LEYEQKUNA TAPUKUYANQAN

¿Allitsuraq kanman cristiänu teytakuna congregacionpita qarqushqa wamranwan reunionnintsikchö juntu täkuyanqan?

Manam alläpaqa precisantsu congregacionpita qarqushqa kaqkuna reunionman ëwar mëchö täkuyanqanqa. Publicacionnintsikkunam teytakunata animashqa, wayinkunallachöraq täraq qarqushqa menorllaraq wamrankunata yanapëta puëdiyanqanta. Jina 1988 wata 15 de noviembri La Atalaya revistam 19 y 20 kaq päginankunachö nirqan, teytakunaqa congregacionpita qarqushqa wamrankunata hasta Bibliapita yachatsita puëdiyanqanta. Y tsënö rurayanqanmi, wamrata yanapan Jehoväpa markanman kutinampaq.

Allim kanman, congregacionpita qarqushqa menorllaraq wamra, büllata mana rurashpa, wakinkunata mana pantatsishpa y tranquïlulla, teytankunawan shumaq täkunan. Congregacionpita qarqushqa kaqkunataqa manam obligantsiktsu reunion höra qepallachö täkuyänanta, tsëmi mëchöpis teytankunawan täkuyanqanqa allilla kanqa. Teytakunaqa wamrankuna Diospa kaqchö alli kayänanta munarmi yanapëta munayanqa. Tsëmi menorllaraq wamrankunawan juntu täkuyanqanqa, reunionchö yachakïkanqanta o mana yachakïkanqanta rikäyänampaq yanapanqa. Peru japallanlla täkuptinqa manam yanapëta puëdiyanqatsu.

Y congregacionpita qarqushqa menorllaraq wamra teytankunawan wayichö manana täraptinqa, ¿juntutsuraq täkuyanman reunion höra? Pasaq watakunachömi publicacionnintsikkuna cläru yachatsikamurqan, qarqushqa kastantsikkuna wayintsikchö manana täräyaptinqa imanö tratanapaq kaqta.a Peru congregacionpita qarqushqawan reunion hörachö kastankuna täkuyanqanqa, manam ardëpa juntakëta munëkäyanqantatsu rikätsikun. Qarqushqakunata imanö tratanapaq Biblia ninqannö kastankuna llapanta cumplicäyaptinqa, manam yarpachakushwantsu (1 Cor. 5:11, 13; 2 Juan 11).

Congregacionpita qarqushqa shumaq portakuptinqa, manam imanantsu teytankunawan o juk cristiänukunawan juntu täkunqanqa. Reunion höra juk sitiullachö täkunampaq niyanqanqa, juk problëmakunamanmi höraqa chätsikunman. Tsëmi, kastankuna y wakin kaq cristiänukunapis congregacionpita qarqushqakunapaq Biblia ninqanta cumpliyaptin y mëchöpis täkunqan pitapis mana ofendiptinqa, alläpaqa yarpachakushwantsu.