Alli ruraq y alli tsarakoqqa Jehoväpa shonquntam kushitsin
“Yachaq kë wambrallä y shonqüta kushitsimï, qallapämar burlakëkämaqnïta contestanäpaq.” (PRO. 27:11.)
1, 2. a) ¿Jobllataku Satanás acusëkarqan? b) ¿Imanötaq musyantsik Satanasqa kananyaqpis Jehoväpita burlakïkanqanta?
JEHOVÄMI permiterqan Job alli ruraq y alli tsarakoq kanqanta Satanás pruëbaman churananta. Tsënam Jobpaqa llapan animalninkuna ushakarqan, wambrankuna wanorqan y kikimpis qeshyarqan. Pero Satanasqa manam Jobllatatsu chikerqan, sinöqa llapan nunakunatam, Tsëtaqa kënö nenqanwanmi musyantsik: “Qarapaqrëkur qara, kawëninrëkorqa llapan kaponqantam nunaqa qonqa”. Këchömi rikantsik Satanasqa llapan nunakunata, imatapis munarllam Diosta serviyan nishpa acusëkanqanta (Job 2:4).
2 Jobta pasanqankuna hoqta pachak (600) watakunanö pasariptinmi Diosnintsik Salomonta kënö qellqatserqan: “Yachaq kë wambrallä y shonqüta kushitsimï, qallapämar burlakëkämaqnïta contestanäpaq” nishpa (Pro. 27:11). Këchömi rikantsik, Salomonpa tiemponkunachöpis Satanasqa hinallaraq Diospita burlakïkanqanta. Tsëpitanam Apóstol Juan huk visionchö rikärin Satanasta, ciëlopita qarpakämushqana këkar Diosnintsikpa sirveqninkunata acusëkanqanta (tsëqa pasakorqan 1914 wata Jesucristu gobernaq yëkonqan witsankunachömi). Tsënömi kanan tiempopis, Diabluqa ushanan tiempokunachö kawëkanqantsikta musyar, Diospa sirveqninkunata pasëpa acusëkanlla alli ruraq kayanqanta mana gustakur (Apo. 12:10).
3. ¿Ima precisaq yachatsikïkunatataq tarintsik Job librochö?
3 Kë estudiochömi rikäshun Job libropita kima precisaq yachatsikïkunata. Punta kaq yachatsikïmi, Satanasqa nunapa rasumpëpa chikeqnin, pëmi culpayoq Diospa sirveqninkunatapis chikir qatikachäyänampaq. Ishkë kaq yachatsikïnam, Diosnintsikman markäkur llapan mandamanqantsikta rurarqa, imëka pruëbakunapa pasarnimpis alleq tsarakïta puëdenqantsik. Y kima kaq yachatsikïnam, imanömi Jobtapis Jehová yanaparqan, tsënöllam noqantsiktapis yanapamäshun Palabran Bibliawan, markanwan, y santo espïritunwan.
Satanás chikimaqnintsik kanqanta ama qonqashuntsu
4. ¿Pitaq culpayoq kë mana alli tiempochö kawanapaq?
4 Imëka mana allikuna pasaqta rikarmi nunakuna alläpa yarparäyan, pero manam musyayantsu imanir tsëkuna pasëkanqantapis. Satanasman, ni pëlla imëka mana allikuna ruraq kanqanman mana creirnin. Tsënö kaptimpis wakin hipakïkunataqa nunam causashqa. Punta teytantsikkuna Adanwan Eva Jehová Diospita rakikäriyanqampita patsëmi, nunakunaqa tukï mana allikunata rurayashqa. Pero Diablum Ëvata ulipar o llullapar Jehová Diospita rakikäratserqan. Pëmi culpayoq kënö hutsasapa y mana alli kawanantsikpaq, hinamampis pëmi dominëkan hinantin mundota. Satanasmi ‘patsacho mandacoqqa’, tsëmi nunakunapis Satanasnö kayan: Allitukoq, yachaqtukoq, contrakoq, kikinllapaq imëkatapis munaq, mana alli kawakoq y munëninkuna rurakoq (2 Cor. 4:4; lei Santiagu 3:14, 15). Tsënö kayanqanrëkurmi chikinakur wanutsinakuyan, política y religión asunto chikinakuyan, imëkapaqpis mallaqäkoq kayan y imëkatapis mana alli ruraqlla kayan, kë llapanmi nunakunata alläpa hipatsin (1 Tim. 2:14; 3:6).
