Ollqukuna, santo espïritupa munëninmannö kawakur listo këkäyë serviyänëkipaq

“Santu Espiritupa muneninmanno cawacorqa wiñe cawaquitam tarishun.” (GAL. 6:8.)

1, 2. ¿Imanötaq cumplikëkan Mateo 9:37, 38 y imataq pishin Diospa markanchö?

KANANQA alläpa precisaq tiempochömi kawëkantsik. Pasëpam cumplikëkan Jesucristu kënö ninqan: “Cosecha poqicaqnomi nunacuna ellipaq quecayan. Tseno captinpis, wallcallam elloqcuna cayan. Tsemi Teyta Diosman mañacuyë elloqcuna mas atscaq cayänanpaq” (Mat. 9:37, 38). Kanan tiempom Jesus kënö mañakunqantaqa contestëkan Jehová imëpitapis más. 2009 wata witsanchöqa patsakarqan 2.031 congregacionkunam, tsë llapanta yuparishqam chärin 105.298. Y cada hunaqmi bautizakuyarqan 757 nunakuna.

² Jehoväpa markan más miranqanmanmi, congregacionkunachö dirigiyänampaq y üshakunata yachatsiyänampaq y cuidayänampaq ollqukuna pishin (Efe. 4:11). Watakuna pasanqanmannömi Jehoväqa akrashqa y churashqa ollqukunata markanman sirveqninkunata dirigiyänampaq y yachatsiyänampaq, tsënöllam kanan tiempopis rurëkan. Miqueas 5:5 textom ushanan tiempochö Diospa markanta dirigeqkunapaq parlarnin “qanchis mitseqkuna” y “puwaq pushaqkunam” kanqa nimantsik, këqa rikätsimantsik kë ushanan tiempochö atskaq nunakuna Diospa markanta diriginampaq kanantam.

3. ¿Ima ninantaq ‘santu espiritupa muneninmanno cawëqa’?

³ ¿Qamqa bautizakushqa ollquku kanki? Tsëqa ¿imataq yanapashunkiman congregacionchö más yanapakunëkipaq o cargoyoq kanëkipaq? Tsëpaqqa yanapashunki ‘santu espiritupa muneninmanno cawanqëkim’, o llapan kawënikichö santo espíritu yanapashunëkita haqinqëkim (Gal. 6:8). Allim sinchikunantsik ‘mana alli munenintsicta rurar’ mana kawakunapaq, tsëmi imëka kapoqyoq këpita y kushikunapaq rurëpitapis cuidakunantsik, manaqa ushakäratsinmanmi Jehoväta más servita munanqantsikta. Llapan cristiänokunam ‘santu espiritupa muneninmanno cawayänan’, pero ollqukunaqa masmi sinchikuyänan tsënö kawayänampaq, tsënöpam más cargota chaskiyanqa Diospa markanchö más yanapakuyänampaq. Diospa markanchöqa pishinmi anciänokuna y siervo ministerialkuna, tsëmi kë artïculoqa ollqukunapaq qellqakämushqa. Tsëmi wawqikuna animariyaq Jehoväman mañakurirnin kë artïculota shumaq estudiariyänënipaq.

Jehoväpa markanchö más yanapakïta munanqëkita rikätsikï

4, 5. a) ¿Ima cargota chaskiyänampaqtaq ollqukunaqa sinchikuyanman? b) ¿Imanötaq rikätsikuntsik congregacionchö más uryëta munanqantsikta?

⁴ Manam ni pï cristiänopis rasllaqa anciano këman tikrarintsu. Allim sinchikunan tsëta munarqa “alläpa allish trabäjuchö altu cargotam” akrëkan (1 Tim. 3:1, NTCN). Tsë trabäjoqa cristiano mayinkuna imatapis wanayanqankunata alli musyë y yanapëmi (lei Isaías 32:1, 2a). Imatapis munarlla o chaskiyänanrëkurlla rurayanqampa rantinmi pëkunaqa cristiano mayinkunata yanapayänampaq shonqupita patsë churapakäyan.

⁵ Congregacionchö anciano o siervo ministerial këta munaqkunaqa sinchikuyänan Bibliachö pëkunapaq qellqarëkaqta cumpliyänampaqmi (1 Tim. 3:1-10, 12, 13; Titu 1:5-9). Llapan bautizakushqa ollqukunam kënö tapukuyänan: “¿Imëpis yarqïkäku Diospita yachatsikoq, wakintapis animëkäku tsëta rurayänampaq? ¿Cristiano mayïkuna imanöpis këkäyanqanman yarpakachäku? ¿Diospa Palabranta imëpis estudiëkäku? ¿Reunionkunachö imëpis más allitaku comentëkä? ¿Kushishqaku rurä anciänokuna imatapis mandayämaptin? (2 Tim. 4:5.) Kë tapukïkuna rurakunanqa alläpa precïsom.

