Wallkaqllam atskaqta gobernayanqa
APOSTOLKUNA kawayanqan witsëpitanam, Diosqa nunakunata akrëkashqana wambrankuna kayänampaq. Biblia nenqannöpis yapë yurikushqa cuentana kayaptinmi, Diosqa tsurinkunatanöna pëkunata rikan, y wambrankuna këmanqa chäyan ciëlochö gobernayänampaqmi (2 Timoteu 2:12). Pero gobernayänampaqqa, puntata wanuyänanraqmi, tsënöpa ciëloman kawariyänampaq (Romanos 6:3-5). Ciëlopitanam, Jesuswan ‘patsacho nunacunata mandayanqa’ (Apocalipsis 5:10; 11:15).
Pero manam yapë yurikoq cristiänokunallatsu salvakuyanqa, tsëtam rikätsikun Bibliaqa. Ishkë grupo nunakunata salvanampaqmi Bibliachöqa nin: Wakinkunam wallkaqlla kayan ciëlopita gobernayämunampaq, y wakin kaqkunanam atskaq kayan Patsachö gobernashqa kayänampaq. Yapë yurishqa cristiänokunaman apóstol Juan cartakurmi kënö qellqarqan: “Jutsantsiccunapita Dios perdonamänantsicpaqmi, Jesucristu wanorqan. Y manam noqantsiccunallapaqtsu [wallkaqlla kaqkuna], sinoqa jinantin marcacunacho nunacunapaqwanmi [atskaq kaqkuna]” (1 Juan 2:2).
Hina apóstol Pablupis kënömi nerqan: “Diospa llapan camashqancunam [atskaq kaqkuna] pasepa shuyaquicayan ime junaq carpis, Diosnintsic imeca wamrancunatanona [wallkaqlla kaqkunata] nopancho quecatsimänantsicta” (Romanos 8:19-21). ¿Imataraq nikäyarqan ishkan apostolkuna? Kë yapë yurikoqkunaqa ciëlopitam gobernayämonqa, y Patsachö täraqkunapaqmi atska bendicionkunata apayämonqa. Tsëmi Jesus qateqninkunata kënö mañakuyänampaq nerqan: “Llapan nunacuna mandadiquicho catsun. ¡Sielucho caqcuna qam mandaconqequita rurayanqannolla, que patsachopis nunacuna rurayätsun!” (Mateo 6:10.)
Escrituras Hebreas nishqanchöpis Biblia parlanmi kë ishkë grüpokunata Dios salvanampaq kaqta. Yarpärishun Jesuspa kastan Abrahanta Jehová kënö nenqanta: “Mirënikiwanmi [wallkaqlla kaqkuna] patsachö llapan nacionkuna [atskaq kaqkuna] bendecishqa kayanqa” (Génesis 22:18). Këchö nenqannöpis, Abrahanpa ‘mirëninwanmi’ atskaq nunakuna bendicionta chaskiyanqa.
¿Pikunataq kayan tsë ‘mirënin’? Jesucristu y yapë yurikushqakunam kayan, pëkunatam Dios akrashqa wambrankuna cuenta kayänampaq. Tsëtam apóstol Pablupis kënö nerqan: “Teyta Jesuswan jucnolla cayanqequirecurmi, Abrahampa castancunana ticrariyarqonqui” (Gálatas 3:16, 29). Tsë ‘mirëninwan’, ¿ima bendicionkunataraq chaskiyanqa llapan nacionkuna? Yapëmi Diospa favorninta chaskiyanqa y alläpa kushishqam imëyaqpis kawakuyanqa paraïsoman tikrashqa shumaq Patsachö. Tsëtam salmista David kënö willakorqan: “Patsachöqa alli nunakunallam tärayänqa [yachayanqa], y mana wanushpam tsëchö kawayanqa” (Salmo 37:29; Isaías 45:18; Apocalipsis 21:1-5).
Tsënömi, ciëlopita wallkaqlla gobernayämuptimpis, Patsachöqa atskaq nunakunam mana ushakëta kawakuyanqa. Qamwan familiëkipis Diospa gobiernonchö atska bendicionkunata chaskiyänëkitam alläpa munayä.
[12 kaq päginachö dibüju]
Atskaq nunakunam Patsachöqa mana ushakëta kawakuyanqa. ¿Noqantsikpis tsëchö këkäshuntsuraq?