5. ¿Kikintsikllapaqtsuraq llapan musyanqantsikkunata katsikushwan?
5 Pero Diosnintsikpa sirveqnin kaqkunaqa musyantsikmi, kë mundo pasëpa mana alli kanampaq pï culpayoq kanqantapis. ¿Kë musyanqëkipita manatsuraq wakinkunatapis willarinkiman? ¿Manaku kushikunki Diosnintsik mana culpayoq kanqanta willakur? ¿Hina manaku kushikunki Jehová ichik tiempollachöna Satanasta y llapan hipakïkunata ushakäratsimunanta willakurnin?
6, 7. a) ¿Diospa markan hipanampaq pitaq culpayoq? b) ¿Imanötaq Elihú ruranqanta qatishwan?
6 Satanasqa manam tukï hipakïllatatsu apamushqa, sinöqa chiki nunakunawampis Diospa sirveqninkunata qatikachätsinmi. Pëqa imëka pruëbakunata churamunampaq listom këkan. Jesucristum Apóstol Pedruta kënö nerqan: “Simon, Simon, diablum Diosta mañacushqa, qamcunapa marcäquiniquicunata imeca trigu wauyaqno probananpaq” (Luc. 22:31). Tsëmi, noqantsikpis Jesus ruranqanta qatirnenqa tukïläya pruëbakunapa pasashun. Pedruqa manam ardëllatsu, Satanasqa “imeca mallaqashqa leonnomi” mikumënintsikta munëkan nerqan. Y Pablunam kënö nerqan: “Rasonpam Teyta Jesus munanqanno cawe munaqcunataqa maltratar qaticachäyanqa” (1 Ped. 5:8; 2 Tim. 3:12).
7 Congregacionnintsikchö cristiano mayintsik tukïläya hipakïkunapa pasëkaqta rikarqa musyantsikmi pï culpayoq kanqanta. Y pëkunapita witikurinantsikpa rantenqa, Elihú ruranqannömi yanapanantsik, rasumpa alli amigo kanqantsikta rikätsir, tsënöpa chikimaqnintsik Satanasta vencinampaq (Pro. 3:27; 1 Tes. 5:25). Llapantsikmi munantsik cristiano mayintsikkuna alli tsarakoq kayänanta, imëka pruëbapa pasëkarnimpis, tsënö rurarmi Jehoväpa shonqunta kushitsishun.
8. ¿Diospa sirveqninkunata tukïläya pruëbakunaman churarnenqa imatataq Satanás logrëta munan?
8 Satanasqa, Jobpa llapan animalninkunatam puntataqa ushakätsir qallëkorqan, tsë animalninkunawanmi Jobqa tarillaq alli kawakunampaq. Hinamampis tsë animalkunatam Jehoväta kushitsinampaq pishtëkur kayaq. Y Job 1:5 nishqanmi kënö nimantsik: “[Jobqa] qoya qoyallam shärikoq, y tsurinkuna ëkaqpis kayanqanmanmi animalkunata wanïkatsirnin, Diosnintsikpaq kayaq. Tsëtaqa Jobqa ruraq, ‘itsa tsurïkunaqa shonqunkunachö Diosta maldecikuyashqa kanman’ nishpam. Tsënömi imëpis Jobqa ruraq”. Pero prueba tiempo chäriptenqa, Jehoväta alabanampaq kaq ‘tukï kaponqantam’ oqrarerqan (Pro. 3:9). Tsënö kaptimpis shiminwanqa Jehoväta alabëkarqallam.
