Kushishqam awnikuyarqan yanapakuyänampaq Noruëgachö

PASAQ watakunam, 50 watayoqkunanöna Roaldwan Elsebeth matrimonio, Noruëgapa Bergen markanchö täräyaq, y congregacionninkunachömi kushishqa yanapakuyaq. Isabelwan Fabianmi wamrankuna kayarqan. Roaldqa anciänom karqan y Elsebethnam precursora, y Isabelwan Fabiannam alli publicadorkuna kayarqan.

Tsënö këkarninmi kë familiaqa, karu markachö juk semänapa Diospita yachatsikuyänampaq churapakäyarqan. Tsëmi, 2009 wata, septiembre killachö, Roald, Elsebeth y 18 watayoq Fabian wamrankunawan viajayarqan Nordkinn sitioyaq, tsëqa këkan círculo polar ártico nishqampa norte kaq lädonchömi. Nordkinn sitiochömi këkan Kjøllefjord marka, y tsë karu markaman ëwashqa cristiano mayinkunawan juntom yachatsikuyarqan. Roaldmi kënö nin: “Qallanan junaqkunaqa kushishqam sientikurqä juk semänapa yachatsikoq ëwanärëkur llapan rurënïkunata patsätsishqa o kamakätsishqa kar”. Pero tsënö këkaptinmi, juk yarpachakïnin yuririrqan. ¿Imataq karqan?

MANA PENSAKUYANQANTA TAPURÏYAN

Roaldmi willakun: “Finnmarkchö täraq Mario jutiyoq precursormi, Lakselv markachö 23 publicadoryoq congregacionman yanapakoq ëwëta munayanqäta o mana munayanqätapis tapurayämarqan, tsëta tapuyämänantaqa manam pensarqätsu”. Roaldqa mantsakashqam tsëta tapïkuyaptin quedarirqan. Kënömi nin: “Elsebethwan noqaqa más publicadorkunata necesitäyanqan markakunachö imëllapis yanapakuyänäpaqmi parlayashqa kayarqä. Pero wamräkuna winarir wayipita ëwakuyaptinraq tsëta rurayänäpaq kaqtam niyarqä”. Tsënö kaptimpis, tsë sitiochö yachatsikïkarmi Roaldqa cuentata qokurirqan tsë markachö nunakunaqa Diospita yachakïta alläpa munayanqanta. Tsë hora yanapayänantam tsë nunakunaqa necesitäyarqan. Roaldmi yarpan: “Mario tapumanqantaqa alläpam yarpararqä y atska paqaskunam punutsimarqantsu”. Marioqa munarqan Roaldwan familian Lakselv markachö ichikllan congregacionta reqiyänantam, tsëmi cärronwan 240 kilömetrosta aparqan Kjøllefjordpa sur kaq lädopa.

Tsë congregacionpita Andreas anciänom, tsë markata y Diospita yachatsikuna wayita reqitsirqan. Roaldtawan Elsebethtaqa cristiano mayinkunam kushishqa chaskiriyarqan, jina niyarqanmi familianwan yanapakoq ëwayaptinqa alläpa kushikuyänampaq kaqta. Andreasmi nirqan Roaldwan Fabian trabajayänampaq piwampis parlanampaq kaqta musyanqanta. ¿Imataraq rurayanman karqan Roaldwan familian?

¿IMATA RURAYÄNAMPAQTAQ CHURAPAKÄYARQAN?

Fabianqa rasllam kënö nirqan: “Manam këchö tärëta munätsu”. Manam munarqantsu tsë ichikllam markachö tärëta y congregacionninchö winayanqan amïgonkunata dejëta. Jinamampis, electricistapaq estudiëkanqantaqa manaraqmi ushashqaraqtsu karqan. Pero 21 watayoq Isabelta tsë markata yanapakoq ëwanampaq tapukuriyaptinmi kënö nirqan: “¡Tsë rurëtam imëpis munarqö!”. Tsënö nirpis këtam nin: “Más yarpachakurninmi, más tapukoq kä, ruranäpaq kaq alli o mana alli kanqanta. ¿Amïgökunata llakishaqtsuraq? ¿Congregacionnïchötsuraq quëdaköman imatapis mana faltapakurnin kawakunäpaq?”. Y Elsebethpis kënömi nin: “Juk precisaq rurëta Jehová qoykäyämanqantam sientirqä, tsënö kaptimpis, tsëraq altsarishqa wayïkunaman y 25 watapana imëkakuna juntayanqämampis pensarmi qallëkurqä”.

