Juk ulikïmi Dios mana entiendipaqnö kanqanta tikratsin

NUNAKUNA NIYANQAN

‘Kima Dios Jukllëllachö kanqan yachatsikïqa mana entiendipaqnömi.’ (El Diccionario Akal crítico de Teología.) Y “Catölicukuna, ortodoxokuna, anglicänukuna y protestantikunam tsë yachatsikïta qatiyan.” (Diccionario abreviado del cristianismo.)

BIBLIA YACHATSIKUNQAN

Diospa wamran Jesusqa manam ni imëpis nirqantsu Teytanwan igual kayanqanta. Antis kënömi nirqan: ‘Dios Yayaman cuticunäta musyarninmi cushicuyanqui, porqui noqa puedeq canqäpitaqa pemi mas puedeq’ (Juan 14:28). Jina juknin apostulnintam këta nirqan: “Willanqui Papänïman eucunäpaq caqta; noqapa Papänïqa qamcunapapis Papäniquicunam, y Diosnïqa qamcunapapis Diosniquicunam” (Juan 20:17).

Santu espïrituqa manam juk nunatsu (runatsu). Punta kaq cristiänukunaqa ‘santu espïrituyoqmi tikrariyarqan’, jina Jehoväqa “espïrïtütam ramamushaq llapan nunakunaman” nirqanmi (Hëchus 2:1-4, 17, NM). Santu espïrituqa manam Diostsu, sinöqa Diospa kallpanmi.

¿IMANIRTAQ YACHAKÏTA PROCURANKIMAN?

Biblia imanö kanqanta estudiaq catölicu nunakuna niyanqannöpis, Kima Dios Jukllëllachö kanqanta “mana pipis revelamashqaqa manam imanö kanqan musyakanmantsu, y revelaramashqapis manam llapantaqa entiendishwantsu”. Musyanqantsiknöpis, manam kuyëta puëdintsiktsu mana reqinqantsik o imanö kanqanta mana musyanqantsik nunataqa. Tsëmi, Kima Dios Jukllëllachö kanqan yachatsikïqa, Diosta kuyanapaq kaqta michämantsik.

Qallanan yachatsikïchö parlanqantsik Marcum cuentata qokurirqan, Kima Dios Jukllëllachö kanqan yachatsikï Diospita karupätsinqanta. Pëmi kënö nin: “Dios imanö këninta mana musyatsikunqantam pensaq kä, y tsëmi pëman witi mana puëdipaqnö kanqanta y mana entiendipaqnö kanqanta rikätsikoq”. Peru “Diosqa manam pantatsikoq Diostsu” (1 Corintius 14:33, La Biblia de las Américas español, noqakunam quechuaman tikratsiyarqö). Pëqa imanö kënintam cläru musyatsimantsik. Jesusqa kënömi nirqan: “Noqacunaqa Diosta reqirninmi, allipa adorayä” (Juan 4:22).

Marcuqa kënöpis ninmi: “Kima Dios Jukllëllachö kanqan yachatsikï mana rasumpa kanqanta yachakurirmi, Diospa amïgun tikrarirqä”. Awmi, Dios imanö kanqanta rasumpa musyarninqa mas fäcil-llam kanqa pëta kuyë. Bibliam nin: ‘Mana cuyacoqqa, manam reqintsu Diosta, porqui Diosqa allapa cuyacoqmi’ (1 Juan 4:8).