Pabluwan Timoteu

Timoteuqa Listra congregacionchö Jehoväta sirweq jövinmi karqan. Papäninqa Greciapitam karqan, y mamäninnam judïa warmi karqan. Mamänimpa jutinqa Eunïcim karqan, y awilampanam Loida. Pëkunam Timoteutaqa wamra kanqampita Jehoväpita yachatsiyarqan.

Ishkë kaq viäjinchö Listraman yapë chanqanchömi, Pabluqa cuentata qokurqan Timoteuqa creikoq mayinkunata rasumpa kuyanqanta y yanapanampaq kallpachakunqanta. Pabluqa Timoteu pëwan viajanantam munarqan. Y alli yachatsikoq kanampaq y Diospa alli noticiankunata yachatsikunampaqmi yanaparqan.

Juk paqasnam Pabluqa suëñuyninchönö puntanman shëkur Macedoniapita nuna, kënö nir rogëkaqta rikarqan: “Macedoniaman shamur yanapayämë”. Tsëmi Pabluqa Timoteuwan, Sïlaswan y Lücaswan tsëchö yachatsikuyänampaq y congregacionkunata patsätsiyänampaq ëwayarqan.

Tesalönicachö këkaq Macedonia markachöqa mëtsika ollqukuna y warmikunam creikoq tikrayarqan. Tsëmi wakin judïu nunakunaqa Pabluta y pëwan ëwaqkunata chikipäyarqan. Y tsë markachö gobernadorkunamanmi wakin creikoqkunata qarachëpa apayarqan. Nïkurmi, “¡kë nunakunaqa Römata gobernaqpa contranmi kayan!” nirnin büllayarqan. Y Pablutawan Timoteutam wanutsita munayarqan, tsëmi tsë paqas Berëa markaman ishkan qeshpir ewkuyarqan.

Berëa nunakunaqa kushishqam wiyakuyarqan Diospa alli noticiankunata, y mëtsikaq Grecia y judïu nunakunam creikoq tikrayarqan. Peru Tesalönicachö täraq wakin judïukunaqa tsëmampis problëmata ruraqmi chäyarqan. Tsëmi Pabluqa Atënasta ëwakurqan. Peru Timoteuwan Sïlasqa tsë markachömi quedakuyarqan y creikoq mayinkunatam yanapayarqan. Tiempu pasariptinqa Pabluqa yapëmi Tesalönicaman Timoteuta mandarqan. Tsëchö creikoqkunaqa chikir sufritsiyaptinmi alli aguantëta wanayarqan. Tsëpitaqa mas congregacionkunachö creikoqkunata yanapanampaqmi Pabluqa Timoteuta mandarqan.

Pabluqa kënömi Timoteuta nirqan: “Teyta Diosta llapan shonqunkunawan sirwita munaq Cristu Jesuspa llapan qateqninkunatam, imëkata rurar sufritsiyanqa”. Y tsënömi pasakurqan, Timoteutapis chikirmi sufritsiyarqan y carcelatsiyarqan. Peru pëqa kushishqam sientikurqan, tsëchömi rikätsikurqan Jehoväta rasumpa kuyanqanta.

Pabluqa kënömi Filïpuschö creikoqkunata nirqan: “Timoteutam qamkunaman mandamushaq. Pëmi yachatsiyäshunki rasumpa kaqta yachakur sïguiyänëkipaq y imanö yachatsikuyänëkipaq kaqta”. Pabluqa Timoteuman alläpam confiakoq. Pëkunaqa atska watapam Diosta juntu sirwiyarqan, y alli amïgum kayarqan.