6. ¿Imatataq rurayanman ollqukuna congregacionchö más cargoyoq kayänampaq?

⁶ ¿Imanötaq hina alistakuyan congregacionchö cargota chaskita munaq cristiänokuna? Tsëtaqa rikätsikunqa santo espïritupa yanapakïninwan shonqunkunachö más sinchiyarninmi (Efe. 3:16). Manam ni pipis anciano o siervo ministerial këta munanmantsu wakimpita más precisaq o mandakoq këta munarllaqa. Tsëpa rantinqa alläpam valoranan tsë cargo chaskïta, espiritual kaqchö poqu cristiänokunalla chaskiptin. ¿Imatataq rurayanman ollqukuna markäkïninkuna o yärakuyninkuna más sinchi kanampaq? Tsëtaqa chaskiyanqa ‘santu espiritupa muneninmanno cawarnin’ (Gal. 5:16, 22, 23). Jehová munanqannö kawarnin y consejayanqanta wiyakurninqa rikätsikuyanqam “waran waran mas cabal alli nuna ticraquica[yanqanta]” (1 Tim. 4:15).

Manam fäciltsu, allim churapakänan

7. ¿Fäciltsuraq cristiano mayintsikkunata yanapë y cuidëqa?

⁷ Cristiano mayintsikkunata yanapë y cuidëqa manam fäciltsu, tsëmi alli churapakänan tsëta ruranampaq. Congregacionchö anciänokunaqa kuyakoq mitsikoqmi kayan, tsëmi altantolla këkäyan cristiano mayinkuna problëmapa pasayaptin yanapariyänampaq. ¿Imanötaq sientikoq apóstol Pablu cristiano mayinkunata yanaparnin? Rikärishun, Corintochö cristiano mayinkunapaqmi kënö qellqarqan: “Tse cartata escribimunä witsanqa allapa llaquishqam shonqücho quecarqä y escribicamuptïpis asta weqepis shicwaramorqanmi. Peru imano carpis allapa cuyayanqaqta musyayänequipaqmi cartacamorqä, y manam llaquitsiyänaqpaqtsu” (2 Cor. 2:4). Këchö rikanqantsiknömi apóstol Pabluqa shonqupita patsë cumplerqan cargo chaskinqanwan.

8, 9. Diospa üshankunata servirnin sacrifikäkoq nunakunapaq Biblia parlanqanta willakaramï.

⁸ Jehová Diospa markanta dirigeq nunakunachöqa imëpis rikakushqa shonqupita patsë uryayanqanmi. Tantearinapaq, Noëqa manam “willarayämanki arcata usharirnin noqapis qamkunawan ëwanäpaq” nirqantsu. Tsënöllam Moisespis Egiptochö täraq israelïtakunata, “Puka lamaryaq chëta tïrayë tsëchönam toparishun” nirqantsu. Y Josuëpis manam, “Jericó markapa perqankuna huchuriptin willarayämanki” nirqantsu. Hina Isaiaspis manam, “¡tsëchömi këkan! Pëta kachë” nirqantsu (Isa. 6:8).

⁹ Santo espíritu munanqanta ruraq nunaqa karqan Cristum, pëqa kushishqam chaskikurqan nunakunata salvanampaq patsaman Teytan kachamuptin (Juan 3:16). ¿Manatsuraq kawënintsikchö rikätsikushwan Jesus kuyamanqantsikta y noqantsikrëkur wanunqanta? Huk anciänom, cristiano mayinkunata imanö rikanqampaqpis kënö nimantsik: “Imëpis alläpam gustamashqa Jesus apóstol Pëdruta kënö ninqan: ‘Üshacunata cuidanqui’. Watakuna pasanqanmannömi rikashqä shumaq animarnin ichikllapis pillatapis parlapanqantsikqa pasëpa yanapanqanta. Cristiano mayïkunata animanäpaq visitëqa alläpam gustëkaman” (Juan 21:16).

10. ¿Imataq ollquta yanapan cristiano mayinkunata Jesusnö yanapanampaq y servinampaq?

¹⁰ Bautizakushqa ollquqa shumaq kuyakïpam tratanan cristiano mayinkunata, Jesus ruranqannö, pëqa kënömi nirqan: “Noqam jamaratsiyashqequi” (Mat. 11:28). Anciano këtaqa munan Diosman markäkurnin y cristiano mayinkunata kuyarninmi. Manam pasëpa mana rurëta puëdepaq sasa trabäjotanötsu rikan. Pero ¿pipis congregacionchö cristiano mayinkunata servita mana munaptinqa? ¿Imatataq ruranman cristiano mayinkunata servita munanampaq?

