Diosman witi

“Oh Jehová, qamqa [...] reqimankim”

“HUK nunataqa, ni pï pëpaq yarpanqanta o ni pï pëta entiendenqanta musyënöqa manam imapis llakitsinmantsu” nirqanmi librokunata qellqaq Arthur H. Stainback shutiyoq nuna. ¿Tsënöku qampis pensanki? ¿Imapa pasëkanqëki o imanö sientekunqëkipis ni pita ima qokunqantaku pensanki? Tsënö kaptinqa alläpachi kushikunki Jehová hukläya kanqanta musyar. Pëqa llapan sirveqninkunapaqmi yarpachakun, tsëmi kuyakoq karnin llapan pasayanqanta rikëkan. Tsënö kanqantam David rikätsikun Salmos libropa 139 capïtulonchö.

Davidqa allim musyarqan Dios precisaqpaq churar pëpaq yarparanqanta. Tsëmi kënö nirqan: “Oh Jehová, qamqa chipyëpam rikämarqunki, y reqimankim” (1 kaq versículo). ¡Imanö shumaq y entiendillapaqmi David ninqanqa! Kë versïculochö “rikämarqunki” nir traduciyanqan Griego idiömapita shamoq palabrataqa, patsata oqtir mineralkunata ashiyanqampaq parlarpis utilizäyaqmi (Job 28:3), hina huk sitiota reqipakïpaq parlarpis (Jueces 18:2). Y pipis culpayoq kanqanta o mana kanqanta musyapakïpaq parlarpis (Deuteronomio 13:14). Jehoväqa llapan kawënintsikta rikashqa karninmi paqwë reqimantsik. Davidqa “rikämarqunki[m]” nirqanmi, y tsëmi rikätsikun Jehoväqa cada sirveqninta rikëkanqanta. Cada ünotam imanö kanqantsikta rikämantsik alli reqimänantsikrëkur.

Hina Davidqa Jehová mëyaq reqimanqantsiktam rikätsikun kënö nirnin: “Qamqa rikëkämankim hamakuptï y sharkuptïpis. Karullapitanam imata pensanqätapis musyarqunki” (2 kaq versículo). Ciëlochö tärarninmi Jehoväqa karullapita rikämantsik, tsënö karpis, musyanmi alli trabajarir imë höra hamanqantsikta, y imë höra shärikunqantsiktapis. Hina imata pensanqantsikkunatapis musyanmi. ¿Mantsakarqanku David tsënö imë hörapis Jehová rikëkanqanta musyar? Manam, antis tsëta imëpis ruranantam munarqan (23 y 24 kaq versïculokuna). ¿Imanir?

Musyarqanmi imarëkur Jehová sirveqninkunata paqwë rikanqanta. Y, ¿imarëkurtaq Jehová rikaq? 3 kaq versïculochömi Jehoväpaq David kënö nirqan: “Mëpa ëwanqäta y mëchö hitaranqätapis qamqa tupurqunkim, y llapan nänïkunatam paqwë reqinki”. Llapan hunaqkunam Jehoväqa nänintsikkunata rikan: pantanqantsikkunata y allita ruranqantsikkunatapis. Y, ¿imatataq más rikan? ¿Alli kaqkunataku o mana alli kaqkunataku? Hebreo idiömachö “tupi” nishqan palabraqa, hina “cerninapa pasatsi” o “ventë” o “hitë” ninanmi, tsëtam chakra muroqkuna rurayan päjapita gränota rakiyänampaq. Y tsë versïculochö “paqwë reqinki” neq hebreo palabranam, hina “alläpa kuyar katsi” ninan. Tsë llapanmi rikätsikun sirveqninkuna parlayanqanta y rurayanqanta cada hunaq Jehová rikarqa, alli kaqllata akranqanta. Pëqa alläpam kushikun kushitsiyänanrëkur sinchikuyanqanta rikar.

Salmos libropa 139 kaq capïtulonchö ninqanqa rikätsikun sirveqninkunata Jehová alläpa kuyanqantam. Manam huk hunaqllapis pasarintsu sirveqninkunata pë mana rikaptin y pëkunapaq mana yarpachakuptinqa. Tsënöpam ima problëmakunapa pasayanqanta, hipayanqanta y ima yarpachakïninkuna kanqanta musyan. Dios tsënö kuyakoq kanqanta musyëqa, ¿manaku yanapashunki pëta servinëkipaq? Tsënö karqa Biblia kënö awnikunqanta yarpë: “Dyosqa manam injustutsu qonqarïkunampaq rureynikikunata i [jutinrëkur] uryeynikikunata” (Hebreus 6:10, QKW).