¿Jesusman mañakushwanku?
PASAQ ishkë watallachöran, mëtsika religionpita 800 jövinkunapitapis masta, musyapakuyänampaq höjachö, Jesus mañakïkunata wiyanqanta o mana wiyanqanta qellqayänampaq niyarqan. Pullampitapis masmi awmi nir contestayarqan, peru jukllëllam Jesuspa jutinta borrarir “Dios” nir qellqarqan.
¿Qamqa ima ninkitaq? ¿Pimantaq mañakushwan? ¿Diosmanku o Jesusmanku?a Respuestankunata musyarinapaqqa, rikärishun Jesus qateqninkunata yachatsinqanta.
¿PIMAN MAÑAKUNAPAQTAQ JESUS NIRQAN?
Jesusqa manam Diosman mañakunallapaqtsu yachatsikurqan, sinöqa kikinmi tsëta rurarqan.
Jesusqa Teytanmanmi mañakoq noqantsikpis tsënöllam ruranantsik
YACHATSIKUNQAN: Juk kutim, Jesuspa juk qateqnin kënö nirqan: “Teyta Jesus, Diosman mañacuyänäpaq, noqacunatapis yachecatsiyämë”. Jesusnam kënö nirqan: “Mañacurnin queno niyanqui: ‘Sielucho quecaq Dios Yayalläcuna’” (Lücas 11:1, 2). Tiempu pasariptinnam, Jesusqa yachatsikurqan imanö mañakunapaq kaqta Jirkapita Yachatsikunqanchö. Kënömi nirqan: ‘Dios Yayata mañaquï. Porqui manaraq mañacuyaptiquim, Dios Yayaqa musyanna imata wanayanqequitapis’ (Mateu 6:6, 8). Juk ampi wanunampaq pishikaptinmi qateqninkunata kënö nirqan: “Imatapis jutïcho mañacuyaptiqueqa, Dios Yaya qoyäshunquim” (Juan 16:23). Rikanqantsiknöpis, Jesusqa kutin kutinmi yachatsikurqan Teytan Jehoväman mañakunapaq (Juan 20:17).
RURANQAN: Kikin Jesusmi mañakurqan kënö nir: “Sieluchopis patsachopis mandacoq Dios Yaya, qamtam alabecoq” (Lücas 10:21). Juk kutinam, “rara sieluman ricarcur Jesus queno mañacorqan: —Papällä, mañaconqaqta wiyamashqa captiquim allapa agradesicoq” (Juan 11:41). Jina usharinampaqnam kënö nirqan: “Diosllä, qamtam almällata qoycoq” (Lücas 23:46). Tsënö rurarmi pëqa yachatsimarquntsik “sieluchopis, patsachopis mandacoq Dios” Jehoväta mañakunapaq (Mateu 11:25; 26:41, 42; 1 Juan 2:6). Y tsëtam punta kaq cristiänukunapis rurayarqan.
¿PITATAQ PUNTA KAQ CRISTIÄNUKUNA MAÑAKUYAQ?
Jesus ciëluta kutikunqampita semänallatam, discïpulunkunataqa autoridäkuna qatikachëkäyarqanna (Hëchus 4:18). Imëpis rurayanqannömi yanapakïta ashir mañakuyarqan. Peru ¿pimantaq mañakuyarqan? Jesuspa jutinchömi “Diosman juc shonqulla llapan mañacuyarqan” (Hëchus 4:24, 30). Awmi, Jesus yachatsikunqantam rurayarqan: Diosmanmi mañakuyarqan.
Watakuna pasariptinnam, apostol Pabluqa kënö qellqarqan: “Teyta Jesucristupa Papänin Dios Yayata cada mañacurmi, qamcunapaq siempri ‘Grasias’ nicayä” (Colosensis 1:3). Y cristiänukunatam consejarqan imëpis mañakuyänampaq, kënömi nirqan: “Teytantsic Jesucristurecur Dios Yayata llapan imecapitapis siempri grasias nicayë” (Efesius 5:20). Juk kutinam, “Dios Yayata” mañakuyänampaq nirqan, peru Jesuspa jutinchö (Colosensis 3:17).
Punta kaq cristiänukunanöllam, Jesus yachatsikunqanta qatinantsik mañakunqantsik höra, tsënömi rikätsishun kuyanqantsikta (Juan 14:15). Bibliata juk qellqaqmi kënö nirqan: “Diostam rasumpa kuyä, porqui mañakunqäkunatam wiyan. [...] kawanqäyaqmi mañakushaq” (Sal. 116:1, 2). Noqantsikpis tsënöllam nishun Jehovällata mañakurninqa.b
a Bibliaqa willakun Dioswan Jesus jukläya kayanqantam. Maslla yachakïta munarqa, Rasumpëpaqa, ¿imatataq Biblia yachatsikun? librupa 4 kaq capïtulunta leyiri, kë librutaqa Jehoväpa testïgunkunam rurayämushqa.
b Jinamampis, mañakïnintsikta Dios wiyanampaqqa, mandakunqankunatam cumplinantsik. Maslla yachakïta munarqa, Rasumpëpaqa, ¿imatataq Biblia yachatsikun? librupa 17 kaq capïtulunta leyiri.