Shonqupita patsë servita munanëkipaq sinchikï

11. ¿Imataq yanapamäshun cristiano mayintsikta servita munanapaq?

¹¹ ¿Mantsakunkiku congregacionchö más cargota chaskita? Tsënö kaptinqa mañakï Diosman santo espïritunta qoykushunëkipaq, tsënöpa mana mantsakunëkipaq (Luc. 11:13). Rasumpëpaqa Jehovämi yanapamantsik poqu cristiano kanapaq espïritunta qomarnintsik, tsënöpa cargota chaskinqantsikta cumplinapaq (Fili. 2:13; 4:13). Tsëmi alläpa preciso santo espïritunta mañakunantsik (lei Salmo 25:4, 5b).

12. ¿Imatataq rurashwan congregacionta shumaq diriginapaq yachëta tarinapaq?

¹² Wakin cristiänokunaqa mantsakuyanmi congregacionchö cargota chaskita, cristiano mayinkunata yanapë alläpa sasa kanqantanö rikarnin. O wakinqa mantsakuyan tsëta rurayänampaq mana yachayanqanta yarparninmi. Tsënö karqa más yachakuyanqa Bibliata y publicacionkunata más estudiarninmi. Allim kënö tapukunkiman, ¿alliku patsätsishqä tiempota Bibliata estudianäpaq y yachënï Dios qoykamänampaq mañaköku? Kënömi nirqan discípulo Santiagu: “Sitsun meqequicunapapis yacheniquicuna pishenqa, Dios Yayaman mañaquicuyë. Pëqa llapan nunatam atsca yachenin qoyconqa, mana ajayashpa” (Sant. 1:5). ¿Creinkiku Santiagu qellqanqanta? Yarpäshun, Salomonpis Diosman mañakunqampitam chaskirqan “yachaq y käyikoq shonquta”, tsëmi musyarqan juzganqan hara ima alli y ima mana alli kanqantapis (1 Rey. 3:7-14). Awmi, manam Salomontanötsu pasëpa yachënintsik qoykamäshun. Tsënö karpis Jehoväqa markanchö dirigeq cristiänokunataqa yachëninta qoykamäshun üshankunata shumaq rikänapaq (Pro. 2:6).

13, 14. a) ¿Imachötaq yanaparqan Pabluta Cristupa kuyakïnin? b) ¿Imachötaq noqantsikta yanapamäshun Cristupa kuyakïnin?

¹³ Hina cristiäno mayintsikta más servinapaq yanapakïqa, Jehová y Jesus noqantsikrëkur llapan rurayanqanman yarpëmi. Rikärishun 2 Corintios 5:14, 15 textota (lei). Imanirtaq kënö nintsik: “Jesucristu cuyamanqantsicrecurmi peta shonqucurcur munashqanno cawantsic”. Tsëtaqa nintsik, Jesus alläpa kuyamarnintsik Teytanta wiyakurnin noqantsikrëkur wanunqampita alläpa agradecikurninmi, tsëmi yanapamantsik Jesus munashqannö kawanapaq. Pablutapis Cristupa kuyakïninmi yanaparqan congregacionchö y mëchö këkarnimpis kuyakïwan cristiano mayinkunata rikänampaq.

¹⁴ Jesus nunakunata kuyanqanman yarpanqantsikmi yanapamantsik alläpa agradecido kanantsikpaq. Cuentata qokurquntsikmi ‘etsantsicpa munenincunata’ rurakur o kikintsikpa munënintsikta ashirnin manana kawakunantsikta. Tsëmi tiempontsikta alli patsätsintsik Diosnintsik mandamanqantsikta puntaman churanapaq. Kuyakurninmi, cristiäno mayintsikkunata esclävonö servinantsik (lei Galatas 5:13). Humilde esclävonö cristiano mayintsikta servirninqa imëpis respëtowanmi tratashun, manam imëpis mana allita parlashuntsu pëkunapaq, manam contran churakäshuntsu, tsëqa Satanaspa munëninmi (Apo. 12:10).

¿Imanötaq familia yanapakun?

15, 16. Huk cristiano anciano o siervo ministerial këman chänampaq, ¿precïsotsuraq familian yanapanan?

¹⁵ Huk teyta anciänonö o siervo ministerialnö congregacionchö servinampaqqa puntata rikäyan Biblia ninqannö warmin y wambrankuna imanöpis këkäyanqantaran. Familiam espiritual kaqchö imanöpis këkanqanmi rikätsikun tsë cargota chaskinampaq o mana chaskinampaq kaqtapis. Këqa alli clärom rikätsikun huk cristiano anciano këman o siervo ministerial këman chänampaqqa familian yanapakunqan alläpa preciso kanqanta (lei 1 Timoteu 3:4, 5, 12).

