinmi, Galilëa qochaman Pëdruqa pescaq ëwarqan. Tomas, Santiägu, Juan y maskunam pëwan ëwayarqan. Y tsë paqasqa manam ni jukllëllatapis pescashqatsu kayarqan.

Patsa warëqa, qocha kuchunchö këkaqtam juk nunata rikäyarqan. Y tsë nunaqa kënömi nirqan: “¿Imallatapis pescayarqunkiku?”. Pëkunanam, “manam” niyarqan. Tsë nunanam nirqan: “Barcupa derëcha lädumpa mällata jitayë”. Tsëmi mällankunata jitarkuyarqan, y mëtsika pescädukuna kaptinmi ni sutamuytapis puëdiyarqantsu. Tsë höram Juanqa reqirirqan tsë nunaqa Jesus kanqanta, tsëmi nirqan, “¡Señormi!”. Tsënam Pëdruqa jinan höra yakuman saltëkur qocha kuchunyaq nadar ëwarqan. Y wakin kaq qateqninkunapis barcuwanmi qepanta ëwayarqan.

Qocha kuchunman chëkurqa, shanshëkaq o shankëkaq nina jananchö pescädu churarëkaqta y tantatam rikäyarqan. Tsënam Jesusqa, “pescayanqëkipita juk ishkë pescädukunata apayämuy” nirqan. Tsëpitanam nirqan, “desayunaq shayämuy”.

Desayunar ushariyaptinmi Jesusqa Pëdruta kënö tapurqan: “¿Kë pescädukunata kuyanqëkipitapis masku kuyamanki?”. Pëdrunam kënö nirqan: “Awmi Teytë, qamqa musyankim kuyanqaqta”. Tsënam Jesusqa nirqan, “tsëqa üshäkunata cuidë”. Jesusqa yapëmi kënö nir tapurqan: “Pëdru ¿kuyamankiku?”. Pëdrunam nirqan, “awmi Teytë, qamqa musyankitaq kuyanqaqta”. Tsënam Jesusqa, “üshäkunata mitsi” nirqan. Y yapëmi Jesusqa Pëdruta kaqllata tapurqan, tsënam Pëdruqa alläpa llakikur kënö nirqan: “Teytë, qamqa llapantam musyanki. Qamqa allim musyanki imanö kuyanqaqta”. Tsënam Jesusqa kënö nirqan: “Üshalläkunata shumaq mitsi”.