Shonqupita patsë Jehová kuyëta yachakushun
9. ¿Imataq más valoryoq kawënintsikchö?
9 Kapoqyoq, waktsa, wambra, yashqa, sano o qeshyapäkoq karpis, shonqupita patsë Jehová kuyëtaqa puëdentsikmi, tsëmi más valoryoqqa. Tukï pruëbakunapa pasarnimpis shonqupita patsë kuyanqantsikmi yanapamäshun alleq tsarakunapaq, y imëpis allillata rurëkänapaq. Tsënö kanqantaqa rikantsik Jehoväpita tsëraq yachakïkaqkunapis alleq tsarakuyanqanchömi.
10, 11. a) ¿Imanötaq rikarqan Valentina Garnovskaya llapan prueba pasanqankunata? b) ¿Satanás imanö kanqantataq rikätsikorqan kë cristiana?
10 Rikärishun Rusia markapita Valentina Garnovskaya shutiyoq pani pasanqanta, cristiano mayinkunawan paqta imëka pruëbakunapa pasëkarnimpis Jobnömi alli tsarakorqan. 1945 Watachömi ishkë chunka (20) watayoq këkaptinmi huk cristiano visitarqan y Bibliapita parlaparqan, pero kima kutillam ëwarqan yachatsinampaq. Tsënö ichiklla yachëkarpis vecïnonkunatam Bibliapita yachatsir qallëkorqan, tsërëkurmi puwaq (8) wata carcelcho karqan y sinchi trabäjokunachömi trabajatsiyarqan. Y 1953 watachönam yarqaramorqan y yapëmi Bibliapita yachatsikur qallëkorqan. Tsëmi yapë carcelman apayarqan y kananqa karqan chunka (10) watapanam. Watakuna pasaptinnam huk lädoman apayarqan y tsë carcelchöqa Jehoväpa Testïgon warmikunapis kayarqanmi y pëkunapam huk Bibliankuna karqan y huk hunaqnam huk pani tsë Bibliata rikäratserqan. Valentinaqa alläpam kushikïkorqan tsë Bibliata rikëkur, pëqa 1945 watachö watukaq ëwaq cristianopa Biblianllatam rikashqa karqan.
11 Y 1967 watachönam Valentina carcelpita yarqurerqan y tsë watachömi Bautizakurerqan Jehoväta kuyanqanta rikätsikur. Y libre kanqan tiempota mana perditsita munarninmi yapë kushishqa yachatsikur qallëkorqan. Tsënö kaptimpis 1969 watachöqa yapëmi carcelman apayarqan, y tsëchömi karqan kima wata más, tsënö këkarpis manam imëpis Jehoväpita yachatsikïta haqerqantsu. Pëqa wanukorqan 2001 watachömi, tsëpaqqa yanapashqana karqan chusku chunka chusku (44) nunakunatam Jehová Diosta serviyänampaq. Llapan pasanqanta yarpashqaqa ishkë chunka huk (21) watakunam llawirarqan carcelcho y sinchi trabäjokunachö trabajatsiyarqan. Jehoväta mana haqinanrëkur tukïta pasarqan. Wanukunanna këkarmi kënö nerqan: “Manam imëpis wayiqa kapamashqatsu, y llapan cösasnïkunapis huk maletinllamanmi tinkoq, pero Jehoväta servirqa alläpa kushishqam kawarqö”. Kë cristiana pasanqanmi rikätsimantsik Satanasqa uli o llulla kanqanta, imëka pruëbakunapa pasëkarpis rasumpa cristianokunaqa alleqmi tsarakuntsik, y Jehovämanqa fielmi kantsik (Job 1:9-11). Awmi alleqmi musyantsik, Valentinaqa tsënö kashqa karnin Jehová Diospa shonqunta alläpa kushitsenqanta, y Jehoväqa shuyarëkanmi wakin sirveqninkunatawan paqta kawaritsimunampaq (Job 14:15).
12. ¿Imataq yanapamäshun Jehoväwan imëpis alli kakunapaq?
