Jesucristupa yachatsikïninqa pï mëpaqmi

“Kananyaqpis yachatsikïninta shonqunkunachö y yarpëninkunachö nunakuna katsiyanqanmi rikätsikun Capernaumpitaa alli musyaq nunanöqa mana pipis kanqanta.” (GREGG EASTERBROOK, QELLQAQ.)

NUNA parlanqanqa allipaq o mana allipaqpis kanmanmi. Alli karqa pitapis yanapanmi, kallpatam qon y hasta kawëninchöpis yanaparinmi. Pero Jesus yachatsikur parlanqan yanapakunqannöqa, manam pï parlanqampis yanapakushqatsu. Hirkapita Yachatsikunqanta wiyashqa karmi huk nuna kënö nirqan: “Yachatsicur ushariptinnam, llapan nunacuna allapa espantacur mantsacäcuyarqan” (Mateo 7:28).

Kanan witsampis më tsëpita nunakunam Jesuspa wakin shumaq yachatsikïninkunata reqiyan. Këmi wakin yachatsikïninkuna:

“Manam pipis ishcaq patrontaqa sirwinmantsu. [...] Tsemi Diosta cuyecarqa, ama riquesacunata cuyashuntsu.” (Mateo 6:24.)

“Imanomi munayanqui qamcunapaq nuna mayiquicuna allita rurayänanta, tsenolla qamcunapis pecunapaq rurayë.” (Mateo 7:12.)

“Mandacoq cesarpa caqtaqa mandacoq cesarta qoycuyë; y Diospa caqtaqa Diosta qoycuyë.” (Mateo 22:21.)

“Qaraquimi mas cushiqueqa chasquir cushiquipitapis.” (Hechos 20:35.)

Jesusqa manam shumaq yachatsikïkunallatatsu parlarqan. Diospita rasumpa kaqta musyatsikuptin, nunakunata kushishqa kawakuyänampaq yanapaptin y Diospa Gobiernonlla ñakayninkunata o hipakïninkunata ushakätsinampaq kaqta rikätsikuptinmi yachatsikunqanqa alläpa alli karqan. Imakunata yachatsikunqantam qateqninchö rikärishun. Tsënöpam musyashun imanöpa “kananyaqpis yachatsikïninta shonqunkunachö y yarpëninkunachö nunakuna katsiyanqan[ta]”.

[Päginapa ura kuchunchö willakï]