BIBLIAPITA TAPUKÏKUNA
¿Puëdiyanku angelkuna yanapamënintsikta?
Unë tiempuchö Diospa sirweqnin Danielta yanapayanqannöllam, kanampis angelkunaqa nunakunata yanapëkäyan Bibliapita yachakuyänampaq
Manaraq nunata kamarmi, Diosqa waranqëpayan angelkunata kamarqan (Job 38:4, 7). Kë puëdeq espïritukunaqa Diostam sirwiyan. Höraqa pëmi mandan wiyakoq nunakunata pushayänampaq y tsapäyänampaq (Salmu 91:10, 11). Kanan witsampis angelkunaqa yanapakuyan, Jesuspa qateqninkuna yachatsikuyanqampita nunakuna yachakuyänampaqmi. (Leyi Apocalipsis 14:6, 7.)
Tsëqa, ¿angelkunamanku mañakushwan yanapamänapaq? Manam; mañakïqa adorë ninanmi, y Diosllatam adoranantsikqa (Apocalipsis 19:10). Angelkunaqa Diosta sirwirmi pë mandanqankunata wiyakuyan, y manam nunakunapa mañakïnintatsu. Tsëmi, Diosllata imëpis mañakunantsik Jesuspa jutinchö. (Leyi Salmu 103:20, 21 y Mateu 26:53.)
¿Kanku mana alli angelkuna?
Angelkunaqa nunakunanöllam kamashqa kayarqan, kikinkuna alli kaqta o mana alli kaqta akrayänampaq. Peru llakikïpaqqa Diospa contran mëtsikaq churakäyanqanmi (2 Pëdru 2:4, NM). Diospa contran punta churakaqqa Satanasmi karqan; wakin angelkunapis tsënö rurarmi demoniuman tikrariyarqan. Y pëkunata ciëlupita qarqayämunqampitaqa manam alläpa tiempuraqtsu pasashqa. (Leyi Apocalipsis 12:7-9.)
1914 watapita patsëmi mana allikuna, maqanakïkuna y wanutsinakïkuna alläpa mirëkushqa. Tsëmi rikätsikun, ichikllachöna Satanasta y demoniunkunata Dios ushakätsinampaq, y Patsata juk shumaq huertaman tikratsinampaq kaqta. (Leyi Apocalipsis 12:12 y 21:3, 4.)