Diospa Palabrampita yachakushun

¿Wanushqakuna kawariyämunqatsuraq?

Kë yachatsikïmi yanapashunki wakin tapukïnikikunapa respuestanta Bibliëkichö tarinëkipaq. Munaptikeqa Jehoväpa testïgonkunam tapukïnikikunapita yacharatsiyäshunkiman.

1. ¿Wanushqakuna kawariyämunqatsuraq?

Betania markaman Jesus chärinampaqqa, amïgon Läzaruqa chusku hunaqnam wanushqa karqan. Jesusqa Martawan y Marïawanmi Lazaru pamparëkanqanman ëwayarqan, y tsëllamannam atskaq nunakuna chäriyarqan. Martawan Marïaqa, ¡imaraq kushikïkuyarqan turin Lazaru kawariramuptin! (Lei Juan 11:20-24, 38-44.)

Martaqa creeqmi wanushqakuna kawariyämunampaq kaqman. Awmi, Jehoväta llapan sirveqkunaqa imëpis musyayashqam wanushqakunata kë Patsachö kawayänampaq Diosnintsik kawaritsimunampaq kaqta. (Lei Job 14:14, 15.)

2. ¿Imanöraq wanushqakuna këkäyan?

Nunakunata y animalkunata kawatseqqa, kallpa o “espïritum”, pero manam noqantsikqa ëtsayoq y tulluyoq cuerpochö kawaq espïritutsu kantsik (Eclesiastés 3:19; Génesis 7:21, 22). Allpapita rurashqa nunam kantsik (Génesis 2:7; 3:19). Uma o peqa mana kawaptinqa, llapan pensanqantsikkunapis ushakärinmi. Tsëmi Lazaru kawarimurqa wanushqakuna imatapis mäkuyanqanta o hipayanqanta willakurqantsu. (Lei Salmo 146:4; Eclesiastés 9:5, 10.)

Rikanqantsiknömi wanushqakunaqa hipayantsu. Tsëmi, mana alli nunakunam infiernochö hipayan nir yachatsikuyanqanqa mana alli kaq yachatsikï. Tsë yachatsikïqa Dios mana alli kanqantanömi rikätsikun, pëqa pasëpam chikin nunakunata ninawan kayëtaqa. (Lei Jeremías 7:31.)

3. ¿Wanushqakunawan parlashwantsuraq?

Wanushqakunaqa manam parlayantsu (Salmo 115:17). Tsënö kaptimpis, supaykunaqa wanushqa nunatukurmi nunakunata parlapëta puëdeyan (2 Pedru 2:4). Tsërëkurmi Jehoväqa wanushqakunawan parlanata munantsu. (Lei Deuteronomio 18:10, 11.)

4. ¿Pikunaraq kawariyämunqa?

Shamoq mushoq Patsachöqa atska millón nunakunam pamparäyanqampita kawariyämunqa, hina Diospita mana yachakushqa karnin mana allita ruraqkunapis sharkayämunqam. (Lei Lucas 23:43; Hechos 24:15.)

Kawarimoq nunakunaqa Diospita yachakïta y ninqankunata wiyakurnin Jesus wanunqanman markäkïtapis puëdeyanqam (Apocalipsis 20:11-13). Alli kaqta ruraqkunaqa mana wanushpam kë Patsachö kawayanqa. Pero mana allillata rurëta munaqkunaqa ushakäyanqam, y Jesus ninqannömi “cawariyämonqa condenadu cayänanllapaqna”. (Lei Juan 5:28, 29.)

5. Wanushqakuna kawariyämunan, ¿Diosnintsik imanö kanqantataq rikätsimantsik?

Noqantsikrëkur Diosnintsik Tsurinta kachamunqanrëkurllam wanushqakunaqa kawariyämunqa. Këqa Jehová alläpa kuyakoq kanqantam rikätsikun. (Lei Juan 3:16; Romanos 6:23.)

Maslla yachakïta munarqa, Rasumpëpaqa, ¿imatataq Biblia yachatsikun? libropa 6 y 7 capïtulonkunata leiri, këtaqa Jehoväpa testïgonkunam rurayämushqa.

[22 kaq päginachö dibüju]

Adanqa allpapitam karqan