¿Imapitataq yachatsishwan?
“Teyta Diospa palabranqa quiquinpitam shamun, y allim yachatsicunantsicpaq, mana allita rurayaptin willapänantsicpaq, piñapänantsicpaq y allicunallatana ruranantsicpaqpis.” (2 TIMOTEU 3:16.)
WAMBRAKUNAQA Diospita rasumpa kaq yachatsikïtam musyayänan. ¿Y mëchötaq pëpitaqa yachakuyanman? Religionpaq parlaq libropitam, tsëqa Bibliam.
Noqantsikpaqqa Diospita shamoq cartanömi Bibliaqa, tsëchömi qellqarëkan wambrakuna, jövenkuna y mayor kaqkuna imanö kawayänampaqpis. Kananmi rikärishun wakinllata y kë yachatsikïkunaqa pishi wambrakunapaqpis allilla kanqanta.
¿Pëpita imata musyanatataq Dios munan?
◼ Biblia yachatsikunqan: “Llapan nunakuna musyayänampaq qampa shutikiqa Jehovämi, hinantin patsa hanampaqa qamllam Altísimo kanki” (Salmo 83:18).
Yachakunqantsik: Diosqa manam mana kaq kallpatsu, sinöqa rasumpam kawan y shutimpis kanmi.
◼ Biblia yachatsikunqan: “Llapan nunakunapa shonquntam Jehoväqa rikëkan, y imata pensayanqantapis musyëkan. Qam ashiptikiqa, pëta tarinëkipaqmi yanapashunki” (1 Crónicas 28:9).
Yachakunqantsik: Jehoväqa llapantsikpaqmi yarparan y pishi wambrakunatapis manam qonqantsu (Salmo 10:14; 146:9). Pëqa reqinantsiktam munan.
◼ Biblia yachatsikunqan: “Teytannaqta manam hipatsinëkitsu [ñakatsinaykitsu]. Imanöpapis hipatsiptiki [ñakatsiptiki] noqaman mañakamuptinqa, hinan höram mañakamunqanta wiyarishaq” (Éxodo 22:22-24).
Yachakunqantsik: Jehoväqa llapankuna mañakuyanqantam wiyan, hasta pishi wambrakunapatapis. Tsëmi shonquntsikchö pensënintsikkunata y llakikïnintsikkunatapis pëtaqa willashwan.
◼ Biblia yachatsikunqan: “Kutin kutinmi Dios mana munanqanta rurayaq. Y pasëpam llakitsiyarqan Israelpa Santo Diosninta” (Salmo 78:41).
Yachakunqantsik: Imatapis ruranqantsik y parlanqantsikqa Jehoväta kushitsinmanmi o llakitsinmanmi, tsëmi imatapis manaraq parlar o rurar alleqraq yarpachakunantsik.
¿Imanötaq rikashwan noqantsikpita hukläya kaqkunata?
◼ Biblia yachatsikunqan: “Cananqa allim noqa cäyicurerqö llapan nunatapis Dios iwallla ricamanqantsicta. Porqui jinantin marcacho pipis allicunata rurar y Diosta respetar cacuyaptenqa, pëqa chasquinmi” (Hechos 10:34, 35).
Yachakunqantsik: Tukïläya nunakunatam Diosqa kuyan, tsëmi allitsu kanman huk kasta o qaqllankuna noqantsikpanö mana kanqanrëkur chikinqantsikqa.
◼ Biblia yachatsikunqan: “Peman imarecur creyicuyanqequita pipis tapuyäshuptiqui, shumaq cäyitsiyänequipaq listu quecayë” (1 Pedru 3:15).
Yachakunqantsik: Imata creinqantsiktapis mana mantsakushpam parlashwan, pero manam piñëpaqa. Hina tsënöllam respetanantsik noqantsik creenqantsikman mana creeqkunatapis.
¿Imanötaq rikashwan familiantsikta?
◼ Biblia yachatsikunqan: “Wamracuna, papäniquicunata siempri cäsuyanqui. Tsetam Diospis munan cushicunanpaq” (Colosenses 3:20).
Yachakunqantsik: Wiyakoq wambrakunaqa manam papäninkunata kuyayanqanllatatsu rikätsikuyan, sinöqa Diosta kushitsita munayanqantawanmi.
◼ Biblia yachatsikunqan: “Tsenolla jucniqui jucniquipis ima cäsu captinpis awantanacuyë. Y ima ninacushqa carpis, perdonanaquicuyë, [...] [“Jehová”, NM] perdonayäshonqequinolla” (Colosenses 3:13).
Yachakunqantsik: Höraqa familiantsik y wakin nunakunapis llakitsimäshunmi. Pero hutsantsikkunapita Dios perdonamänata munarqa, noqantsikpis wakinkunata perdonanantsikmi (Mateo 6:14, 15).
¿Imanirtaq imachöpis rasumpa kaqllata parlanantsik y kuyakoq kanantsik?
◼ Biblia yachatsikunqan: “Tsemi nuna mayintsiccunata mana ulipashpa rasonpa caqllata willapashwan; porqui noqantsicqa juc castanollanam cantsic” (Efesios 4:25).
Yachakunqantsik: Rasumpa kaqta parlarqa, Diosnö këtam tïrëkantsik y shonquntam kushitsintsik. Pero ulikoq o llullakog këta mäñarqa Diospa chikeqnin Diablunömi tikrëkantsik, pëmi ulikïpa ‘teytanqa’ (Juan 8:44; Titu 1:2).
◼ Biblia yachatsikunqan: “Imanomi munayanqui qamcunapaq nuna mayiquicuna allita rurayänanta, tsenolla qamcunapis pecunapaq rurayë” (Mateo 7:12).
Yachakunqantsik: Yarpänantsikmi y respetanantsikmi familiantsikkunapa y vecïnontsikkunapa pensëninkunata y imanöpis sientekuyanqanta. Imanöpis sientekuyanqanman yarpararnin kuyëpa tratashqaqa, pëkunapis kuyëpam tratamäshun (1 Pedru 3:8; Lucas 6:38).
Kë akrashqa consëjokunata rikanqantsiknömi, Bibliaqa wambrakunata yanapan mayor këman charnin, respetakoq y llakipäkoq o ankupäkoq kayänampaq. Pero ¿pitaq yachatsinman?