¿Imanirtaq sufrimientukuna kananta Dios permitin?

¿IMANÖTAQ DIOS SIENTIKUN SUFRINQANTSIKTA RIKARNIN?

Michelle: Imanöllataq këkanki, Sofïa. Kushikömi wayikichö taririnqaqta.

Sofïa: Noqapis kushikömi rikärinqaqta.

Michelle: Tsëllaraq watuqanqaqchöqa parlarqantsik sufrinqantsikta rikarnin Dios imanö sientikunqampaqmi.a Y mamëkita accidenti pasanqampita tsënö tapukunqëkitam nimarqëki. Y, ¿imanötaq mamëkiqa këkan?

Sofïa: Höraqa nanapäkunmi, peru kananqa allinömi këkan.

Michelle: Kushikömi alli këkanqanta. Peru tsëkunachö tsarakunëkiqa qampaq manachi fäciltsu.

Sofïa: Awmi, höraqa imëyaqraq sufrishun nirmi tapukö.

Michelle: Tsënö tapukunqëkiqa allim. ¿Dios sufrimientukunata ushakätsita puëdikarninqa, imanir permitinqanta pasaqchö tapunqaqta yarpankiku?

Sofïa: Awmi, yarpämi.

Michelle: Tsëpaq Biblia ninqanta manaraq rikarninmi, pasaqchö parlanqantsikpita wakinkunata yarpärinantsikta munä.

Sofïa: Allim kanqa.

Michelle: Puntataqa, Jehoväta mana jaqishpa sirweq nuna imanir sufrimientukuna kananta Dios permitinqanta tapukunqampitam yachakurqantsik, y Diosqa manam piñaparqantsu tsënö tapukunqampita, ni markäkïnin pishinqantatsu nirqan.

Sofïa: Rasunmi, y tsëtaqa manam musyarqätsu.

Michelle: Jina Jehovä sufrinantsikta mana munanqantapis yachakurqantsikmi. Bibliam willakun markanchö kaqkuna “llakikï tiempupa [pasayaptin] pëpis” llakikunqanta.b ¿Manaku alläpa shoqamantsik sufrinqantsikta rikarnin Diospis llakikunqanta musyanqantsikqa?

Sofïa: Awmi shoqamantsikmi.

Michelle: Jina ishkantsikmi pensarqantsik alläpa puëdeq këkarninqa, imë höra karpis sufrimientukunata ushakäratsinampaq kaqta.

Sofïa: Tsëtam alleqllaqa entiendïtsu. ¿Imanirtaq ushakätsita puëdikarninqa imëka mana allikuna pasananta permitin?

¿PITAQ RASUMPA KAQTA PARLËKARQAN?

Michelle: Genesis libru willakunqampita yachakurishun, ¿wiyarqunkiku Adanwan Ëvapaq y Dios michanqan frütapaq willakïta?

Sofïa: Awmi, catecismuchömi yachatsiyämarqan. Diosmi juk montipa frütanta mana mikuyänampaq nirqan, peru pëkunaqa manam wiyakuyarqantsu.

Michelle: Alläpa allim. Peru ima pasanqanta ichik mas yachakurishun, tsëmi yanapamäshun nunakuna imanir sufriyanqanta musyarinapaq. ¿Leyiramunkimanku Genesis 3 kaq capïtulupa, 1-5 kaq versïculunkunata?

Sofïa: Yä, kënömi nin: “Peru Jehovä Dios kamanqan llapan chukaru animalkunapitaqa culebram engañakoq tikrarirqan. Y warmitam kënö parlapar qallëkurqan: “¿Rasumpëpaku Diosqa, kë huertachö ni mëqan plantapa frütanta mana mikuyänëkipaq niyäshurqunki?”. Tsënam warmiqa culebrata nirqan: “Kë huertachö këkaq plantakunapa frütankunataqa llapantam mikïta puëdiyä. Peru huerta chowpinchö plantapa frütantaqa, Dios nishqam: ‘Manam mikuyänëkitsu, manam, manam yatayänëkitsu mana wanuyänëkipaq’”. Tsënam culebraqa warmita kënö nirqan: “Manam wanuyankitsu. Diosqa musyanmi tsëta mikuyanqëki junaq nawikikuna kichakäriptin Diosnö alli kaqta y mana alli kaqta reqir kayänëkita”.

Michelle: Gracias. Kë versïculukunapita ichik mas yachakurishun. Puntataqa juk culebra Ëvawan parlanqantam willamantsik. Peru Bibliapa juk textunqa Ëvata parlapaq culebra Satanas Diablu kanqantam willakun.c Pëmi Ëvata Dios michanqan montipa frütampaq tapurirqan. ¿Y Diosta mana cäsukuyaptinqa imataq Adan y Ëvata pasanan karqan?

Sofïa: Wanuyänanmi karqan.

Michelle: Awmi. Tsëpitanam, Diabluqa juk mana alli rurëpita Diosta tumparqan kënö nirnin: “Manam wanuyankitsu”, juk parlakïchöqa Dios ulikoq (llullakoq) kanqantam nikarqan.

Sofïa: Tsënö tumpanqantaqa manam musyarqätsu.

Michelle: Diosta Satanas ulikoqmi nirnin tumpanqanqa, tiempuwanran contestakänan karqan. ¿Musyankiku imanir tsënö kanqanta?