12 Jehoväwan alli kanapaqqa yanapamäshun shonqupita patsë kuyanqantsikmi. Alläpa yachanëpaq kanqantaqa imëpis qatita tïrantsikmi y munanqannömi kawantsik. Jehovätaqa kuyantsik shonqupita patsëmi y manam Satanás nenqannö hananllapatsu o imatapis chaskita munarllatsu. Kënö kuyanqantsikmi yanapamäshun alli tsarakunapaq imëka pruëbakunapa pasëkarnimpis. Y Jehoväqa “sirveqninkunapa rurëninkunatam täpanqa” (Pro. 2:8; Sal. 97:10).
13. ¿Imataq Jehová nin servinantsikpaq sinchikonqantsikta?
13 Itsa höraqa pensashwan Diospa shutin honrashqa kanampaq ichikllatam rurëka nishpa, pero ichikllata rurarpis kuyarninmi rurantsik. Jehoväqa musyanmi imanir ruranqantsiktapis y mëyaq puëdenqantsiktapis, manam mañamantsiktsu mana rurëta puëdenqantsiktaqa y manam tsërëkorqa haqiramantsiktsu. Jehoväqa manam ruranqantsikllatatsu rikan, sinöqa imarëkur ruranqantsiktawanmi. Jobqa, llapan pasanqampita llakikushqa këkarnimpis, acusaqninkunatam nerqan, Jehová mandakunqankunataqa alläpam kuyëko (lei Job 10:12; 28:28). Job libropa ushanan capïtulonchömi, Jehová nerqan Elifaz, Bildad y Zofar nishqan nunakunata pëkunawan alläpa piñashqa këkanqanta, pëpita mana rasumpa kaqta parlayashqa kayaptin. Pero Jobtaqa allim rikarqan, chusku kutim “servimaqnï” nishpa qayarqan y kiman amïgonkunapaq mañakunampaqpis nerqanmi (Job 42:7-9).) Tsëmi imëpis allillata rurëkänantsik Jehová chaskimänantsikpaq.
Jehoväqa yanapanmi fiel sirveqninkunata
14. ¿Imanötaq Jehová yanaparqan Jobta kikinllaman mana yarparäkunampaq?
14 Hutsasapa këkarnimpis, Jobqa imëka pruëbakunapa pasarnin manam Jehovätaqa haqerqantsu. Tsënö këkarpis hora höraqa llutam pensarerqan. Tsëmi Jehoväta kënö nerqan: “Qayakallämuptïpis manam contestamankitsu [...] makikichö llapan kallpëkiwanmi ushakätsimëta tïranki”. Hinamampis Jobqa tumpayaptin manam gustarqantsu, tsëmi kënö nerqan: ‘Culpannaq kanqäta musyankim’ y “manam makïchöqa mana alli rurë kantsu, mañakïnïpis limpiom” (Job 10:7; 16:17; 30:20, 21). Tsënö nikaptimpis Jehoväqa Jobta kuyarqanmi. Tsëmi atska tapukïkunawan yanaparqan kikinllaman alläpa mana yarparäkunampaq, y Diospa poderninwanqa nuna mana igualanqanta rikänampaq. Jobqa cuentatam qokurerqan, y mananam kikinllamanqa yarparäkorqannatsu (lei Job 40:8; 42:2, 6).
15, 16. ¿Imanötaq Jehová yanapamantsik kanan tiempochö?
15 Kanampis kuyakïwanmi anyamantsik o willapämantsik y yanapamantsik alli nänipa ëwanapaq. Maslla tantearkunapaq, noqantsikrëkur wambran Jesus wanunantam permiterqan. Tsë wanunqanrëkurmi hutsantsikkunapita perdonamantsik y Pëwampis alli këta tarintsik (Sant. 4:8; 1 Juan 2:1). Y santo espïritunwampis yanapamënintsikta puëdenmi, tukï pruëbakunapa pasëkar alli tsarakunapaq. Hina Palabran Bibliatapis qaramarqontsikmi. Leirnin, y tsë leinqantsikman yarpakacharnenqa listom këkäshun imëka pruëbakuna shamuptimpis alli tsarakunapaq. Bibliapita yachakurninmi más musyashun Satanás imanö Jehoväpa autoridadnimpaq y Jehová Diosta sirveq nunakunapaq mana alli parlanqanta.
