¿Pitaq Diospita wambrakunata parlapanman?
“Manam ni meqan disipulupis mayestrunpita mas presisaqtsu. Tse yachacoqqa yachacur usharir, mayestrunnollam canqa.” (LUCAS 6:40.)
WAKIN teytakunaqa alläpa yachaq mana kayanqantam pensayan, tsëmi wambrankunata Diospita parlapäyantsu. Itsachi estudiädo mana kayanqanta o religionpita wambrakunata yachatsiyänampaq mana musyayanqanta pensayan. Tsëmi wambrakunata Diospita yachatsiyänampaq huk familiankunata o religioso pushaqkunata yachatsiyänampaq mañayan.
Pero Diospitaqa, ¿piraq más alliqa yachatsinman wambrakunata? Biblia ninqanta rikärishun y yachaq nunakuna niyanqanwan igualaratsishun.
Teytapa precisaq rurënin
Biblia yachatsikunqan: “Papäcuna mamäcuna, ama wamrequicunata piñatsir quejacatsiyëtsu. Masbien shumaq tantiyatsir willapäyë Teyta Jesucristu munanqanno cawacuyänanpäq” (Efesios 6:4).
Yachaq nunakuna niyanqan: ¿Imanötaq teytata yanapan creinqankunaman alli markäkunqan o yärakungan? 2009 watachö tsëpaq estudiayanqampita huk librom kënö nirqan: “Huk religionyoq nuna kaptinqa yanapanmi alli teyta kanampaq. Religionqa yanapakunmi wakin nunakunawan imanö kawakuyänampaqpis yachatsirnin, hina kawëninkunachö imanö kawakuyänampaq kaqtapis” (Fathers’ Religious Involvement and Early Childhood Behavior [Teytakuna religioso kayanqan y wambrakuna imanö portakuyanqan]).
Bibliachöqa wambrakunata cuidëchö y yachatsichö teytapa yanapakïnin alläpa precisanqantam nin (Proverbios 4:1; Colosenses 3:21; Hebreus 12:9). Pero ¿tsënöllaku pensayan kanan witsankunapis? 2009 watachömi Universidad de Florida nishqan qellqarqan huk teyta wambrakunata imanö yanapanqanta. Kë yachaq nunakunam musyariyarqan teyta kaq pishi wambrankunata yachatsirnin yanapaptinqa, kë wambrakuna más kushishqa kayanqanta y wakinkunatapis yanapëta munayanqanta. Jövenkunam más alli portakuyaq y shipashkunatam saludninchö más alli kayaq. Awmi, Biblia yachatsikunqanqa kanan kamayaqpis allillam.
Mamapa precisaq rurënin
Biblia yachatsikunqan: “Mamëkipa leyninta ama haqitsu” (Proverbios 1:8).
Yachaq nunakuna niyanqan: Wambrakuna imanö pensayanqanta parlaq librom 2006 watachö kënö nirqan: “Mamakunaqa teyta kaqkunapita masmi wambrankunawan tiempota pasayan, y tsënöllam wakin nacionkunachöpis pasakun” (Handbook of Child Psychology). Wambrakuna mamankunawan tsënö más tiempo pasayaptinmi, parlanqampita, ruranqampita y imanö portakunqampita wambrakuna yachakuyan.
Teytawan mama wambrakunata Diospita junto yachatsirqa, ishkë alläpa väleq qarënin qoykaqnömi kayan. Huk kaqqa, wambrankuna Jehoväwan alli kayänampaq yanapayanqanmi, tsëmi yanapanqa llapan kawëninchö alli kayänampaq. Y ishkë kaqnam, huk ollqu y huk warmi junto imakunatapis rurayanqan wambrakunapis tsënölla rurayänampaq yanapanqa (Colosenses 3:18-20). Huk nunakuna teytakunata yanapëta puëdeyaptimpis, teyta kaqkunam wambrakunataqa Diospita y familiachö kushishqa kawayänampaq shumaq consejäyänan.
Tsëqa, ¿imanötaq yachatsiyanman? ¿Imanötaq rurayanman shonqunkunaman chäyänampaq?