Sofïa: Mmm . . . Rasumpa kaqchöqa, manam.

Michelle: Këllaman pensarishun. Juk junaqchö wayikiman shamöman y qampita mas kallpayoq kanqäta nïman. ¿Imanöraq rikätsikunkiman nikanqa mana rasun kanqanta?

Sofïa: Itsachi mëqantsik mas lasaqta pallarinqantsikwan musyarishwan.

Michelle: Awmi, itsachi imatapis lasaqta mëqantsik pallarita puëdinqantsikta rikashwan. Tsëta rurëqa manachi sasatsu kanman.

Sofïa: Ajä, entiendirinam.

Michelle: ¿Peru mana honräda kanqëkita niptïqa?, jukläyanachi kanman, ¿aw?

Sofïa: Rasunmi.

Michelle: Honrädu kanqantsiktaqa manam lasaqkunata pallarirllatsu rikätsikuntsik.

Sofïa: Awmi tsëqa rasunmi.

Michelle: Rasumpa honräda kanqëkita musyanapaqqa tiempuraqchi pasanman imanö portakunqëkita wakinkuna rikäyänampaq.

Sofïa: Rasunllatam ninki.

Michelle: Genesis libru willakunqanta yapë rikärishun. ¿Diospita mas kallpayoq kanqantaku Diabluqa nirqan?

Sofïa: Manam.

Michelle: Kallpayoq kanqantaqa Diosqa fäcil-llachi rikätsikurinman karqan. Satanasqa Dios mana honrädu kanqantam nirqan. Juk parlakïchöqa Ëvatam kënö nikarqan: “Diosqa ulipëkäshunkim (llullapëkäshunkim), noqam rasumpa kaqtaqa nikaq”.

Sofïa: Ah . . . Tsëtaqa manam musyarqätsu.

Michelle: Peru Diosqa alläpa yachaqmi, y alleqmi musyarqan mëqan rasumpa kaqta parlanqan musyakänampaqqa tiempu pasananraq precisanqanta.

JUK PRECISAQ PROBLËMA

Sofïa: Peru Ëva wanuriptinqa, ¿manaku cläru musyakärirqan Dios rasumpa kaqta parlanqan?

Michelle: Awmi tsënömi karqan, tsënö kaptimpis, Satanasqa manam tsëllapitatsu Diosta tumparqan. 5 kaq versïculu ninqanta yapë rikärishun ¿Ima mastataq Diablu Ëvata nirqan?

Sofïa: Dios michanqan frütata mikuriptinqa, nawinkuna kichakärinampaq kaqtam.

Michelle: Awmi jina tsëta mikurninqa “Diosnö alli kaqta y mana alli kaqta” reqiyänampaqmi nirqan. Tsënö nirqa allikunapita nunakunata Dios michëkanqantam nikarqan.

Sofïa: Entiendikänam

Michelle: Tsënö ninqanqa, alläpa mana allim karqan.

Sofïa: Manam alleqllaqa entiendïtsu.

Michelle: Diabluqa, Ëvapaq y llapan nunakunapaqmi Dios yanapayänanta mana wanayanqanta nikarqan. Jehoväqa alleqmi musyarqan kë problëma altsakänampaqqa tiempu pasananraq precisanqanta. Tsëmi Diabluta kë Patsata juk tiempupa gobernanampaq jaqirirqan, tsënöpam entëru patsa Diablupa mandakïninchö kaptin, alläpa sufrimientukuna kan.d Peru alli noticiakunatam apëkämö.

Sofïa: ¿Alli noticiakunata?

Michelle: Awmi, Bibliaqa imëka sufrimientupa pasashqapis Jehovä läduntsikchö këkanqantam yachatsikun. Tantiyarinapaq, rikärishun Salmu 31:7 textuchö rey David qellqanqanta. Pëqa alläpam sufrirqan, peru rikärishun Dios ima ninqanta. ¿Leyiramunkimanku?

Sofïa: Kënömi nin: “Rasumpam kushishqa kashaq y rasumpa kuyakoq kanqëkipitam alläpa kushishqa kashaq, llakikïnïtam rikarqunki y imanir llakishqa këkanqätapis musyarqunkim”.

Michelle: Këchö rikärinqantsiknöpis, alläpa sufrikarnimpis Davidqa shoqakïtam tarirqan pasëkanqanta Dios rikëkanqanman yarpar. Y qamqa, ¿kushikunkiku imanö sientikunqantsikta y imakunapa pasëkanqantsikta wakinkuna mana rikëkäyaptimpis Jehovä rikëkanqanta musyar?

Sofïa: Awmi alläpam kushikö.

Michelle: Jina sufrimientukuna imë karpis ushakärinampaq kaqtam Bibliaqa yachatsimantsik. Jinamampis ichikllachöna Satanaspa mandakïnin usharinampaq kaqta, y mana alli ruranqankunata Dios altsaramunampaq kaqtam yachatsikun. Tsënöpam qam y mamëki sufriyanqëkitapis ushakäratsimunqa. Peru, ¿imanirtaq sufrimientukunata ushakätsimunampaq kaqtae següru këkanqantsik? ¿Alliku tsëpita yachakurinapaq warë semäna kutiramüman?

Sofïa: Awmi, allim kanqa.