¿Bibliachöku respuestankuna këkan?

¿Kë tapukïkunata rurakurqunkiku? Manam qamllatsu tsënö tapukunki. Tsënö mëtsika precisaq tapukïkunapa respuestantam entëru Patsachö nunakuna musyëta munayan. ¿Respuestankunata tarita puëdishwantsuraq?

Millonyëpayan nunakunam awmi niyanman. ¿Imanir? Porqui Bibliachömi tapukïninkunapa respuestankunata tariyashqa. ¿Musyëta munankimantsuraq? Tsëqa itsa Jehoväpa testïgunkunawan debaldilla Bibliapita yachatsikïta munankiman.a

Bibliapita yachakuyänampaq nishqaqa, tiempunkuna mana kanqanta, alläpa sasa kanqanta o imamampis mëtikïta mana munayanqantam wakinkunaqa niyan. Peru wakinkunaqa Bibliapita yachakïtam provechayashqa y kënömi niyan.

• “Catölicu, protestanti, sijismu y budista religionkunapa iglesiankunamanmi ëwarqä. Hasta Teologïatam universidächö estudiarqä Diospita mas yachakunäpaq. Y tapukïnïkunapa respuestantaqa manam llapantatsu tarirqä. Peru Jehoväpa testïgunmi punkuta takakaramurqan. Tapukïnïkunata Bibliawan contestamanqanmi alläpa gustamarqan, tsëmi Bibliapita yachatsimänanta munarqä.” (Inglatërrapita, Gill.)

• “Atska tapukïnïkunam karqan, y tsëkunapaq pastornï yachatsimanqanwanqa manam gustutsu karqä. Peru Testïgukunaqa Bibliata utilizarmi tsë tapukïnïkunapa respuestanta cläru yacharatsiyämarqan. Mas yachakïta munanqäta tapurayämaptinmi änirirqä.” (Beninpita, Koffi.)

• “Wanushqakuna mëchö këkäyanqantam musyëta munarqä. Ima mana allitapis rurëkamänantam creeq kä, y tsëpaq Biblia ima ninqantam tapukoq kä. Tsëmi juk amïgö Testïguwan estudiar qallëkurqä.” (Brasilpita, Josë.)

• “Bibliatam leyir qallëkurqä, peru manam ni imatapis entiendirqätsu. Juk junaqmi, Jehoväpa testïgukuna wayiman shayämurqan y Bibliapa willakïninkunatam yachatsiyämarqan. Y tsënöpam mas yachakïta munarirqä.” (Mëxicupita, Dennize.)

• “¿Kuyamantsuraq Dios? nirmi tapukoq kä. Bibliachö parlanqan Diosmanmi mañakïta decidirqä. Waräninnam Jehoväpa testïgukuna watukayämarqan y pëkunawanmi Bibliapita yachakur qallëkurqä.” (Nepalpita, Anju.)

“Kushishqam kayan Diosta wanar asheq kaqkunaqa” nir Jesus ninqanqa, kë nunakunachö cumplikanmi (Mateu 5:3, NM). Llapantsikmi kushishqa këta munantsik, y tsëta tarinapaqqa Diosllam yanapamënintsikta puëdin. ¿Imanö? Palabran Bibliawan.

¿Imanötaq Biblia yachatsikunqanta musyëta puëdinkiman? ¿Tsë ruranqëki yanapashunkimantsuraq? Qateqnin yachatsikïchö rikärishun.