LEYEQKUNA TAPUKUYANQAN

Pornografïata rikaräkoq cristiänuqa, ¿congregacionpita qarqushqatsuraq kanman?

Awmi, qarqushqa këta puëdinmi. Tsëmi pornografïataqa ni imanö kaqtapis rikänantsiktsu: melanëpaq rurëkunata munapätsikoq revistachö fötukunata, pelïculakunata, vidëukunata, Internetpa yarqamoq kaqkunata ni qellqashqa kaqkunatapis leyinantsiktsu.

Kanan witsanqa, më tsëmanmi pornografïa chashqa. Internetchömi mas fäcil-lla tariyan, tsëmi wamrapis, jövinpis, mayorpis, awkimpis ishkiyashqa pornografïa rikëman. Wakinkunaqa mana munëkarmi tsëman ishkiyashqa. Y wakinkunanam kikinkuna munarnin, wayinkunachö o oficïnankunachö pakëllapa rikäyashqa. Tsëmi cristiänu kaqkunaqa pornografïa rikëpita alleq cuidakunantsik. ¿Imanir?

Imanir mana alli kanqantaqa Jesusmi kënö nirqan: “Pipis juc warmita riquecur munapäreq caqqa, jucwan punanacureqnonam carishqa” (Mat. 5:28). Casädu këkar ollquwan warmi kushikuyänanrëkur pununakuyanqanqa (ruranakuyanqanqa) allillam (Prov. 5:15-19; 1 Cor. 7:2-5). Peru pornografïaqa, Jesus condenanqan mana alli pensëkunatam yuritsin. Tsëmi pornografïata leyeq kaq y rikaq kaqqa, Diosnintsik kënö nir mandakunqanta wiyakïkantsu: “Imëka wanutseq cuenta, cuerpïkikunapa munëninta jaqiriyë: rakcha ruranakïta, tukïläya rakcha rurëkunata y pitapis rikaparnin munapëta, mana allita yarparnin imëkapaqpis ërrayëta y jukpa imantapis munapëta, porqui tsëkunaqa imëka ïduluta adorë cuentam” (Col. 3:5, NM).

Juk cristiänu, juk o ishkë kuti pornografïata rikashqa karqa alläpa peligruchömi këkan. Itsa Asafnöpis alläpa peligruchö këkanman, pëmi kënö nirqan: “Chakïkunaqa ichikllapam mana allipa cäsi ëwakurqan, mana alliman cäsim ishkirirqan”. Warmita o ollquta qalapächu këkaqta o juk warmiwan ollqu ruranakïkaq pornografïata rikashqa karqa, manam conciencian allitsu kanqa, ni Diospa rikëninchöpis limpiutsu sientikunqa. Tsëpa rantinqa Asafnömi sientikunqa, pëmi kënö nirqa: “Llapan junaqmi castigashqa karqö, y llapan qoyam piñapashqa karqö” (Sal. 73:2, 14).

Juk cristiänu tsë jutsaman ishkishqa karqa, yanapayänanta wananqantam cuentata qokunan. Bibliam nin tsë yanapakïtaqa congregacionchö tarinampaq kaqta: “Wawqikuna, juk nuna mana alli kaqta ruraptinqa, qamkuna Diospa kaqchö alli këkaqkuna, tsë nunata shumaq kuyëpa consejayë, alli kaqta ruranampaq, peru qampis cuidakunki, jutsaman mana ishkirinëkipaq” (Gäl. 6:1, NM). Awmi, juk o ishkë anciänukunam yanapayänan, y Dios ‘kachakätsinanman’ y perdonananman markäkurmi mañakuyänan (Sant. 5:13-15, NM). Pornografïa rikëman ishkishqa kaq cristiänukuna tsëta jaqiyänampaq yanapayänanta ashirqa Asafnömi sientikuyan, pëmi nirqan: “Noqapaqqa alläpa allim Diosman witiqa” (Sal. 73:28).

