4 Mana rasun kaq yachatsikï: Kima Dios hukllëllachö
¿Imanötaq tsë yachatsikï yurimushqa? “Kima Dios Hukllëlla kanqantaqa yachatsikur qallayarqan 400 watakunapaq ichikllana pishikaptin imachi. Y tsëqa rasunmi [...]. ‘Dios, Tsurin y Santo espíritu hukllëlla Dios’ kayanqan yachatsikïqa paqwë patsakärirqan, 400 watakunapaq ichikllana pishikaptinraqmi. Y tsë watakunapita qepamanqa Kima Dios Hukllëllachö kanqanman cristiänokuna manam creiyarqanraqtsu.” (New Catholic Encyclopedia, 1967.)
“Nicea markachö 20 de mayo 325 wata atska religiösokuna ëllukäyanqanchöqa, kikin Constantïnom tsë reunionta rurarqan y dirigerqampis. Tsëchömi pë nerqan [...] Tsuripis ‘Teytanölla kanqanta’, tsë yachatsikïwanmi yuritsiyarqan Cristuwan Dios hukllëlla kayanqan creenciata. [...] Constantïnota mantsarmi mana munëkarpis Kima Dios Hukllëllachö kanqan yachatsikïta patsätsiyänampaq, atskaq obispokuna firmayarqan y ishkaqllam munayarqantsu.” (Encyclopædia Britannica, 1970.)
¿Imatataq Bibliaqa yachatsikun? “Estebanqa Santu Espiritupa poderninwan carmi, rara sieluman ñuquircur, riquecorqan chipapëcaq Diospa glorianta y Teyta Jesusta Dioswan juntu quecaqta. Tsenam Esteban queno nerqan: Rara sielutam quicharëcaqta canan ricarëcä, y Diospita Shamushqa Nunanam Dioswan juntu quecan.” (Hechos 7:55, 56.)
Rikanqantsiknöpis santo espírituwan o Diospa imëkata ruraq kallpanwan karmi, Esteban Jesusta rikarqan ‘Dioswan juntu quecaqta’. ¿Imatataq tsë rikanqampita yachakuntsik? Jesus kawariramurnin ciëloman kutirirqa manam Diosmantsu tikrarirqan, pëqa espíritu karpis manam Teytannötsu. Hinamampis Estebanqa manam Kimaq Diostatsu rikarqan. Unëpitanam Kima Dios Hukllëllachö kanqanta yachatsikoq versïculota Bibliachö ashiyashqa, y ¿tariyashqatsuraq? Huk dominicano sacerdote cuentata qokurmi kënö nerqan: “Mushoq Testamentochöqa manam mëninchöpis yachatsikuntsu Kima Dios Hukllëllachö kanqanta” (À l’aube du christianisme: la naissance des dogmes [Cristianismo qallanqan witsankuna: yachatsikïninkuna yurinqan], Marie-Émile Boismardpa).
Iglesiachö hukta hukta 300 watakuna witsan yachatsikuyanqanta ushakätsinanrëkurmi, Constantïnoqa Kima Dios Hukllëllachö kanqan yachatsikïta patsätserqan. Pero tsë yachatsikuyanqampitam kë tapukï yurirerqan: ¿‘Diospa mamantsuraq’ Jesusta qeshpikoq Marïaqa?
Kë versïculokunata rikäri: Mateo 26:39; Juan 14:28; 1 Corintios 15:27, 28; Colosenses 1:15, 16.
RASUN KAQ:
Kima Dios Hukllëllachö yachatsikïtaqa yuritsiyarqan, 400 watapaq ichikllana pishikaptinraqmi.
[7 kaq päginachö pikunapa kanqan]
Museo Bardini (Florencia)