Diospa Palabrampita yachatsikïkuna

¿Imanötaq Diospa leyninkuna yanapamantsik?

Kë yachatsikïmi yanapashunki wakin tapukïkunapa respuestanta Bibliëkichö tarinëkipaq, y tsë tapukïkunataqa itsa qampis rurakushqanki. Munaptikiqa, Jehoväpa testïgonkuna yanapariyäshunkimanmi kë tapukïkunapa respuestanta más yachakurinëkipaq.

1. ¿Imanirtaq Diosta wiyakunantsik?

Kamamaqnintsik kaptinmi Diostaqa wiyakunantsik. Jesuspis llapan kawëninchömi Teytanta wiyakurqan (Juan 6:38; Apocalipsis 4:11). Diospa leyninkunaqa yanapamantsik pëta kuyanqantsikta rikätsikunapaqmi. (Lei 1 Juan 5:3.)

Llapan leyninkunam biennintsikpaq. Kanan witsan alli kawakïta y shamoq tiempochö mana ushakaq bendicionkunata imanö tarinapaqmi yachatsimantsik. (Lei Salmo 19:7, 11 y Isaías 48:17, 18.)

2. ¿Imanötaq Diospa leynin yanapamantsik alli saludyoq kanapaq?

Washkuta alläpa mana upyanapaq nimanqantsikqa, yanapamantsik accidentekunaman y wanutsikoq qeshyakunaman mana chänapaqmi. Alläpa upyëqa huk viciom tikrarin y tukï mana allikunatam ruratsikun (Proverbios 23:20, 29, 30). Jehoväqa manam michämantsiktsu washkuta ichikllata upyarinataqa, tsënö kaptimpis, alläpa mana upyanapaqmi nimantsik. (Lei Salmo 104:15 y 1 Corintios 6:10.)

Hina Diosqa nimantsikmi chikikoq kë, piñakoq kë y maskunapis saludnintsikpaq mana alli kanqanta. Pë nimanqantsikta imëpis wiyakurqa más alli saludyoqmi kawakushun. (Lei Proverbios 14:30; 22:24, 25.)

3. ¿Imakunapitataq tsapämantsik pununakïpaq parlaq Diospa leynin?

Diospa leyninqa michäkunmi mana majankunawan pununakïta (Hebreus 13:4). Tsëta wiyakoq majakunaqa yamëmi kawakuyan y wambrankunatapis más shumaqmi wätayan. Pero mana majankunawan pununakoqkunaqa, tukï qeshyakunawan muyashqa këman, juezkunaman ëwëkur rakikëman, maqanakïman, waqatsinakïman y hapallankunalla wambrankunata wätëmanmi chäyan. (Lei Proverbios 5:1-9.)

Kë leyta wiyakunapaq imëpis kallpachakurqa, Dioswan amigo kënintsikta manam oqrashuntsu. Hina wiyakunqantsikqa yanapamantsikmi wakinkunata mana llakitsinapaqpis. (Lei 1 Tesalonicenses 4:3-6.)

4. ¿Imanötaq yanapamantsik kawëta respetanqantsik?

Dios qaranqan kawëta respetaqkunaqa, cigarro shoqïta, coca chaqchëta, y más vicionkunatam haqiyan kawëninkunata peligroman churaptin (2 Corintios 7:1). Kawëqa Diospaq alläpa valoryoqmi, hina mamampa pachanllachöraq këkaq llullupa kawënimpis (Éxodo 21:22, 23). Tsëmi manaraq yurikushqa wambratapis hitaratsintsiktsu. Hinamampis, Dios ninqanta precisaqpaq churaqkunaqa, trabäjonkunachö, wayinkunachö y cärronkunachö ima accidentepis mana kanampaqmi prevenikuyan (Deuteronomio 22:8). Hina kawëninkunata peligroman churaq pukllakunatapis manam pukllayantsu, kawëqa Diospa qarënin kanqanta alli musyarnin. (Lei Salmo 36:9.)

5. ¿Imachötaq yanapamantsik yawar sagrado kanqan?

Nunakunapa y animalkunapa yawarninqa kawënin o alman cuenta kanqantam Diosqa nimantsik, tsëmi yawarqa alläpa sagrado (Génesis 9:3, 4). Diospa leynimpaq yawar kawënölla alläpa valoryoq kanqanqa yanapamantsikmi. ¿Imanir? Porque tsë leyrëkurmi Dios hutsantsikkunapita perdonamantsik. (Lei Levítico 17:11-13 y Hebreus 9:22.)

Hutsannaq kaptinmi Jesuspa yawarninqa ima yawarpitapis más valoryoq karqan. Nunakunarëkur wanurirmi Jesusqa kawënin cuenta yawarninta Diosta qorqan (Hebreus 9:12). Yawarninta ramashqa kaptinmi mana wanushpa kawakïta puëdentsik. (Lei Mateo 26:28 y Juan 3:16.)

Maslla yachakïta munarqa, Rasumpëpaqa, ¿imatataq Biblia yachatsikun? libropa 12 y 13 kaq capïtulonkunata leiri, kë librotaqa Jehoväpa testïgonkunam rurayämushqa.