Tsënö kaptimpis, apostul Pabluqa kënömi nirqan: “Manaran arrepentikuyarqunkitsu, tukïläya rakcha rurënikikunapita, y rakcha ruranakïnikikunapita, y mana penqakur mana allikunata rurayanqëkikunapita” (2 Cor. 12:21, NM).a Juk yachaq nunam entienditsikurqan, “tukïläya rakcha rurënikikunapita” nirqa, “pasëpa melanëpaq kaq rakcha rurëkuna” kanqanta. Rasumpa kaqchöqa, wakin pornografïakunaqa manam qalapächu këkäyaqta, o juk warmiwan juk ollqu ruranakïkaqta rikënöllatsu, sinöqa pasëpa rakcha kaqkunatam rikätsikun. Wakinkunaqa këkunatam rikätsikun: warmipura o ollqupura ruranakur këkaqta, atskaq juntakëkur ruranakïkaqta, animalkunawan ruranakïkaqta, qalapächu wamrakunata munapäyänampaq, atskaq juntakëkur pitapis violëkaqta, warmita mana alli tratar y maqar violëkaqta y gustunta tarinanrëkur pitapis watëkur sufritsir rurëkaqta. Apostul Pabluqa nirqan, tsë nunakunapaqa yarpëninkuna manana kaptin y shonqunkunapis chukruyashqana kaptin, tsë rakchakunaman ishkiyanqantam, kënömi nirqan: “Tsënö lluta kawakurnam, mana penqakur mana alli rurëkunaman ishkiyashqa, tsënöpa tukïläya rakcha rurëkunata mana utishpa rurakuyänampaq” (Efes. 4:18, 19, NM).

Jina Pabluqa Gälatas 5:19 (NM) textuchöpis ‘tukïläya rakcha rurëkunapaq’ parlarqanmi. Tsë palabrakuna imata entienditsikunqampaq parlarninmi juk yachaq nuna kënö nirqan: “Tsëchöqa parlëkan Diosnintsik mana permitinqan mana alli kaq munëkunapaqmi”. Rasumpa kaqchöqa, pornografïa rikätsikunqankunapaqqa, ¿piraq limpium ninman? Tsëkunaqa kayan, Diosnintsik mana permitinqan mana alli munëkuna, alläpa rakcha kaqkuna, y pasëpa mana alliman tikrashqa kaqkunam. Gälatas 5:19-21 (NM) textuchömi apostul Pablu cläru willakurqan, tsënö rakchakunata “ruraqkunaqa” “Diospa Gobiernunman mana yëkuyänampaq” kaqta. Tsënö këkaptinqa, ¿imaraq pasakunman juk cristiänu atska killapa o watakunapa pasëpa mëlanëpaq y alläpa rakcha ruranakïkaqkunata rikätsikoq pornografïata rikaräkushqa kaptinqa? Mana arrepentikuptin y tsë viciuta mana jaqiptinqa congregacionpitam qarqushqa kanman, tsënöpa congregacionchö kaqkuna limpiu y juknölla imëpis këkäyänampaq (1 Cor. 5:5, 11).

Wakinkunaqa tsënö mëlanëpaq pornografïata rikashqa karmi, anciänukunata ashiyashqa yanapayänampaq, y tsë viciuta jaqiyänampaq imëkata rurayashqa. Jesusmi unë witsan Sardis congregacionta kënö nirqan: “Llapan ushacänanpag caycag criyicuyniquicuna quëdashgata shumag cuiday [...] Tsaymi yarparar cäsuyay alli yachatsicuyta wiyarnin chasquiyangayquita. Tsaynölla llapan mana alli rurayniquita dëjasquir arepenticurnin allicunallatana cumplir rurayay. Pero si imayca ricchagnö shuyararnin mana arepenticuyaptiquiga, imay öra carpis suwa shamugnömi mana musyangayqui öra cutimushag” (Apoc. 3:2, 3, NTCN). Awmi, puëdiyanmi arrepentikïta y “nina” cuenta ushakätsikoq pornografïata jaqita (Jud. 22, 23, NM).

Tsënö kaptimpis, alläpa allim kanman pornografïaman mana ishkinapaq alli tsarakunantsik. Awmi, ¡pornografïa rikëpita imëkanöpapis cuidakïkushun!