16 Hinamampis, noqantsikpaqqa huk hatun bendicionmi Jehoväpa markanchö këqa, tsëchömi espiritual mikïnintsik ruratsimun “mäcoq, mäcoq, cumplidu sirweqnin[wan]” (Mat. 24:45-47). Y hinantin Patsapam pachak waranqa (100.000) congregacionkuna kan, y tsë llapanchömi qorikantsik o ëllukantsik shumaq yachatsikïkunata yachakunapaq, tsënöpa imëka pruëbakunapa pasarnimpis alli tsarakunapaq. Reunionkuna alli yanapakonqantaqa Alemania markapita Sheila shutiyoq shipashta pasanqanwanmi alli claro rikantsik.
17. Willakaramï, ¿imanötaq reunionkunaman ëwanqantsik alläpa yanapamashwan?
17 Huk hunaqmi Sheila claseschö këkaptin profesorninqa yarqurerqan yachëkätsenqampita y tsëyaqnam alumno mayinkunaqa horqariyarqan huk ouija nishqan tablata y pukllar qallakïkuyarqan, tsë pukllaqa mana alli espïritukunapitam shamun. Tsënö pukllar qallaqta rikarmi Sheilaqa raslla yarqukurerqan. Tsëpitanam musyarerqan, tsëchö pukllëkaqkunaqa demoniokuna lädonchö këkaqta mäkurir pasëpa mantsakar yarqukurishqa kayanqanta. ¡Tsëpita Sheila yarqukurenqanqa alläpa allim karqan! Pero ¿imataq yanaparqan tsënö yarqukurinampaq? Kikin Sheilam kënö willamantsik: “Qepallataran wiyashqa karqa reunionchö tsë ouija nishqan tablaqa huk peligro kanqanta. Tsëmi listo këkarqä witikunäpaq. Hinamampis Jehoväpa shonquntam kushitsita munarqä Proverbios 27:11 nenqannö.” ¡Allichöchi Sheilaqa tsë reunionman ëwar wiyakushqa karqan llapan yachatsikayämonqanta!
18. ¿Imata ruranëkipaqtaq listo këkanki?
18 Jehová Diospa markanta pushaqkuna niyanqanta imëpis wiyakushun. Reunionkunaman mana faltashpa ëwashun, Bibliata y wakin kaq librokunata y revistakunatapis alli leishun. Tsëta rurashqam Jehová Diospita chaskishun llapan yanapakïninta. Hina manam qonqanantsiktsu Diosnintsikman mañakïta ni cristiano mayintsikwan más reqinakïtapis. Jehoväqa munan imëka pruëbakunata pasarnimpis alleq tsarakunatam, y noqantsikmanmi confiakun. Awmi, alläpa kushikïpaqmi Jehová Diospa limpio shutinta alabe, y alli tsarakurnin shonqunta kushitsiqa.
¿Yarpankiku yachakonqantsikta?
• ¿Imapitataq . . . culpayoq Satanás?
• ¿Cristianokunapaqqa imataq más valoryoq?
• ¿Imataq yanapamantsik Jehoväwan alli kanapaq?
• ¿Imanötaq kanan tiempo Jehová Dios yanapamantsik?
[15 kaq päginachö dibüju]
¿Listoku këkanki Jehoväpita rasunkaqta yachakonqëkita willakunëkipaq?
[16 kaq päginachö dibüju]
Cristiano mayintsik alli tsarakunampaq yanapëta puëdentsikmi
[17 kaq päginachö fötu]
Valentinaqa imëka pruëbapa pasëkarnimpis manam Jehovätaqa haqerqantsu