Diosqa kuyamantsikmi ¿imakunachötaq tsëta rikätsimantsik?

DIOS kuyëkämashqaqa, ¿imanirtaq më tsëchöpis alläpa hipakïkuna kan? Tsënömi unëpitana atskaq nunäkuna tapukuyashqa. Y tsëqa rasunmi, ¿manaku pïnikillatapis hipëkaqta o ñakaykagta rikarqa qampis yanaparita munanki? Tsëkuna rasumpa kaptinmi wakin nunakunaqa, ¿imanirtaq tukï mana allikunata Dios rikaräkun? Nir tapukuyan, y wakinkunanäqa Diosnintsik mana yarpämanqantsiktam pensayan. Tsëmi, hipakïkunata Diosnintsik imanö ushakätsimunanta manaraq yachakurnin, puntataqa rikärishun noqantsikpaq yarparanqan alläpa precisanqanta. Y kanan yachakurishun imakunachö rikätsimanqantsiktapis.

Kamanqan

Jehová Diosmi “sieluta, patsata, lamar yacuta y tsecho imeca caqtapis cama[shqa]” (Hechos 4:24). Tsëkunata rikarmi, más musyantsik Diosnintsik alläpa kuyamanqantsikta. Qamta alläpa gustashonqëkikunaman yarpäri. ¿Alläpaku mikïkuna gustashunki? ¿Imanöraq kashwan kaqllata mikukurqa? Diosqa huk clase mikïllata kamëkunmanmi karqan, pero tsëpa rantinqa tukïläya mikïkunatam kamashqa akrakunapaq. Y ¿ima nishwanraq kë täranqantsik Patsapaqqa? Diosnintsikqa tukï läya montikunata, qorakunata y wëtakunatam kamamushqa kë Patsa shumaq kanampaq. ¿Manaku tsëkunata rikar y más reqita munar kushishqa kawantsik?

Kananna pensarishun noqantsikman. Diosnintsikqa kamamashqantsik kushikunapaq, müsicata gustanapaq y imatapis shumaqta rikar kushishqa kanapaqmi, y kawanantsikpaq mana wanëkarnimpis, tsëkunawanraqmi kushishqa kawantsik. Y tsëpitapis masqa, kuyakoq kanapaqmi Jehová Diosqa kamamashqantsik. ¿Pitaraq mana gustarinmantsu alli amïgokunawan karita y kuyanqantsik shumaq waqupäramänata o makallapäramänata? Tsënö kuyanakunapaq kamamanqantsikmi rikätsimantsik kikin Diosnintsikpis kuyakoq kanqanta.

Biblia

Bibliapis rikätsimantsikmi Diosnintsik llapantsikpaq yarparanqanta. Pë kuyakoq kanqantam yachatsimantsik (1 Juan 4:8). Hinamampis machakikuna y alläpa mikukï mana alli kanqantam rikätsimantsik, y allikunata ruranapaqmi yachatsimantsik, tsëqa manam alläpa qeshyar kawakushuntsu (1 Corintios 6:9, 10).

Hina nuna mayintsikkunawampis yamë kawakunapaqmi Diospa Palabranqa yachatsimantsik. Huknintsik huknintsik kuyanakunapaq, ankupänakunapaq o llakïpänakunapaq, y respetanakunapaqmi yanapamantsik (Mateo 7:12). Pero tumpanakï, hukwan hukwan pununakï, wanutsinaki, mallaqashqa kë y chikikoq kë, alläpa mana alli kanqantam nimantsik, y tsëqa nuna mayintsikkunata llakitsinmi. Llapan nunakuna Biblia yachatsikonqanta wiyakur rurayaptenqa, manachi alläpa hipëkuna kanmantsu.

Pero Diosnintsik hukta ruranqanmi alli rikätsimantsik alläpa kuyamanqantsikta. ¿Ima ruranqantaq tsëqa? Tsurin Jesuswanmi salvamashqantsik. Tsëmi Biblia kënö nin: “Que patsacho nunacunata allapa cuyarninmi, Dios jucllella tsurinta cachamorqan, peman marcäcoqcuna mana condenashqa cayänanpaq sinoqa wiñepa cawayänanpaq” (Juan 3:16). Noqantsikpaqrëkur tsurin wanunanta haqirmi, Jehoväqa rikätsimarqontsik wallka tiempollachöna hipëkunata, y wanïta paqwë hushakäratsimunampaq kaqta (1 Juan 3:8).

Këkunawanmi rikärirquntsik Diosnintsik alläpa kuyamanqantsikta, hipanantsikta mana munanqanta y ichikllanam pishin kë llapan mana allikunata paqwë hushakäratsimunampaq. Y këqa manam ardë parlakïllatsu, kikin Bibliam willamantsik tsëkunata Diosnintsik imanö ruranampaq kaqtapis, y tsëtam qateqninchö rikärishun.

[4 kaq päginachö dibüju]

Diosnintsikqa kuyakoq karmi, kuyakoqta noqantsiktapis kamamarqontsik