Tsë yanapakuyanqan semana ushariptinmi, Roaldwan familianqa Bergenman kutikuyarqan. Y Lakselv markachö cristiano mayinkuna 2.100 kilómetros karunchö këkäyaptimpis, pëkunaman pasëpam yarparäyarqan. Jina Elsebethqa kënömi nin: “Mëtsika kutim Diosman mañakurqä, y Lakselvchö reqinakunqä cristiänokunawanqa qayanakïkäyarqällam. Mandanakuyaqmi kayä fötokunata, y experienciäkunatapis willanakuyaqmi kayä”. Roaldmi jina nin: “Tiempotaraqmi necesitarqä yanapakoq ëwëta decidiyänäpaq. Jina imanö mantenikuyänäpaq kaqtapis yarpachakuyarqäraqmi. Mana dejëpam Diosman mañakoq kä, familiäwan y poqu Testïgokunawanmi parlarqä”. Fabianmi nin: “Más yarpachakurmi, cuentata qokoq kä mana ëwanäpaqqa imapis mana tsapämanqanta. Alläpam mañakurqä, y yanapakoq ëwëta munënïqa masmi mirarqan”. ¿Y imataq pasarqan Isabelwanqa? Yanapakoq ëwanampaq listo këkänanrëkurmi congregacionninchö precursora këta qallarqan. Joqta killapana precursora karirnin y Bibliapita yachatsikunampaq tiemponta rakirirninmi, yanapakoq ëwanampaq listona këkanqanta sientikurqan.

YANAPAKUYÄNAMPAQ LISTO KËKÄYANANRËKUR TUKÏTA RURAYAN

Yachatsikoqta necesitäyanqanchö más yanapanakuyänampaq listo këkäyänanrëkurmi tukïta rurayarqan. Rikärinapaq, Roaldqa, gustanqan y alli pagashqa trabäjompitam juk watapa permïsota mañakurirqan. Pero patronninqa quedakunanta munarmi, cada ishkë semana trabajarir joqta semänakuna jamanampaq awnirqan. “Ichikllatanam ganarqä, pero allipaqmi karqan”, ninmi Roaldqa.

Jina Elsebethmi nin: “Nunäqa nimarqan Lakselv markachö wayita ashinäpaq y Bergenchö këkaq wayïkunatana alquilakuyänäpaqmi. Tiempotaraq necesitaptin y sasaraq o ajaraq kaptimpis taririyarqämi. Tsëpitanam wamräkunapis ichik tiempolla trabäjota taririyarqan, y kananqa mikïpaq y pasäjekunachöpis yanapayämanmi”.

Isabelnam yarpan: “Ëwayanqä marka ichikllanlla kaptinmi precursora kënïchö yanapamänampaq trabäjota tarinäqa sasaraq karqan. Höraqa mana tarïpaqnömi karqan”. Tsënö kaptimpis, imëka trabäjota chaskinqanmi necesitanqankunapaq yanaparqan, y punta kaq watachöqa hasta tukïläya isqun trabäjokunachömi trabajarqan. Y ¿Fabianqa imatataq rurarqan? Kënömi willakun: “Estudiöta ushanäpaqqa, yachakoqnöllam trabajëta necesitarqä y Lakselvchömi taririrqä. Y tsëpitanam, exämenchö alli yarqurirnin electricistanö wallka hörakunalla trabajanäpaq trabäjota taririrqä”.

WAKINKUNA RURAYANQAN

Marelius y warmin Kesiapis munayarqanmi yachatsikoqta más necesitäyanqan markakunachö yanapakïta. 29 watayoqna Mareliusqa këtam nin: “Asamblëakunachö entrevistakuna y precursorkunapaq discursokunam Diospita yachatsikïman más pensanäpaq yanapamarqan”. Tsënö kaptimpis, 26 watayoq Kesiapaqqa familiampita karu markakunaman ëwakïqa, sasaraqmi o ajaraqmi karqan. Pëmi nin: “Kuyashqa familiäkunapita rakikëqa alläpam llakitsimaq”. Y Mareliuspis wayimpita pagakunampaqmi llapan tiemponwan trabajëkarqan. Jina willakunmi: “Imëkachö cambiayänäpaqmi Jehoväta mañakuyarqä y tsënöpam yanapakoq ëwakuyarqä”. Bibliata más tiempopa estudiayänampaqmi puntataqa churapakäyarqan. Tsëpitanam wayinkunata rantikuriyarqan, trabäjonkunapita yarquriyarqan, y 2011 wata agosto killachömi Noruëgapa norte kaq lädompa Alta markaman precursornö yanapakuyänampaq ëwakuyarqan. Y mantenikuyänampaqnam, Mareliusqa contadornö y Kesiana almacenëranö trabajayan.

Kima chunka watayoqkunanöna Knutwan Lisbethnam, Anuariochö leiyarqan Diospita yachatsikoqta necesitäyanqanchö yanapakoqkunapaq, y tsë willakïkunam shonqunkunayaq chärirqan. Lisbethmi kënö yarpan: “Leiyanqäkunamanmi yarpachakuriyarqä. ‘¿Juk nacionta yanapakoq ëwëta puëdishwantsuraq?’, nirmi tapukuyarqä. ‘Tsë rurëta noqallä puëdinmanraqku’ nirmi pensarqä”. Tsënö mantsapakïkarpis, alistakurmi qallëkuyarqan. Knutmi willakun: “Wayïkunatam rantikuriyarqä y qellënïkunata alläpa mana gastayänäpaqmi mamanïpa wayinman täraq ëwakuyarqä. Tsëpitaqa, juk nacionkunachö imanö sirwina kanqanta musyayänäpaqmi, juk watapa ëwakuyarqä Bergen markachö inglesta parlaq congregacionman, y tsëchömi Lisbethpa mamänin kaqchö quedakuyarqä”. Ichik tiempollachönam Knutwan Lisbethqa listo sientikuyarqan Africachö Uganda nacionman täraq ëwakuyänampaq. Y precursor këta sïguiyänampaqqa, ¿imanötaq gastonkunapaq tariyan? Llapan watakunam Noruëgata kutirnin ishkë killapa trabajayan.

