¿Llapankunataku sinchi trabäjuqa gustan?
Camionman lasaq cäjata apëkarmi Älexqa llakishqa shütarin y kënö pensan: “¿Kë trabäjullachötsuraq imëpis kashaq? ¿Juk mas alli trabäjuta tarishaqtsuraq? ¡Mas allichi kawaköman mas alli trabäjuyoq karqa!”.
Tsënö sinchi trabäjukunapitaqa manam Älexllatsu llakishqa sientikun. Jina Aaronpis kënömi nin: “Cäsi llapan nunakunam creiyan tsënö sinchi trabäjuqa waktsakunallapaq kanqanta. Tsënö trabäjuyoq karqä wallka tiempullapam trabajayan, y mas alli trabäju chaptinqa tsëtam akrariyan”.
Mëtsikaq nunakunam niyan, tsënö sinchi trabäjupaq mana kayanqanta. ¿Imanir? Porqui itsa tukïläya propagandakuna rikätsikuyashqa imëkayoq y kapoqyoq kar-raq kushishqa kawakï kanqanta. Mantenimientuchö trabajaq Mattheum kënö nin: “Pï mëmi creiyan sinchi trabäjukunaqa mana alli yarqupukoqkunallapaq kanqanta”. Jina Shanepis tsënöllam nin: “Nunakunaqa unë ganayanqannöllam ganëta munayan, peru alläpa mana trabajashllapa”.
Peru atskaqtam sinchi trabäjukunaqa gustayan. Albañilnö trabajaq 25 watayoq Danielmi kënö nin: “Alläpa kushishqam sientikunki wananqëkillapaq trabajarqa”. Jina 23 watayoq Andrëpis tsënöllam nin: “Alleqmi musyä rasumpa kushishqa kanapaqqa trabajë precisanqanta. Ichiklla trabajëqa manam rasumpa kushishqatatsu katsishunki, gänasninnaqtam katsishunki”.
¿Imataq yanapashqa Danieltawan Andrëta sinchi trabäjuta allipa rikäyänampaq? Bibliapa consëjunkunata cuentaman churayanqanmi. Bibliaqa yachatsikun imatapis kallpachakur y mana jaqipa rurëqa alli kanqantam, jina ruranqantsikwan imanö kushikunapaqpis yachatsimantsikmi.
¿Bibliapa mëqan consëjunkunataq yanapashunkiman trabajarnin kushikunëkipaq? Qateqnin kaq yachatsikïchö wakinta rikäri.