Desgraciakuna pasakunqanqa ¿rumi shonqu dios kanqantaku rikätsikun?

WAKINKUNA NIYANQAN: “Diosqa rumi shonqu karmi desgraciakunata apamun, porqui pëmi kë Patsata gobernëkan”.

BIBLIA YACHATSIKUNQAN: “Que munducho Diospa mana caqcunaqa diablupa muneninchomi caquicayan” (1 Juan 5:19). ¿Këqa mana creipaqnöku? Entëru Patsa Satanaspa makinchö kaptinmi, nunakuna pënölla chikikoq, kikinllapaq imatapis munaq y imatapis mana qokoq kayan. Këmi rikätsimantsik imanir nunakuna kë Patsata malogrëkäyanqanta. Mëtsikaq yachaq nunakunam niyan tsënö Patsata malograyanqan imëka desgraciakuna kanampaq yanapakunqanta.

¿Imanirtaq Diosqa dejashqa Diablu poderyoq kananta? Kë tapukïta musyanapaqqa puntata rikärishun nuna kawar qallanqanchö ima pasakunqanta. Punta kaq teytantsikkunam Diospa contran churakärir revelakuriyarqan, y tsëpita patsëmi entëru Patsachö nunakuna tsënölla rurayashqa. Tsëta akrarninmi, kë mundupa gobernaqnin Diablupa munëninta rurakïkäyan. Tsëmi Jesuspis tsë gobernaqpaq parlar kënö nirqan: “mana alli ruraqcunapa mandacoqnin diablu” (Juan 14:30). Peru gobiernunqa ushakärinqanam.

Satanas imëka mana allikunata ruranqanta rikarmi Jehoväqaa alläpa llakikun. Tantiyarinapaq, nacionnin Israel “llakikï tiempupa pasayaptinmi pëpis llakikurqan” nirmi Bibliaqa Diospaq willakun (Isaïas 63:9). Tsëmi alläpa llakipäkoq karnin, ichikllachöna Satanaspa gobiernunta ushakäratsinqa. Jinamampis, Tsurin Jesucristutam imëyaqpis gobernanampaq churashqa.

IMATATAQ KËPITA YACHAKUNTSIK: Satanasqa manam ni imëka desgraciakunapita tsapämarquntsiktsu, peru Jesusqa tsapämäshunmi. Patsachö këkarninmi vientuwan yaku lamarchö laqcheqsaptin ‘amana bientïnatsu; ni yacu laqcheqsënatsu’ nirqan, ‘tsenam bientupis pararerqan, y llapanmi shumaq tranquilu ticrarerqan’ nirmi Biblia willamantsik. Tsëta rikëkurnam discïpulunkunaqa espantashqa kënö ninakuyarqan: “¿Queqa imano nunataq, tselaya bientupis y yacupis mandadunta cäsuyänanpaq!” (Marcus 4:37-41). Kë pasakunqanmi rikätsimantsik Jesusqa gobiernunchö llapan wiyakoqkunata tsapänampaq kaqta (Daniel 7:13, 14).