Atska nacionkunachömi yachatsikuyarqan

Apostolkunaqa Jesus mandakunqanta wiyakurmi Diospita alli noticiakunata më tsëchö yachatsikuyarqan. Antioquïapita wawqikunam, 47 watachö apostol Pablutawan Bernabëta mandayarqan më tsëchö yachatsikuyänampaq. Ishkanmi Asia Menorchö këkaq Derbichö, Listrachö, Iconiuchö y mas markakunachö gänas gänaslla yachatsikuyarqan.

Pabluwan Bernabëqa pï mëtam parlapäyarqan: waktsatapis, rïcutapis, jövintapis y mayortapis. Mëtsikaqmi Jesuspa qateqnin tikrayarqan. Pabluwan Bernabëqa Chiprita gobernaq Sergiu Paulutapis yachatsiyarqanmi, peru juk brüjum michëta tïrarqan. Tsëmi Pabluqa kënö nirqan: “Jehoväqa qampa contrëkim këkan”. Y tsë höram tsë brüju wiskuyarqan. Tsëta rikëkurmi tsë gobernadorpis alläpa espantakur creikoq tikrarqan.

Pabluwan Bernabëqa më tsëchömi yachatsikuyarqan: wayin wayin, mercädukunachö, nänikunachö y Diosta adorayänan wayikunachöpis. Juk kutim juk cöju nunata Listra markachö alliyätsiyarqan. Tsëmi nunakunaqa pensayarqan pëkuna dios kayanqanta, y adorëtam munayarqan. Peru Pabluwan Bernabëqa manam permitiyarqantsu y kënömi niyarqan: “¡Diosllatam adoranantsikqa! Noqakunaqa qamkunanö imachöpis pantaq nunakunallam kayä”. Tsënam Antioquïapita y Iconiupita judïukuna chëkur nunakunata inkitayarqan Pablupa contran churakäyänampaq. Tsëmi rumiwan tsampir o saqmar ushayarqan, y wanushqana kanqanta pensarmi qaracharkur markapita waqtaman apayarqan. ¡Peru Pabluqa kawëkarqanmi! Y cristiänu mayinkuna chärirmi yanapayarqan y apakuyarqan. Tsëpitaqa Antioquïatam Pablu kutikurqan.

Pabluqa 49 watachömi yapë viajarqan. Y Asia Menor kinrëchö creikoqkunatam watukarqan. Nïkurmi Diospita alli noticiakunata yachatsikurnin Euröpa kinrëyaq charqan. Atënaschö, Ëfesuchö, Filïpuschö, Tesalönicachö y mas markakunachömi yachatsikurqan. Timoteu jutiyoq jövinwan, Sïlaswan y Lücaswanmi ëwayarqan. Mas congregacionkuna rurakänampaq y creikoqkunata yanapayänampaqmi juntu trabajayarqan. Pabluqa Corintuchöpis juk wata pullanmi quedakurqan, y creikoqkunatam animarqan. Pabluqa yachatsikur y congregacionkunaman cartakurmi karqan. Y carpakunata rurarmi trabajaq. Tsëpitaqa yapëmi Antioquïaman kutirqan.

Tsëpitanam Pabluqa 52 watachöpis yapë viajarqan. Tsë kima kaq viäjinchöqa Asia Menorpitam yachatsikur qallarqan. Filïpusyaqmi norti kaq lädupa viajarqan. Nïkurmi Corintuman urarqan. Y Ëfesuchöpis yachatsikur, qeshyëkaqkunata alliyätsir y creikoqkunata yanaparmi atska watakuna karqan. Y juk escuëlapa salonninchömi llapan juntakaqkunata yachatseq. Mëtsikaqmi Señorman creikoq tikrayarqan y vïdankunata cambiayarqan. Më tsë sitiukunachö Diospa alli noticiankunata yachatsikurirmi, Pabluqa Jerusalenman kutikurqan.