¿Ulipäyäshurqunkitsuraq?

PIPIS markäkunqantsik ulipämanqantsikta o llullapämangantsikta musyarirqa alläpam llakikuntsik. Itsa tsëta rurëkamashqaqa paqwë penqakushwan, piñakushwan o traicionashqa sientekushwan. Ulikïqa amigo këta y casado kawakïtapis ushakäratsinmi, hina tsëpa culpanmi wakin nunakunaqa mëtsika qellëninkunata oqrayan.

Tsëqa, ¿imanöraq sientekunkiman Diospita ulipäyäshunqëkita musyarir? Diosta kuyaq kaptikiqa alläpachi llakitsishunkiman tsëta musyarinqëkiqa, itsachi kë nunakunanö sientekunkiman:

● “Religionnï ulipämashqa kanqanta musyarirqa alläpam llakikurqä.” (DEANNE.)

● “Pasëpam piñakurqä. Llapan shuyakunqäkuna y rurëta munanqäkuna mana kaqllapaq kanqanta mäkurirqa alläpam llakikurqä.” (LUIS.)

Itsa Diospita yachanqëkiqa mana rasumpa kanqan creiqa sasa kanman. Itsa pipis markäkunqëki y alli kawakunëkita munaqkunapita yachakurqëki: itsa teytëkikuna, huk sacerdote, huk pastor o huk kuyashqa amïguïki. Itsa wambra kanqëkipita patsë yachatsiyäshunqëkikunamanqa creinki. Pero pï më creiyanqan yachatsikïpis mana rasun kaq kanmanmi. Estados Unïdospa unë presidenten Franklin D. Roosevelt ninqannöpis, “huk ulikïqa mëtsika tiempopa parlayaptimpis, manam rasumpamanqa tikrantsu”.

¿Imanöraq musyashwan unëpitana creinqantsikkuna rasumpa kanqanta o mana rasumpa kanqantapis? Teytanman mañakurmi Jesus kënö nirqan: “Gampa Palabrayquiga rasumpacagmi” (Juan 17:17, NTCN). Tsëqa rasunmi, Diospa Palabran Bibliaqa yanapamantsik mëqan yachatsikï rasumpa o mana rasumpa kanqanta musyanapaqmi.

Rikärishun Diospaq pitsqa yachatsikïkuna mana rasumpa kanqanta Biblia imanö rikätsikunqanta. Cuentatam qokurinki rasumpa kaqta musyëqa kawënikichö imanö yanapashunqëkita.