Carcelta täpaq nunam Diospita yachakurqan

Filïpus markachömi, mana alli espïrituyoq o demoniuyoq juk sirwipakoq shipash karqan. Pëqa shamoq tiempuchö pasanampaq kaqta willakurmi, patronninkunata mëtsika qellëta ganatseq. Y tsë markaman Pabluwan Sïlas chäyaptinmi, atska junaqkunapa qepankunachö purirqan. Y tsë mana alli espïritu o demoniu parlatsiptinmi kënö nirqan: “Kë nunakunaqa Llapanta Gobernaq Poderösu Diospa sirweqninkunam kayan”. Tsënam Pabluqa, tsë mana alli espïrituta kënö nirqan: “¡Jesucristupa jutinchömi pëpita yarqunëkipaq mandaq!”. Tsë höram tsë shipashpita, tsë mana alli espïritu yarqurirqan.

Tsënam shipashpa patronninkunaqa manana ganatsinampaq kaqta musyëkur alläpa cölerakuyarqan. Tsëmi gobernadorkunaman Pablutawan Sïlasta qaracharkur apayarqan. Y kënömi niyarqan: “¡Kë nunakunaqa imëkata rurarmi markantsikchö nunakunata fastidiëkäyan!”. Tsënam gobernadorkunaqa, röpankunata jipiratsir maqayänampaq mandakuyarqan. Mëtsika kuti maqëkatsirmi carcelatsiyarqan, y carcel täpaqtam alli cuidanampaq mandayarqan. Tsënö mandayaptinnam, pëqa carcelchö mas rurin kaq calabözuman churarqan y chakinkunatam uchkuyoq tablaman amutsirqan.

Pullan paqasnönam, Pabluwan Sïlasqa mañakur y cantar Teyta Diosta alabar këkäyarqan y tsëtaqa prësukunapis wiyëkäyarqanmi. Tsënam illaqpita fuerti terremötu kaptin, carcelpa cimientumpis kuyurirqan. Tsë höram punkukunapis kichakarqan y llapan prësurëkaqkunapa cadënankunam paskakarqan. Tsënam carcelta täpaq riyarkur o rikcharkurqa, carcelpa punkunkuna kicharëkaqta rikarqan. Y prësukuna qeshpir ëwakushqa kayanqanta pensarmi, espädanwan wanutsikuyta munarqan.

Tsënam Pabluqa fuertipa kënö nirqan: “¡Ama imatapis rurakuytsu, llapäkunam këchö këkäyä!”. Tsënam carcel täpaqqa cörripa yëkur karkaryëkar Pablupa y Sïlaspa chakinkuna kaqman qonqurikuykurqan. Tsëpitanam pëkunata waqtaman yarqëkatsir kënö nirqan: “¿Imatataq salvakunäpaq ruranä?”. Tsënam pëkunaqa kënö niyarqan: “Qam y familiëki kaqkuna salvakuyänampaq, Señor Jesusman creikuy”. Tsëpitanam pëta y familiankunata Teyta Jehoväpa palabranta yachatsiyarqan. Tsënam carcel täpaqqa llapan familiankunawan bautizakuyarqan.