“JEHOVÁ ALLI KANQANTA RIKÄYË Y KUSHIKUYË”

Tsënö yanapakuyanqampita, ¿imatataq kë yachatsikoqkuna chaskiyashqa? Roaldmi nin: “Bergenchö kayanqäpitaqa, këchömi familiäwan más tiempo pasayä. Kananqa más juntom këkäyä, y wamräkuna Diospa kaqchö más poquyanqantapis kushishqam rikäyä”. Jina ninmi: “Qellëpaq y cösaskunapaqqa mananam alläpa yarpachakuyänatsu, cuentatam qokuyarqö alläpa mana precisanqanta”.

Elsebethqa juk idiömata yachakunan precisanqantam cuentata qokurirqan. ¿Imanir? Porque Lakselv congregacionchö këkaqkunaqa Karasjok markachö sami idiömata parlaqkunatapis yachatsiyanmi. Kë markaqa këkan Noruëgapa, Suëciapa, Finlandiapa y Rusiapa norte kaq lädonkunachömi. Diospita yachatsikunanrëkurmi, Elsebethqa sami idiömata yachakurqan, y kananqa tsë idioma parlëta ichikllapis puëdinnam. ¿Ima bendicionkunatataq tarishqa? Kushishqam kënö willakun: “Joqta nunakunatam Bibliapita yachëkätsï. ¡Imëpis këchömi quedakïta munä!”.

Y Fabianqa precursornam y siervo ministerialnam. Pë y panin Isabelqa, kimaq jövenkunatam yanapayarqan congregacionchö más kushishqa yanapakuyänampaq. Tsëmi, kananqa tsë kiman jövenkuna, yachatsikïchö más yanapakuyan. Jinamampis, kimampitaqa ishkaqmi bautizakuyashqa, y 2012 wata marzo killachömi precursor auxiliarnö yanapakuyashqa. Tsë kimaq jövenkunapitaqa juk shipashmi Isabeltawan Fabianta alläpa agradecikurqan yanapayanqampita. Fabianmi nin: “Agradecikayämanqanqa shonqöyaqmi chärirqan. ¡Alläpam kushikuntsik wakinkunata yanaparninqa!”. Jina Isabelnam nin: “Kë yachatsikunqä markachöqa Salmo 34:8 ‘Jehová alli kanqanta rikäyë y kushikuyë’ ninqan cumplikaqtam rikarqö. Jinamampis, ¡këchö yanapakïqa alläpa shumaqmi!”.

Mareliuswan Kesiaqa necesitäyanqanllawanmi kawayan, tsënö këkarpis kushishqam sientikuyan; musyarinallapaq, Alta congregacionman yanapakoq ëwayanqanchöqa 41 publicadorkunanam kan. Mareliusmi willakun: “Unë kawayanqäkunata yarparninqa, alläpam kushikuyä kanan witsan kawënïkuna cambianqanta. Jehovätam alläpa agradecikuyä precursornö këchö yanapakuyanqäpita. Manachi kënöqa imapis kushitsiyämanmantsu karqan”. Jina Kesiapis kënömi nin: “Chipyëpam Jehoväman confiakïta yachakurqö, y pëqa kuyëpam cuidayämashqa. Jina cuentatam qokurirqö, kastäkunapita karuchö tärëqa, pëkunawan junto kayanqäta más kuyëpa yarpänäpaq. Manam yanapakoq yarquyanqäpita arrepentikötsu”.

¿Y Knutwan Lisbethqa imanötaq Ugandachö këkäyan? Knutmi willakun: “Manam fäciltsu yachakäyarqä. Pachawanmi hora höraqa qeshyayä, y yakuwan luzpis höraqa manam kantsu, pero estudio biblicotaqa llapan puëdiyanqämannömi dirigiyä”. Lisbethnam nin: “Täräyanqäpita ichik karunllachömi Diospita imëpis mana yachatsishqa territoriokuna kan. Tsëman chärirqa Bibliata leeq nunakunatam tariyä y yachatsiyänäpaqmi niyäman. Kë humilde nunakunata yachatsiyanqäpitaqa alläpam kushikuyä”.

Qallatsinqan yachatsikï më tsë sitiokunayaq chëkanqanta rikarqa, ¡imaraq Jesus kushikïkun! Diospa markanqa, ‘entero nasioncunapa ëwar, creyicuyänanpaq nunacunata willapäyänampaq’ Jesus mandanqanta wiyakurninmi, mana imawampis igualaq kushikïta tarin (Mat. 28:19, 20).