Pablutaqa Römapam prësu apayarqan

Kima o kimsa kaq viäjinchöqa, Jerusalenyaqmi Pabluqa yachatsikur charqan. Y tsëchömi prësu tsariyarqan. Juk paqasmi Jesusqa Pablu carcelchö këkaptin kënö nirqan: “Jerusalenchö noqapita llapanta willakunqëkinöllam Römachöpis willakunëki”. Tsëpitaqa Cesarëa markamanmi Pabluta apayarqan, y tsëchömi ishkë wata carcelarätsiyarqan. Juk kutim, juezkunapa puntankunachö gobernador Festuta kënö nirqan: “¡Römata gobernaq cäsüta rikänampaqmi mañakoq!”. Tsënam Festuqa kënö nir contestarqan: “Cäsuykita Römata gobernaq rikänantam mañakurqunki, tsëqa Römata gobernaqmanmi ëwanki”. Tsëmi juk barcuchö Römaman apayarqan. Y creikoq mayinkuna Lücas y Aristarcum pëwan ëwayarqan.

Lamarpa viajëkäyaptinmi feyupa vientur y tamyar qallëkurqan, y atska junaqkunam tsënö karqan. Tsëmi llapankuna ushakäyänampaq kaqta pensayarqan. Peru Pabluqa kënömi nirqan: “Qanyan paqasmi juk angel yuripamar kënö nimashqa, ‘Ama mantsakëtsu Pablu. Qamqa Römata gobernaqpa puntanchömi kanëki. Diosqa barcuchö qamwan ëwaqkunatam salvanqa’. ¡Valorta tsariyë! Manam ushakäshuntsu”.

14 junaqpa feyupa vientuchö alläpa sufririrmi, patsata rikäriyarqan. Malta niyanqan islam kanaq. Tsëman chëkäyaptinnam barcuqa pakir ushakarqan, peru 276 nunakunaqa lamar kuchunman charmi salvakuyarqan. Wakinmi nadëpa, y wakinnam barcupa pakipinkunawan chäyarqan. Maltachö täraq nunakunaqa allim tratayarqan y qoñükuyänampaqmi ninata tsaritsiyarqan.

Tsëpita kima killa pasariptinmi soldädukunaqa juk barcuwanna Pabluta Römaman apayarqan. Y creikoq mayinkunam chaskeq ëwayarqan. Pëkunata rikëkurmi Pabluqa Diosta alläpa agradecikurqan y valorta tsarirqan. Pablutaqa alquilashqa wayichömi prësu katsiyarqan, y juk soldädum cuidarqan. Tsënömi ishkë wata prësurarqan. Tsëman watukaqnin chaq nunakunatam Diospa Gobiernumpita y Jesuspita yachatseq. Pabluqa tsëpitam, Asia Menorchö y Judëachö congregacionkunaman cartakurqan. Yachakunqantsiknöpis, Pabluqa Jehoväpa voluntäninta rurarmi mëtsika nacionkunachö alli noticiakunata willakurqan.