Bibliawanmi llapan tapukïnïkunata contestayämarqan

PUNTA KANQÄ:

Espäñapa Galicia markanchömi teytakunapa granjan karqan, y tsëchömi yurikurqä. Teytäkunapaqa puwaqmi wamrankuna karqan, y noqam chusku kaq kä. Alläpa kushishqam kawakuyarqä. Tsë witsëkunaqa cada familiapitam jukllëllapis cürapaq o monjapaq estudiayaq. Familiäkunapitaqa kimaqmi (kimsaqmi) estudiaq yëkuyarqä.

13 watayoq këkarmi Madridchö këkaq monjakunapa wayiman ëwakurqä, y nanäpis (ñañäpis) tsëchönam këkarqan. Tsëchöqa manam parlapänakï ni amïgu këpis kaqtsu, alläpam controlayämaq y niyanqanta cumpliyänapaqmi pasëpa obligayämaq. Qoya qoyallam (wärayllam) yarpachakuyänäpaq capillachö juntakäyaq kayä, peru noqaqa juk cösaskunamanmi yarparäkoq kä. Tsëpitam alli cantarïkur misa wiyaq ëwayaq kayä. Latin idiömachö yachatsikayämuptinmi ni imatapis entiendeqtsu kä, y Diosqa alläpa karuchö kanqantam sienteq kä. Wamayëkarllam junaqtapis ushareq kä. Nanäwan tinkurpis “Ave Marïa purïsima” ninakuriyaqllam kayä. Cada mikur ushariyaptïmi, media hörallata qoyämaq parlakuriyänäpaq. Japallälla sientikurmi waqarlla kakoq kä. ¡Wayïchö karninqa manam tsënötsu sientikurqä!

Diosta alleq mana reqikarpis, 17 watayoq këkarmi monja tikrarirqä. Tsëtaqa rurarqä teytäkunata kushitsinärëkurllam, peru ichik tiempu pasariptinllam “¿rasumpaku monja këta munä?” nir tapukur qallëkurqä. ¡Wakin monja mayïkunam niyämaq, “allitatsuraq o mana allitatsuraq rurëkä” nishpa yarpachakoqkunaqa infiernuchö ushakäyänampaq kaqta! Tsënö nikäyämaptimpis yarpachakïkaqllam kä. Noqaqa alleqmi musyaq kä, Jesusqa kuyakoq karnin nunakunata yachatsinqanta y yanapanqanta, peru këkanqächöqa manam tsënötsu kaq (Mateu 4:23-25). 20 watayoq këkarnam cuentata qokurirqä monja këqa imachöpis mana yanapamanqanta. Monjakunata mandaq monjam, “yarpachakurlla kakurninqa jinan höra ëwakï” nimarqan. Tsëmi jinan höra ëwakurqä. Itsachi tsëtaqa nimarqan wakin monjakunata yarpachakïman mana churanapaq.

Teytakunaqa entiendiyämarqanmi. Peru trabäju mana kaptinmi Alemania nacionta ëwakurqä, tsëchöqa juknin kaq turïmi tärarqan. Pëqa comunista grüpuchömi español nunakunawan juntaraq. Tsë grüpuchöqa allim sientikoq kä, porqui trabajadorkunapa y warmikunapa derëchuntam respetatsiyaq. Tsëmi comunista tikrarirqä y tiempuwannam tsë grüpupita nunawan casakurirqä. Comunistapaq parlaq papelkunatam rakikoq kä, y cällikunapam büllata rurar puriyaq kayä. Allita rurëkanqätam pënsaq kä.

Peru tiempuwanqa qelanarmi qallëkurqä. Porqui rikarqämi, comunistakunaqa yachatsikuyanqannö mana rurayanqanta. Tsëqa cläru rikakurirqan, 1971 watachö Espäñapa precisaq mandakoqninta grüpökunapita jövinkuna Alemaniachö kayariyanqanwanmi. Españolkuna mana allita rurayanqanrëkurmi justiciata mañakurnin tsëta rurëkuyarqan, peru noqapaqqa tsë rurayanqan mana allim karqan.

Punta kaq wamräkuna yuririptinmi nunäta nirqä grüpökunapa reunionninman manana ëwanapaq kaqta. Japallämi sientikoq kä, manam wamratawan noqata ni jukllaqllapis watukayämarqantsu. “Imapaqraq kë patsachö kawä” nirmi tapukoq kä. Imëkapis alli kananta munar rurayanqäkunaqa manam ni imapaqpis sirweqtsu.

IMANÖTAQ BIBLIA YANAPASHQA JUKLÄYA TIKRANAMPAQ:

1976 watachömi Jehoväpa testïgunkuna wayïman watukayämarqan y publicacionkunata jaqipayämarqan. Yapë kutiyämuptinnam, sufrimientukuna imanir kanqampaq y imëka mana allikuna imanir pasakunqampaq mëtsika tapukïkunata rurarqä. Peru llapan tapukïnïkunatam Bibliawan contestayämarqan. Tsëmi Bibliapita yachakur qallëkurqä.

Musyëta munarllam yachakur qallarqä, peru Jehoväpa testïgunkunapa reunionninkunaman nunäwan ëwar qallëkurninqa, juknöpanam pensarqä. Tsë witsampaqqa ishkënam wamräkuna karqan. Testïgukunam yanapayämaq reunionkunaman apayämarnï y reunion hörapis wamräkunata cuidarnin. Tsënöpam Testïgukunata yachanärirqä.

Tsënö kaptimpis, allitatsuraq o mana allitatsuraq rurëkä nirmi yarpachakoq kä. Espäñachö familiakunata watukaq ëwanqächömi, Testïgukunawan Bibliata estudiëta jaqirinapaq cüra tiyü nimarqan, peru tsë markachö Testïgukunaqa alläpam yanapayämarqan. Alemaniachö Testïgukunanöllam, Espäñachö Testïgukunapis tapukïnïkunata Bibliawan contestayämarqan. Alemaniata kutikurqa, “Bibliata estudiarmi sïguishaq” nirqämi. Nunä manana munaptimpis noqaqa sïgirqämi. Y 1978 watachö bautisakurirqä.

IMAKUNACHÖTAQ YANAPAMASHQA:

Bibliapita yachakunqämi kawënïchö yanapamashqa. Këllata willariyashqëki, 1 Pëdru 3:1-4 textum warmikunata mandan, nunankunapa mandädunchö kayänampaq, respetayänampaq y pacienciayoq kayänampaq, porqui tsënö këqa “Diospa riqueninchopis allapa baleqmi”. Tsë y mas wakin musyatsikïkunam yanapamashqa alli warmi y alli mama kanäpaq.

Jehoväpa testïgun tikranqäpitaqa 35 watanam pasarishqa. Alläpam kushikö Diosta sirwinqäpita, markanchö kanqäpita y pitsqaq wamräkunapita chuskoq kaq, Jehoväta sirwiyanqampita.