¹⁶ Jehoväqa alläpam kushikun familiachö llapankuna yanapakuyaptin (Efe. 3:14, 15). Huk lädopaqa familiankunata dirigeqqa allin tiemponta patsätsinan congregacionchö rurëninkuna familianta diriginanta y shumaq rikänanta mana haqitsinampaq. Alläpa precïsom anciänokuna y siervo ministerialkuna cada semana familianwan Bibliata estudiayänampaq tiempota patsätsinan. Y manam familianwan cada semana estudiananllatsu, sinöqa yanaqänanmi Jehoväpita yachatsikoq ëwaptimpis. Alläpa precïsom llapan familia teyta decidenqanta wiyakuyänan y yanapakuyänan.

Cargota congregacionchö yapë chaskinëkipaq sinchikï

17, 18. a) ¿Imatataq ruranman huk cristiano yapë congregacionchö cargota chaskinampaq? b) ¿Imanötaq portakunman huk cristiano anciano o siervo ministerial këta haqishqa karnimpis?

¹⁷ Itsa puntataqa siervo ministerial o anciano karqëki, pero tsëpitaqa haqirirqëki tsë cargota. Awmi Jehovätaqa kuyëkankillam, y tsënöllam pëpis kuyashunki (1 Ped. 5:6, 7). Pero cargota haqinqëki hora itsa niyäshurqëki imachöpis más sinchikunëkipaq. Tsënö kaptinqa listom këkänëki imachöpis pantanqëkita Diospa yanapakïninwan altsanëkipaq. Ama piñashqallaqa kakïtsu. Yachaq kanqëkita rikätsikï y shumaq wiyakï consejayäshunqëkita. Huk wawqim willakun atska watapana anciano këninta haqinqampita: “Churapakarqämi imëpis reunionkunaman ëwanäpaq, Jehoväpita yachatsikoq yarqunäpaq y Bibliata leinapaq anciano këkar ruranqänö, y tsëtam rurarqä. Pacienciawanmi shuyarqä, pensarqä huk o ishkë watallachö yapë anciano karinätam, pero casi qanchis watachöran kutirqä. Tsënö ruranapaqqa yanapamarqan mana qelanänapaq y sinchikunapaq wallapäyamanqanmi”.

¹⁸ Qampis tsënöpa pasëkarqa ama alläpaqa yarpakachëtsu. Yarpë servikanqëkipita qamta y kastëkita imanöpis Jehová bendecikämunqanta. Familiëkita yanapë espiritual kaqchö más sinchi kayänampaq, watukë congregacionchö qeshyëkaqkunata, y animë qelanëkaqkunata. Ama haqitsu Diospita yachatsikoq yarqïta y Jehoväta Testïgonnö alabëta (Sal. 145:1, 2; Isa. 43:10-12).c

Alli rikë ima tsapëkäshunqëkitapis

19, 20. a) ¿Ima invitaciontataq chaskiyan llapan bautizakushqa ollqukuna? b) ¿Imatataq yachakushun qateqnin kaq artïculochö?

¹⁹ Kananqa imëpitapis masmi pishin anciänokuna y siervo ministerialkuna. Tsëmi animayaq llapan bautizakushqa ollqukunata, tsë cargota chaskiyänampaq imanöpis këkäyanqanta rikäkuyänampaq, y kënö tapukuyänampaq: “¿Imataq tsapëkäman kë cargota chaskinäta? Alläpa precïsom santo espïritupa yanapakïninta mañakuyänan. Tsënöpam shumaq rikäyanqan kë preciso rurëta.

²⁰ Congregacionchö llapan cristiänokunam atska yanapakïta chaskiyan anciänokunapita. Rikanqantsiknömi shonqupita patsë cristiano mayintsikta yanaparninqa alläpa kushikuntsik y ‘santu espiritupa muneninmanno cawantsik’. Pero tsënö kaptimpis alläpam cuidakunantsik santo espïrituta mana llakitsinapaq. Qateqnin artïculochömi yachakushun tsëta mana ruranapaq.

[Päginapa ura kuchunchö willakïkuna]

¿Yachankiku respuestanta?

• ¿Tiempontsikchö ima kanantataq willakurqan Miqueas 5:5?

• ¿Ima ninantaq cristiano mayintsikta esclävonö serviqa?

• ¿Imatataq ruranantsik cristiano mayintsikta servita munanantsikpaq?

• ¿Precisantsuraq familia yanapakunan huk cristiano anciano o siervo ministerial këman chänampaq?

[23 kaq päginachö dibüjukuna]

¿Imanötaq huk cristiano rikätsikun congregacionchö más cargota chaskita munanqanta?