Diosman Witi

Alli kaqta o mana alli kaqtapis kikintsik akranapaqmi Diosqa kamamashqantsik

2 REYES 18:1-7

WAMBRAKUNAQA, alli portakoq këta y kawëninchö alli kaqta akrëtapis teytankunapitam yachakuyan. Tsënö karpis, manam llapan teytakunatsu wambrankunata alli kaqta yachatsiyan. Pero tsënö teytayoq wambrakunaqa, ¿teytankunanöllatsuraq hatunyarpis kayanman? Manam, antis Jehová Diosnintsikqa alli kaqta o mana alli kaqtapis kikintsik akranapaqmi kamamashqantsik. 2 Reyes 18:1-7 texto Ezequïaspaq willakunqanmi tsëta rikätsikun.

Ezequïasqa “Judächö rey Acazpa tsurinmi” karqan (versículo 1). Tsë rey Acazqa, Judïokunata Jehová Diosta adoratsinampa rantinmi, Baal nishqan diosta adorayänampaq rurarqan, y tsë Diosta adorarqa nunakunatam wanutsiyaq. Hina tsurinkunata wanutsinqantapis Bibliaqa willakunmi. Hinamampis, pëmi templopa punkunkunata wichqatsirqan y “kikimpaqmi altarkunatapis hinantin Jerusalenchö ruratsirqan”, y tsëkunata rurarmi “Jehoväta piñatsirqan” (2 Crónicas 28:3, 24, 25). Tsënö mana allikunata ruraq kaptinmi, tsurin Ezequías pëpita yachakunampaq allitsu karqan. Pero Ezequïasqa, ¿teytan ruranqanllatatsuraq qatinman karqan?

Manam, antis pëqa hukläya kanqantam rey tikrarir rikätsikurqan. Teytan rey Acazpitaqa, “Jehoväta kushitsinqan kaqkunallatam [Ezequïasqa] imëpis rurarqan” (versículo 3). Manam Diosta haqirqantsu, tsëmi, “manam pënöqa Judäpa mëqan reynimpis karqantsu” nin Bibliapis (versículo 5). Ïdolokunata adorayänanrëkur rurayanqan altarkunata limpu ushakätsiyänampaqmi gobernar qallanqan wata mandakurqan. Hinamampis, Jerusalén templopa punkunkunata yapë kichatsirmi Jehoväta yapë adorayänampaq rurarqan (versículo 4; 2 Crónicas 29:1-3, 27-31). “Pëqa Jehovätam imëpis ashirqan. [...] Y Jehoväqa pëwanmi këkarqan.” (6 y 7 versïculokuna.)

¿Imanirtaq Ezequïasqa teytannö mana allikunata ruraqtsu karqan? Itsa maman Abïaschi allikunata yachatsirqan, y pëpaqqa manam Biblia alläpa parlantsu. O itsa Isaías Diospa kaqta willakunqantachi shumaq wiyakurqan, Isaiasqa manaraqpis Ezequías yuriptinmi Diospa kaqta willakur qallarqan.a Bibliaqa manam willakuntsu pipita Ezequías allikunata yachakunqanta. Pero mana allikunata ruraq teytampitaqa, pë alli rey kanqantam sïqa musyantsik.

Ezequías pasanqanqa yanapanmi wambra këkar imëkapa pasashqakunata y mana alli ruraq teytakunawan winashqakunatapis. Unë pasanqantsikkunata mana cambiëta puëder y tukï pasamanqantsikta mana qonqëta puëderpis, kawënintsikchö imata ruranapaq kaqtaqa kikintsikmi akrëta puëdentsik. Shamoq tiempochö alli kawakunapaqqa, kanankunam alli kaq rurëta akranantsik. Ezequïasnöpis, puëdentsikmi kikintsikpita Jehová Diosta kuyëta y servita. Tsëta rurarqa, alläpa kushishqam kanan witsan kawakushun, y shamoq tiempochöpis Diosnintsik awnimanqantsik shumaq Patsachömi imëyaqpis kawakushun (2 Pedru 3:13; Apocalipsis 21:3, 4). Alli kaqta o mana alli kaqtapis kikintsik akranapaq Diosnintsik kamamanqantsikta musyëqa, ¿manaku yanapamantsik pëta más reqinapaq?

[Päginapa ura kuchunchö willakï]