2 Mana rasun kaq yachatsikï: Mana alli nunakunaqa infiernochömi rupayan
¿Imanötaq tsë yachatsikï yurimushqa? “Grecia nacionchö llapan filósofo nishqan estudiösokuna yachatsikuyanqampitapis masqa, Platón infiernopaq yachatsikonqantam nunakuna creiyarqan.” (Historia de los infiernos, de Georges Minois, página 64.)
“150 J. sh. watakunapita witsëpam, Diospa yachatsikïnintawan Grecia nacionchö filösofokunapita yachakuyanqanta cristiänokuna takur qallëkuyarqan [...]. Platonpa yachatsikïninmi pëkunapaqqa más alli karqan.” (The New Encyclopædia Britannica, 1988.)
“Iglesiachöqa yachatsikuyan infierno kanqanta y imëpis mana ushakanqantam. Hutsasapa nunakuna wanuyaptenqa tsë höram almankuna infiernoman ëwayan y hipar [ñakar] rupayan, ‘mana ushakäkoq ninachö’ [...]. Infiernomanqa rupaq ëwayan Dios imëpis manana chaskinampaqmi.” (Catecismo de la Iglesia Católica, tercera edición revisada, página 242.)
¿Imatataq Bibliaqa yachatsikun? “Kawëkaqkunaqa musyayanmi wanuyänampaq kaqta; pero wanushqakunaqa manam imatapis musyayannatsu, [...] ëwëkanqëki Seolchöqa mananam kannatsu ni ima rurë, ni imaman yarpë, ni yachë, ni musyaq kë.” (Eclesiastés 9:5, 10.)
Hebreo idiömachöqa “wanushqakuna kayänan” ninanmi Seol palabraqa, tsë palabratam wakin Bibliakunaqa “infierno” nir traduciyan. ¿Wanushqakuna mëchö këkäyanqantataq kë texto yachatsimantsik? ¿Hutsankunapitatsuraq Seolchö rupar këkäyan? Manam, kë texto nenqannöpis “wanushqakunaqa manam imatapis musyayannatsu”. Tsënöpam ni imata mäkuyannatsu ni llakinäyannatsu. Tsënö kaptinchi unë Job nunapis alläpa qeshyar Diosta nerqan ‘Seolman’ o infiernoman apëkunampaq (Job 14:13). Infiernochö almakuna imëyaqpis rupayaptenqa, ¿tsëman ëwanampaq mañakunmantsuraq karqan Job? Manachi tsëtaqa mañakïkunmantsu karqan. Bibliachö infierno o Seol nerqa, llapan wanushqakuna pamparäyänan hatun panteonpaqnömi parlan, y tsëchöqa manam ni ima rurëpis kantsu.
Infierno ima kanqantapis yachakurenqantsikqa manam Biblia nenqanllawantsu igualan, pensarishun, ¿ima hutsatanaraq pipis rurëkunman kuyakoq Diosnintsik imëyaqpis rupatsinampaqqa? Kë tapukïwanmi cuentata qokurintsik Diosnintsikqa nunakunata infiernochö mana rupatsinqanta (1 Juan 4:8). Infiernopaq yachatsikuyanqan mana rasun këkaptenqa, ¿ciëloman llapan alli nunakuna ëwayanqanta yachatsikuyanqampis rasumpatsuraq?
Kë versïculokunata rikäri: Salmo 146:3, 4; Hechos 2:25-27; Romanos 6:7, 23, QKW.
RASUN KAQ:
Diosqa nunakunata manam infiernochö rupatsintsu.
[5 kaq päginachö pikunapa kanqan]
Barrators—Giampolo/The Doré Illustrations For Dante’s Divine Comedy/Dover Publications Inc.